ಆರ್ ಎಸ್ ಎಸ್ ನ್ನು ಐಎಸ್ಐಎಸ್ ಗೆ ಹೋಲಿಕೆ ಮಾಡಿದ ಗುಲಾಂ ನಬಿ ಆಜಾದ್: ಬಿಜೆಪಿಯಿಂದ ಕ್ಷಮೆಯಾಚನೆಗೆ ಒತ್ತಾಯ

ನವದೆಹಲಿ: ಕಾಂಗ್ರೆಸ್ ನಾಯಕ ಗುಲಾಂ ನಬಿ ಆಜಾದ್ ಆರ್ ಎಸ್ ಎಸ್ ಹಾಗೂ ಉಗ್ರ ಸಂಘಟನೆ ಐಎಸ್ಐಎಸ್ ನ್ನು ಹೋಲಿಕೆ ಮಾಡಿದ್ದಾರೆ.

ಆರ್ ಎಸ್ ಎಸ್ ಸಂಘಟನೆಯನ್ನು ವಿರೋಧಿಸುವಂತೆಯೇ ನಾವು ಐಎಸ್ ಐ ಉಗ್ರ ಸಂಘಟನೆಯನ್ನು ವಿರೋಧಿಸುತ್ತೇವೆ, ಇಸ್ಲಾಂ ನಲ್ಲಿ ತಪ್ಪುಗಳನ್ನು ಮಾಡುವವರು ಆರ್ ಎಸ್ ಎಸ್ ಗಿಂತ ಕಡಿಮೆಯಲ್ಲ ಎಂದು ಕಾಂಗ್ರೆಸ್ ನಾಯಕ, ರಾಜ್ಯಸಭೆಯ ವಿಪಕ್ಷ ನಾಯಕ ಗುಲಾಂ ನಬಿ ಆಜಾದ್ ಹೇಳಿದ್ದಾರೆ. ಗುಲಾಂ ನಬಿ ಆಜಾದ್ ಹೇಳಿಕೆಗೆ ಪ್ರತಿಕ್ರಿಯೆ ನೀಡಿರುವ ಆರ್ ಎಸ್ ಎಸ್ ವಕ್ತಾರರೊಬ್ಬರು, ಗುಲಾಂ ನಬಿ ಆಜಾದ್ ಅವರ ಹೇಳಿಕೆ ಕಾಂಗ್ರೆಸ್ ನ ಬೌದ್ಧಿಕ ದಿವಾಳಿತನವನ್ನು ತೋರುತ್ತದೆ, ಅಷ್ಟೇ ಅಲ್ಲದೇ ಐಎಸ್ಐ ನಂತಹ ಉಗ್ರ ಸಂಘಟನೆ ವಿರುದ್ಧ ಹೋರಾಡುವ ಇಚ್ಛಾಶಕ್ತಿಯ ಕೊರತೆಯನ್ನು ಬಯಲುಮಾಡುತ್ತದೆ ಎಂದು ತಿರುಗೇಟು ನೀಡಿದ್ದಾರೆ.

ಆರ್ ಎಸ್ ಎಸ್ ಸಂಘಟನೆಯನ್ನು ಉಗ್ರ ಸಂಘಟನೆಯೊಂದಿಗೆ ಹೋಲಿಸಿರುವ ಗುಲಾಂ ನಬಿ ಆಜಾದ್ ವಿರುದ್ಧ ಕಾನೂನು ಕ್ರಮದ ಮೊರೆ ಹೋಗುವುದಾಗಿ ಆರ್ ಎಸ್ ಎಸ್ ಹೇಳಿದೆ. ಇದೇ ವೇಳೆ ಗುಲಾಂ ನಬಿ ಆಜಾದ್ ತಮ್ಮ ಹೇಳಿಕೆಗೆ ಕ್ಷಮೆ ಯಾಚಿಸಬೇಕೆಂದು ಬಿಜೆಪಿ ಒತ್ತಾಯಿಸಿದೆ.