ಗಡಿಯಲ್ಲಿ ದೀಪಾವಳಿ ಹಬ್ಬ ಆಚರಿಸಿದ ವೀರ ಯೋಧರು

ಜಮ್ಮು: ಗಡಿ ಪ್ರದೇಶದಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ದೇಶದ ವೀರ ಯೋಧರು ಬೆಳಕಿನ ಹಬ್ಬ ದೀಪಾವಳಿಯನ್ನು ಆಚರಣೆ ಮಾಡಿದ್ದಾರೆ. 

ಕುಟುಂಬದಿಂದ ದೂರ ಉಳಿದು ದೇಶಕ್ಕಾಗಿ ಹಗಲಿರುಳು ಭಾರತೀಯ ಸೇನಾಪಡೆಯ ಯೋಧರು ಸೇವೆ ಸಲ್ಲಿಸುತ್ತಿದ್ದಾರೆ.  ಜಮ್ಮುವಿನ ಆರ್'ಎಸ್.ಪುರದ ಗಡಿಯಲ್ಲಿ ಮುಂಬತ್ತಿಗಳನ್ನು ಹಚ್ಚಿದ ಯೋಧರು, ಪಟಾಕಿಗಳನ್ನು ಸಿಡಿಸಿ ಯೋಧರು ಹಬ್ಬವನ್ನು ಸಂಭ್ರಮದಿಂದ ಆಚರಿಸಿದ್ದಾರೆ. 

ನಮಗೆ ಎರಡು ಕುಟುಂಬಗಳಿವೆ. ಅದರಲ್ಲಿ ಒಂದು ಭಾರತೀಯ ಸೇನೆ. ನಾವು ಇಂದು ನಮ್ಮ ಮನೆಯಲ್ಲಿಯೇ ದೀಪಾವಳಿಯನ್ನು ಆಚರಿಸುತ್ತಿದ್ದೇವೆ. ದೇಶದ ಜನತೆ ನಿರ್ಭೀತಿಯಿಂದ, ಸಂಭ್ರಮ, ಸಂತೋಷದಿಂದ ಆಚರಣೆ ಮಾಡುವಂತೆ ನಾವು ನೋಡಿಕೊಳ್ಲುತ್ತೇವೆಂದು ಯೋಧರು ತಿಳಿಸಿದ್ದಾರೆ. 

ತ್ರಿಪುರದಲ್ಲಿ ದೀಪಾವಳಿಯ ಮುನ್ನಾದಿನದಂದು ಅಖೌರಾ-ಅಗರ್ತಲಾ ಇಂಟಿಗ್ರೇಟೆಡ್ ಚೆಕ್ ಪೋಸ್ಟ್‌ ಬಳಿ ಬಿಎಸ್‌ಎಫ್ ಯೋಧರು ಮತ್ತು ಬಾಂಗ್ಲಾದೇಶ ಗಡಿ ಸಿಬ್ಬಂದಿಗಳು (ಬಿಜಿಬಿ) ಮೇಣದಬತ್ತಿಗಳನ್ನು ಬೆಳಗಿಸಿದರು. ಈ ಸಂದರ್ಭದಲ್ಲಿ ಬಿಎಸ್‌ಎಫ್ ಯೋಧರು ಬಾಂಗ್ಲಾದೇಶದ ಪಡೆಗಳಿಗೆ ಸಿಹಿತಿಂಡಿ ಹಾಗೂ ಉಡುಗೊರೆಯಾಗಿ ನೀಡಿದರು.