ಕೇಂದ್ರ, ರಾಜ್ಯಗಳು ಭಾರತದ ಒಂದು ತಂಡವಾಗಿ ಕೆಲಸ ಮಾಡಬೇಕು: ಮೋದಿ

ನವದೆಹಲಿ: ಆರೋಗ್ಯಯುತ ಸ್ಪರ್ಧಾತ್ಮಕ ಅಭಿವೃದ್ಧಿಗಾಗಿ ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಒಟ್ಟಾಗಿ ಭಾರತದ ಒಂದು ತಂಡವಾಗಿ ಕೆಲಸ ಮಾಡಬೇಕೆಂದು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಬುಧವಾರ ಹೇಳಿದ್ದಾರೆ.

ರಾಷ್ಟ್ರಪತಿ ಭವನದಲ್ಲಿ ನಡೆದ ಗವರ್ನರ್ ಸಮ್ಮೇಳನಾಧಿವೇಶನದಲ್ಲಿ ಮಾತನಾಡಿರುವ ಅವರು, ದೇಶದಲ್ಲಿ ಸಹಕಾರಿ ಸಂಯುಕ್ತ ಬಹಳ ಮುಖ್ಯವಾಗಿದ್ದು, ಆರೋಗ್ಯಯುತ ಅಭಿವೃದ್ಧಿಗಾಗಿ ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಒಟ್ಟಾಗಿ ಒಂದು ತಂಡವಾಗಿ ಕೆಲಸ ಮಾಡಬೇಕಿದೆ ಹೇಳಿದ್ದಾರೆ.

ಇದೇ ವೇಳೆ ರಾಜ್ಯದ ರಾಜ್ಯಪಾಲರುಗಳ ಕುರಿತಂತೆ ಮಾತನಾಡಿರುವ ಅವರು, ರಾಜ್ಯಪಾಲರು ತಮ್ಮ ಅನುಭವಗಳನ್ನು ಉಪಯೋಗಿಸಿ ರಾಜ್ಯಗಳಲ್ಲಿ ವೇಗವರ್ಧಕ ಏಜೆಂಟ್ ಗಳಾಗಿ ಕೆಲಸ ಮಾಡಬೇಕಿದೆ. ವಿಶ್ವದಲ್ಲಿ ಭಾರತ ಪ್ರಮುಖ ಆರ್ಥಿಕತೆಯನ್ನು ಹೊಂದಿರುವ ದೇಶವಾಗಿದ್ದು, ಜಾಗತಿಕ ಆರ್ಥಿಕ ಬಿಕ್ಕಟ್ಟಿನ ಹೊರತಾಗಿಯೂ ಶಕ್ತಿಯುತವಾಗಿ ಮುಂದೆ ಸಾಗುತ್ತಿದೆ ಎಂದು ಹೇಳಿದ್ದಾರೆ.

ನಂತರ ಮಾತನಾಡಿದ ರಾಷ್ಟ್ರಪತಿ ಪ್ರಣಬ್ ಮುಖರ್ಜಿ ಅವರು, ರಾಜ್ಯಪಾಲರು ಯಾವುದೇ ನಿರ್ಧಾರಗಳನ್ನು ಕೈಗೊಳ್ಳಬೇಕಿದ್ದರೂ ಅದು ಸಂವಿಧಾನದ ಒಳಗೆ ಇರಬೇಕು. ಆ ನಿರ್ಧಾರಗಳು ಎಲ್ಲರಿಗೂ ಸರಿಯೆನಿಸುವಂತಿರಬೇಕು. ಸಂವಿಧಾನವನ್ನು ರಕ್ಷಿಸಿರುವ ಜವಾಬ್ದಾರಿಗಳು ರಾಜ್ಯಪಾಲರ ಮೇಲಿರುತ್ತದೆ. ಪ್ರಮುಖವಾಗಿ ಈಶಾನ್ಯ ಸರ್ಕಾರಗಳು ಈ ಬಗ್ಗೆ ಬಹಳ ಚುರುಕಾಗಬೇಕಿದೆ ಎಂದು ಹೇಳಿದ್ದಾರೆ.