ಸರ್ಕಾರದಿಂದ ಕಪ್ಪುಹಣಕ್ಕೆ ಉತ್ತೇಜನ: ಅಹ್ಮದ್ ಪಟೇಲ್

1000, 2000 ರೂ ಮುಖಬೆಲೆಯ ಎರಡೂ ನೋಟುಗಳನ್ನು ಪರಿಚಯಿಸಿರುವುದು ಎನ್ ಡಿಎ ಸರ್ಕಾರವೇ. ಗರಿಷ್ಠ ಮುಖಬೆಲೆಯ ನೋಟುಗಳನ್ನು ಪರಿಚಯಿಸುವ ಮೂಲಕ ಎನ್ ಡಿಎ ಸರ್ಕಾರ ಕಪ್ಪುಹಣಕ್ಕೆ ಉತ್ತೇಜನ ನೀಡುತ್ತಿದೆ ಎಂದು ಅಹ್ಮದ್ ಪಟೇಲ್ ಆರೋಪಿಸಿದ್ದಾರೆ. 

ನಾನು ಮಾಜಿ ಪ್ರಧಾನಿ ವಾಜಪೇಯಿ ಅವರನ್ನು ಗೌರವಿಸುತ್ತೇನೆ. 1978 ರಲ್ಲಿ 1000 ರೂ ಮುಖಬೆಲೆಯ ನೋಟು ನಿಷೇಧದ ನಿರ್ಧಾರ ಘೋಷಣೆಯಾದಾಗ ವಾಜಪೇಯಿ ಅವರು ನಿರ್ಧಾರದ ಭಾಗವಾಗಿದ್ದರು. ಆದರೆ ಅವರೇ ಪ್ರಧಾನಿಯಾದ ಬಳಿಕ 1000 ರೂ ಮುಖಬೆಲೆಯ ನೋಟುಗಳನ್ನು ಪುನಃ ಪರಿಚಯಿಸಿದರು. ವಾಜಪೇಯಿ ಅವರ ನಿರ್ಧಾರವನ್ನು ಮುಂದಿಟ್ಟುಕೊಂಡು ಅವರಿಗೆ ರಾಷ್ಟ್ರದ ಹಿತಾಸಕ್ತಿಗಿಂತ ಪಕ್ಷದ ಹಿತಾಸಕ್ತಿಯೇ ಮುಖ್ಯವಾಗಿತ್ತು ಎಂದು ಹೇಳಲು ಆಗುತ್ತದೆಯೇ ಎಂದು ಪರೋಕ್ಷವಾಗಿ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ತಿರುಗೇಟು ನೀಡಿದ್ದಾರೆ. 

ನೋಟು ನಿಷೇಧದ ವಿಷಯವಾಗಿ ಗದ್ದಲ ಉಂಟುಮಾಡಿ ಸಂಸತ್ ಕಲಾಪಕ್ಕೆ ಅಡ್ಡಿಪಡಿಸಿದ ಕಾಂಗ್ರೆಸ್ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದ ಪ್ರಧಾನಿ ನರೇಂದ್ರ ಮೋದಿ, ಕಾಂಗ್ರೆಸ್ ಗೆ ರಾಷ್ಟ್ರದ ಹಿತಾಸಕ್ತಿಗಿಂತ ಪಕ್ಷದ ಹಿತಾಸಕ್ತಿಯೇ ಮುಖ್ಯ ಎಂದಿದ್ದರು.