ಮೇವು ಹಗರಣ: ನ್ಯಾಯಾಧೀಶರಿಗೆ ಕರೆ ಮಾಡಿದವರ ವಿಚಾರಣೆಗೆ ಉತ್ತರ ಪ್ರದೇಶ ಸಿಎಂ ಆದೇಶ

ಲಖ್ನೋ: ಮೇವು ಹಗರಣ ಪ್ರಕರಣಕ್ಕೆ ಸಂಬಂಧಿಸಿದಂತೆ ಲಾಲು ಪ್ರಸಾದ್ ಯಾದವ್ ಅವರ ಆಪ್ತರ ಕಡೆಯಿಂದ  ಕರೆಗಳನ್ನು ಸ್ವೀಕರಿಸುವ ಕುರಿತು  ಸಿಬಿಐ ವಿಶೇಷ ನ್ಯಾಯಾಲಯದ ನ್ಯಾಯಾಧೀಶ ಶಿವಪಾಲ್ ಸಿಂಗ್ ಹೇಳಿಕೆ ಸಂಬಂಧ  ತನಿಖೆ ನಡೆಸುವಂತೆ ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಆದೇಶಿಸಿದ್ದಾರೆ.

ಝಾನ್ಸಿ ಕಮೀಷನರ್, ಅಮಿತ್ ಗುಪ್ತಾ ಈ ವಿಷಯವನ್ನು ತನಿಖೆ ನಡೆಸಿ ಶೀಘ್ರಆಗಿ ವರದಿ ಒಪ್ಪಿಸುವಂತೆ ಯೋಗಿ ಆದಿತ್ಯನಾಥ್ ಆದೇಶಿಸಿದ್ದಾರೆ. ಜಲಾಮ್ ಜಿಲ್ಲೆಯ ಜಿಲ್ಲಾ ಮ್ಯಾಜಿಸ್ಟ್ರೇಟ್ ಮನ್ನನ್ ಅಖ್ತರ್ - ಸಿಂಗ್ ಗೆ ಕರೆ ಮಾಡಿದ್ದವರಲ್ಲಿ ಒಬ್ಬರಾಗಿದ್ದು ಅವರನ್ನು ವಿಚಾರಣೆಗೆ ಒಳಪಡಿಸಲು ಸೂಚಿಸಲಾಗಿದೆ.  ಆದರೆ ತಾನು ಶಿವಪಾಲ್ ಸಿಂಗ್ಅವರಿಗೆ ಯಾವ ಕರೆಯನ್ನೂ ಮಾಡಿಲ್ಲ. ಸಿಂಗ್ ಸೂಚಿಸಿರುವ ದಿನ ನಾನು ಅಸ್ಸಾಂ ನಲ್ಲಿರುವ ನನ್ನ ಊರಿಗೆ ತೆರಳಿದ್ದೆ ಎಂದು ಅಖ್ತರ್ ಮಾದ್ಯಮಕ್ಕೆ ತಿಳಿಸಿದ್ದಾರೆ.

ಜನವರಿ 4 ರಂದು ಶಿಕ್ಷೆಯ ಪ್ರಮಾಣವನ್ನು ಪ್ರಕಟಿಸುವ ಸಂದರ್ಭದಲ್ಲಿ, ರಾಂಚಿ ಸೆಂಟ್ರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ (ಸಿಬಿಐ) ವಿಶೇಷ ನ್ಯಾಯಾಲಯದ ನ್ಯಾಯಾಧೀಶ ಶಿವಪಾಲ್ ಸಿಂಗ್ ತಾನು ಲಾಲೂ ಪ್ರಸಾದ್ ಆಪ್ತರಿಂದ ದೂರವಾಣಿ ಕರೆಗಳನ್ನು ಸ್ವೀಕರಿಸಿದ್ದಾಗಿ ಹೇಳಿಕೊಂಡಿದ್ದರು.

ಮೇವು ಹಗರಣದಲ್ಲಿ ಆರ್ ಜೆಡಿ ಮುಖ್ಯಸ್ಥ, ಲಾಲೂ ಪ್ರಸಾದ್ ಯಾದವ್ ಮತ್ತು ಇತರೆ  14 ಮಂದಿ ನ್ಯಾಯಾಲಯವು ತಪ್ಪಿತಸ್ಥರೆಂದು ತೀರ್ಪು ನೀಡಿದ್ದು, ಮಾಜಿ ಬಿಹಾರ ಮುಖ್ಯಮಂತ್ರಿ ಜಗನ್ನಾಥ ಮಿಶ್ರಾ ಸೇರಿದಂತೆ ಏಳು ಮಂದಿ ಆರೋಪಿಗಳನ್ನು ಡಿಸೆಂಬರ್ 23 ರಂದು ಖುಲಾಸೆಗೊಳಿಸಲಾಗಿತ್ತು. ಪ್ರಕರಣ ಸಂಬಂಧ ಜನವರಿ 6 ರಂದು ಲಾಲು ಅವರಿಗೆ 3.5 ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಯಿತು.