ಕಾಶ್ಮೀರ ಗಲಭೆ; ಕಣಿವೆ ರಾಜ್ಯಕ್ಕೆ ಪೆಟ್ರೋಲ್ ಸಾಗಣೆ ಸ್ಥಗಿತ!

ಶ್ರೀನಗರ: ಉಗ್ರ ಬುರ್ಹಾನ್ ವಾನಿ ಹತ್ಯೆ ಬಳಿಕ ಕಣಿವೆ ರಾಜ್ಯ ಕಾಶ್ಮೀರದಲ್ಲಿ ಭುಗಿಲೆದ್ದಿರುವ ಹಿಂಸಾಚಾರ ಸದ್ಯಕ್ಕೆ ನಿಲ್ಲುವ ಲಕ್ಷಣಗಳೇ ಗೋಚರಿಸುತ್ತಿಲ್ಲ. ಈ ನಡುವೆ ಕಣಿವೆ ರಾಜ್ಯಕ್ಕೆ  ಮತ್ತೊಂದು ಅಘಾತಾಕಾರಿ ಸುದ್ದಿ ಎದುರಾಗಿದ್ದು, ಇಂದಿನಿಂದಲೇ ಪೆಟ್ರೋಲ್ ಸಾಗಣೆ ಸ್ಥಗಿತ ಮಾಡಲಾಗಿದೆ.

ಮೂಲಗಳ ಪ್ರಕಾರ ಕಾಶ್ಮೀರದಲ್ಲಿ ನಡೆಯುತ್ತಿರುವ ಹಿಂಸಾಚಾರದಿಂದಾಗಿ ಪ್ರತಿಭಟನಾಕಾರರು ರಾಜ್ಯಕ್ಕೆ ಆಗಮಿಸುತ್ತಿರುವ ಪೆಟ್ರೋಲ್ ಟ್ಯಾಂಕರ್ ಗಳ ಮೇಲೆ ದಾಳಿ ಮಾಡುತ್ತಿದ್ದು,  ಇದರಿಂದಾಗಿ ಕಣಿವೆ ರಾಜ್ಯದ ಪೆಟ್ರೋಲ್ ಸಾಗಣೆ ವ್ಯವಸ್ಥೆ ಮೇಲೆ ಗಂಭೀರ ಪರಿಣಾಮ ಬೀರುತ್ತಿದೆ. ಪ್ರತಿಭಟನಾಕಾರರ ದಾಳಿಯಿಂದಾಗಿ ಹಲವು ಟ್ಯಾಂಕರ್ ಗಳು ಜಖಂಗೊಂಡಿದ್ದು, ಟ್ಯಾಂಕರ್  ಮಾಲೀಕರಿಗೆ ಸಾಕಷ್ಟು ನಷ್ಟವಾಗಿದೆ. ಈ ಹಿನ್ನಲೆಯಲ್ಲಿ ಟ್ಯಾಂಕರ್ ಮಾಲೀಕರು ಕಾಶ್ಮೀರದಲ್ಲಿ ಪೆಟ್ರೋಲ್ ಸಾಗಣೆಯನ್ನು ಸ್ಥಗಿತಗೊಳಿಸುವುದಾಗಿ ಘೋಷಣೆ ಮಾಡಿದ್ದಾರೆ.

ಕಾಶ್ಮೀರ ಪೆಟ್ರೋಲ್ ಟ್ಯಾಂಕರ್ ಮಾಲೀಕರ ಒಕ್ಕೂಟದ ಅಧ್ಯಕ್ಷ ಆನಂದ್ ಶರ್ಮಾ ಅವರು ತಿಳಿಸಿರುವಂತೆ, ಪ್ರತಿಭಟನಾಕಾರರು ಟ್ಯಾಂಕರ್ ಚಾಲಕರನ್ನು ಹಾಗೂ ಕ್ಲೀನರ್ ಗಳನ್ನು  ಮನಬಂದಂತೆ ಥಳಿಸುತ್ತಿದ್ದು, ಟ್ಯಾಂಕರ್ ಗಳ ಮೇಲೆ ಕಲ್ಲು ತೂರಾಟ ನಡೆಸುತ್ತಿದ್ದಾರೆ. ಇದರಿಂದಾಗಿ ಇಲ್ಲಿ ಕರ್ತವ್ಯ ನಿರ್ವಹಿಸುವುದೇ ದುಸ್ತರವೆನಿಸುತ್ತಿದೆ. ಇಂದಿನಿಂದಲೇ ಕಾಶ್ಮೀರದಲ್ಲಿ  ಪೆಟ್ರೋಲ್ ಟ್ಯಾಂಕರ್ ಗಳ ಸೇವೆ ಸ್ಥಗಿತಗೊಳ್ಳಲಿದೆ ಎಂದು ತಿಳಿದುಬಂದಿದೆ. ಹೀಗಾಗಿ ಪ್ರಸ್ತುತ ಹಿಂಸಾಚಾರದಲ್ಲಿ ನಲುಗುತ್ತಿರುವ ಕಾಶ್ಮೀರದಲ್ಲಿ ಪೆಟ್ರೋಲ್ ಭವಣೆ ಆರಂಭವಾಗಲಿದೆ ಎಂದು  ಹೇಳಲಾಗುತ್ತಿದೆ.