ಮಹಡಿ ಮೇಲಿಂದ ನಾಯಿ ಎಸೆದ ವಿಕೃತನ ಬಂಧನ, ಜಾಮೀನಿನ ಮೇಲೆ ಬಿಡುಗಡೆ

ಚೆನ್ನೈ: ಬಹುಮಹಡಿ ಕಟ್ಟಡದಿಂದ ಅಮಾನುಷವಾಗಿ ನಾಯಿಯನ್ನು ಎಸೆದ ಚೆನ್ನೈ ವಿದ್ಯಾರ್ಥಿಯನ್ನು ಬಂಧಿಸುವಲ್ಲಿ ತಮಿಳುನಾಡು ಪೊಲೀಸರು ಯಶಸ್ವಿಯಾಗಿದ್ದು, ಮಂಗಳವಾರ ತಡರಾತ್ರಿ ತಿರುನಲ್ವೇಲಿಯಲ್ಲಿ ಆರೋಪಿ ಗೌತಮ್ ಸುದರ್ಶನ್ ಎಂಬಾತನನ್ನು ಬಂಧಿಸಿದ್ದಾರೆ.

ಚೆನ್ನೈನ ಖಾಸಗಿ ವೈದ್ಯಕೀಯ ಕಾಲೇಜಿನಲ್ಲಿ ಅಂತಿಮ ವರ್ಷದ ವಿದ್ಯಾರ್ಥಿಯಾಗಿರುವ ಗೌತಮ್‌ ಸುದರ್ಶನ್‌, ಬಹುಮಹಡಿ ಕಟ್ಟಡದ ಮೇಲಿಂದ ನಾಯಿಯನ್ನು ಕೆಳಕ್ಕೆ ಎಸೆದಿದ್ದ. ಈತನ  ಸ್ನೇಹಿತ ಆಶಿಶ್‌ ಪಾಲ್‌ ನಾಯಿಯನ್ನು ಎಸೆಯುವ ದೃಶ್ಯವನ್ನು ತನ್ನ ಮೊಬೈಲ್ ನಲ್ಲಿ ಚಿತ್ರೀಕರಿಸಿಕೊಂಡು ಸಾಮಾಜಿಕ ಜಾಲತಾಣಕ್ಕೆ ಅಪ್ಲೋಡ್ ಮಾಡಿದ್ದ. ಇದೀಗ ಈ ವಿಡಿಯೋ ವೈರಲ್ ಆಗಿ ನಾಯಿ ಎಸೆದ ಆರೋಪಿಗಳನ್ನು ಬಂಧಿಸುವಂತೆ ಪ್ರಾಣಿ ದಯಾ ಸಂಘದಿಂದ ವ್ಯಾಪಕ ವಿರೋಧ ವ್ಯಕ್ತವಾಗಿತ್ತು.

ಈ ಹಿನ್ನಲೆಯಲ್ಲಿ ಕಾರ್ಯಾಚರಣೆ ನಡೆಸಿದ ಪೊಲೀಸರು, ತಿರುನಲ್ವೇಲಿಯಲ್ಲಿ ಆರೋಪಿ ಗೌತಮ್ ಸುದರ್ಶನ್ ಮತ್ತು ಕನ್ಯಾಕುಮಾರಿಯಲ್ಲಿ ಆಶಿಶ್‌ ಪಾಲ್‌ ನನ್ನು ಬಂಧಿಸಿದ್ದಾರೆ ಎಂದು ತಿಳಿದುಬಂದಿದೆ. ತಿರುನಲ್ವೇಲಿ ಮತ್ತು  ಕನ್ಯಾಕುಮಾರಿಯಲ್ಲಿ ಆರೋಪಿದಳ ಪೋಷಕರು ನೆಲೆಸಿದ್ದು, ಕಾಲೇಜು ಕಚೇರಿಯಿಂದ ದೂರವಾಣಿ ಸಂಖ್ಯೆ ಪಡೆದು ಪೊಲೀಸರು ಆರೋಪಿಗಳ ಪೋಷಕರನ್ನು ಸಂಪರ್ಕಿಸಿದ್ದಾರೆ. ಬಳಿಕ  ಆರೋಪಿಗಳು ಪೊಲೀಸರಿಗೆ ಶರಣಾಗಿದ್ದಾರೆ ಎಂದು ಹೇಳಲಾಗುತ್ತಿದೆ.

ಜಾಮೀನಿನ ಮೇಲೆ ಬಿಡುಗಡೆಯಾದ ಆರೋಪಿಗಳು
ಇನ್ನು ಬಂಧನವಾಗುತ್ತಿದ್ದಂತೆಯೇ ಬುಧವಾರ ಆರೋಪಿಗಳಿಬ್ಬರೂ ಜಾಮೀನಿನ ಮೇಲೆ ಬಿಡುಗಡೆಯಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.