ಸ್ಮೃತಿ ಇರಾನಿ ಅರ್ಧ ಶಿಕ್ಷಿತ ಸಚಿವೆ: ಕಾಂಗ್ರೆಸ್

ಹೈದರಾಬಾದ್: ಹೈದರಾಬಾದ್ ವಿಶ್ವವಿದ್ಯಾಲಯದಲ್ಲಿ ನಡೆದ ವಿದ್ಯಾರ್ಥಿ ಆತ್ಮಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೇಂದ್ರ ಸರ್ಕಾರದ ವಿರುದ್ಧ ಕಾಂಗ್ರೆಸ್ ಟೀಕಾ ಪ್ರಹಾರ ಮುಂದುವರೆದಿದ್ದು, ಕೇಂದ್ರ ಮಾನವ ಸಂಪನ್ಮೂಲ ಸಚಿವೆ ಸ್ಮೃತಿ ಇರಾನಿ ಅವರನ್ನು ಅರ್ಧ ಶಿಕ್ಷಿತ ಸಚಿವೆ ಎಂದು ಟೀಕಿಸಿದೆ.

ರೋಹಿತ್ ವಿಮುಲಾ ಆತ್ಮಹತ್ಯೆ ಪ್ರಕರಣ ಸಂಬಂಧ ಹೈದರಾಬಾದ್ ನಲ್ಲಿ ಸುದ್ದಿಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ಕಾಂಗ್ರೆಸ್ ವಕ್ತಾರ ಮಧು ಯಕ್ಷಿ ಗೌಡ್ ಅವರು, ತೀವ್ರ  ವಿವಾದಕ್ಕೀಡಾಗಿರುವ ವಿದ್ಯಾರ್ಥಿ ಆತ್ಮಹತ್ಯೆ ಪ್ರಕರಣವನ್ನು ಇತ್ಯರ್ಥಗೊಳಿಸುವ ಬದಲಿಗೆ ಸ್ಮೃತಿ ಇರಾನಿ ಅವರು ಸುಳ್ಳು ಹೇಳುವ ಮೂಲಕ ಮತ್ತಷ್ಟು ಜಟಿಲಗೊಳಿಸುತ್ತಿದ್ದಾರೆ. ಮೃತ ರೋಹಿತ್  ವೆಮುಲಾ ಪ್ರಕರಣವನ್ನು ಸೂಕ್ತ ರೀತಿಯಲ್ಲಿ ತನಿಖೆ ನಡೆಸುವ ಬದಲಿಗೆ ತಾವೇ ಸುಳ್ಳು-ಸುಳ್ಳು ವಾದಗಳನ್ನು ಮಾಡುತ್ತಾ ಪ್ರಕರಣದ ಹಾದಿ ತಪ್ಪಿಸುತ್ತಿದ್ದಾರೆ ಎಂದು ಹೇಳಿದರು.

ಅಲ್ಲದೆ ದಲಿತ ಪ್ರೊಫೆಸರ್ ಒಬ್ಬರು ಸಮಿತಿಯನ್ನು ಮುನ್ನಡೆಸುತ್ತಿದ್ದರು ಎಂಬ ಅವರ ವಾದವೇ ಶುದ್ಧ ಸುಳ್ಳು. ಪ್ರಮಾಣ ಪತ್ರಕ್ಕೂ ಪದವಿಗೂ ವ್ಯತ್ಯಾಸವೇ ತಿಳಿಯದ ಆರ್ಧ ಶಿಕ್ಷಿತ ಸಚಿವರಿಂದ  ಮತ್ತೇನು ನಿರೀಕ್ಷಿಸಲು ಸಾಧ್ಯ ಎಂದು ಮಧು ಯಕ್ಷಿ ಗೌಡ್ ಕಿಡಿಕಾರಿದರು. ಅಲ್ಲದೆ ಸ್ಮೃತಿ ಇರಾನಿ ಅವರು ಜವಾಬ್ದಾರಿಯುತ ಸ್ಥಾನದಲ್ಲಿದ್ದು, ರಾಷ್ಟ್ರವನ್ನು ತಪ್ಪುದಾರಿಗೆ ಎಳೆಯುತ್ತಿದ್ದಾರೆ. ಸುಳ್ಳು  ಸಾಕ್ಷಿಗಳನ್ನು ಹರಡುವ ಮೂಲಕ ಅದನ್ನೇ ನಿಜ ಎಂದು ಸಾಬೀತು ಪಡಿಸಲು ಮುಂದಾಗಿದ್ದಾರೆ ಎಂದು ಗೌಡ್ ಆರೋಪಿಸಿದರು.