ಮದುಮಗನನ್ನು ಅನಾಮತ್ ಕೆಳಕ್ಕೆ ದೂಡಿದ ಪಾನಮತ್ತ ಕುದುರೆ

ಒಟ್ಟಾವ(ಕೆನಡಾ): ಭಾರತೀಯರು ಸಾಂಪ್ರದಾಯಿಕವಾಗಿ ಮದುಮಗನನ್ನು ಕುದುರೆಯ ಮೇಲೆ ಕುಳಿಸಿ ದಿಬ್ಬಣಕ್ಕೆ ಕರೆದುಕೊಂಡು ಹೋಗುವುದು ಒಂದು ಪದ್ಧತಿ. ಅದರಂತೆ ಕೆನಡಾದ ಒಟ್ಟಾವನಲ್ಲಿ ಸಿಖ್ ಸಂಪ್ರದಾಯಸ್ಥರು ವರನನ್ನು ಸಿಂಗರಿಸಿ ಪದ್ಧತಿಯಂತೆ ಕುದುರೆ ಮೇಲೆ ಕುಳಿಸಿದಾಗ ಅದು ವಾಯುವೇಗದಲ್ಲಿ ಓಡಿ ವರನನ್ನು ಕೆಳಕ್ಕೆ ದೂಡಿದೆ.

ಬ್ರಿಟಿಷ್ ಕೊಲಂಬಿಯಾದ ಸುರ್ರೆಯೇ ನಗರದಲ್ಲಿ ಮದುವೆ ದಿಬ್ಬಣಕ್ಕೆ ಹೋಗುವಾಗ ಈ ಘಟನೆ ನಡೆದಿದೆ. ಕುದುರೆ ಮೇಲಿದ್ದ ವರ ಅದರ ಆರ್ಭಟಕ್ಕೆ ಕಂಗಾಲಾಗಿ ಆತನ ಜಂಘಾಬಲವೇ ಉಡುಗಿ ಹೋಗಿತ್ತು. ಹಾಗು ಹೀಗೂ ಸ್ವಲ್ಪ ಸಮಯ ಕುದುರೆಯನ್ನು ಸುಧಾರಿಸಿದ ವರ ಅದರ ವೇಗಕ್ಕೆ ತತ್ತರಿಸಿ ಕೆಳಕ್ಕೆ ಬಿದ್ದಿದ್ದಾನೆ.

ಮದುಮಗನನ್ನು ಕುದುರೆ ಮೇಲೆ ಕುಳಿಸಿದಾಗ ಕುದುರೆ ಗರ ಗರನೇ ತಿರುಗಿದೆ. ಇದು ಸಾಮಾನ್ಯವೆಂದು ಕುದುರೆ ಮಾಲೀಕ ಅದನ್ನು ಪಳಗಿಸಿ ಬಿಟ್ಟು ಬಿಟ್ಟರು. ಆದರೆ ಅಮಲೇರಿದ್ದ ಕುದುರೆ ಒಂದೇ ಓಟಕ್ಕೆ ಮದುಮಗ ತನ್ನ ಶಾಲು ಹಾಗೂ ಪೇಟಾದೊಂದಿಗೆ ನೆಲಕ್ಕುರುಳಿದ್ದು ಸಂಬಂಧಿಕರು ಆತನ ಸಹಾಯಕ್ಕೆ ಧಾವಿಸಿದ್ದರು. ಕುದುರೆಗೆ ಯಾರೋ ಮತ್ತು ಬರಿಸುವ ಅಮಲು ಪದಾರ್ಥ ಕುಡಿಸಿದ್ದರು ಎಂದು ಮಾಧ್ಯಮದ ವರದಿ ತಿಳಿಸಿದೆ. ಅಂತೂ ಮದುಮಗ ಯಾವುದೇ ಪ್ರಾಣಾಪಾಯ ಸಂಭವಿಸದೆ ಪಾರಾಗಿರುವ ವೀಡಿಯೋ ಯೂಟ್ಯೂಬ್ ನಲ್ಲಿ ಹರಿದಾಡುತ್ತಿದೆ.

ಈ ಕುದುರೆಯನ್ನು ಹಲವಾರು ಮದುವೆ ಸಮಾರಂಭದಲ್ಲಿ ಉಪಯೋಗಿಸಲಾಗಿದ್ದು ಯಾವತ್ತೂ ಹೀಗಾಗಿರಲಿಲ್ಲ. ಇವತ್ತು ಏನಾಯ್ತು ಅಂತ ಗೊತ್ತಿಲ್ಲ' ಎಂದು ಕುದುರೆ ಮಾಲೀಕ ಅಭಿಪ್ರಾಯ ವ್ಯಕ್ತಪಡಿಸಿರುವುದಾಗಿ ಹಫಿಂಗ್ ಟನ್ ಫೋಸ್ಟ್ ಎಂದು ವರದಿ ಮಾಡಿದೆ.