ಐಸಿಸ್ ಬಳಿ ಚಿಕನ್ ಬಾಂಬ್

ಲಂಡನ್: ಉಗ್ರ ಚಟುವಟಿಕೆಗಳಲ್ಲಿ ಹೊಸ ಹೊಸ ವಿನಾಶಕ ಆವಿಷ್ಕಾರಗಳನ್ನು ನಡೆಸುತ್ತಿರುವ ಐಸಿಸ್ ಉಗ್ರರು ಇದೀಗ ಚಿಕನ್ ಬಾಂಬ್‍ಗಳನ್ನು ಕಂಡು ಹಿಡಿದಿದ್ದಾರೆ.

ಐಸಿಸ್ ಉಗ್ರರ ಬೆಂಬಲಿಗರು ಹಾಗೂ ವಿರೋಧಿಗಳು ಈ ಹೊಸ ಆವಿಷ್ಕಾರದ ಫೋಟೋಗಳನ್ನು ಸಾಮಾಜಿಕ ಜಾಲತಾಣ ಗಳಲ್ಲಿ ಹಾಗೂ ಅಧಿಕೃತ ವೆಬ್ ಸೈಟ್‍ಗಳಲ್ಲಿ ಪ್ರಕಟಿಸಿದ್ದಾರಾದರೂ, ಅದರ ಸತ್ಯಾಸತ್ಯತೆ ಇನ್ನೂ ಬಹಿರಂಗವಾಗಿಲ್ಲ. ಈ ಚಿಕನ್‍ಬಾಂಬ್‍ಗಳನ್ನು ``ಸೂಸೈಡ್ ಚಿಕನ್'' ಎಂಬ ಹೆಸರಿನಿಂದ ಕರೆಯಲಾಗುತ್ತಿದ್ದು, ಕೋಳಿಗಳಿಗೆ ಬೆಲ್ಟ್ ಕಟ್ಟಿ ಬಾಂಬ್ ಸಿಕ್ಕಿಸಿ ಅವುಗಳನ್ನು ಶತ್ರುಪಾಳಯದೊಳಕ್ಕೆ ಹಾರಿಬಿಡುವುದು ಉಗ್ರರ ತಂತ್ರ ಎಂದು ``ಡೈಲಿ ಮೇಲ್'' ವರದಿ ಮಾಡಿದೆ.

ಕೋಳಿಗಳು ಶತ್ರುಗಳ ಸಮೀಪಕ್ಕೆ ಹೋಗುವವರೆಗೂ ಗೊತ್ತಾಗುವುದಿಲ್ಲ. ಶತ್ರುಗಳ ಸಮೀಪಕ್ಕೆ ತೆರಳುತ್ತಿದ್ದಂತೆ ರಿಮೋಟ್ ಕಂಟ್ರೋಲ್ ಸಹಾಯದಿಂದ ಸ್ಪೋಟಿಸುವುದು ಅವರ ಯೋಜನೆ. ``ವಿನಾಶ ಮತ್ತು ಹತ್ಯೆ ನಡೆಸಲು ಐಸಿಸ್ ಏನನ್ನೂ ಮಾಡಲು ಸಿದ್ಧವಿದೆ. ಯುದ್ಧದಲ್ಲಿ ಪಕ್ಷಿಗಳ ಬಳಕೆ ಮಿಲಿಟರಿ ನಿಯಮಕ್ಕೆ ವಿರುದ್ಧ. ಆದರೆ ಐಸಿಸ್ ಕುತಂತ್ರದ ಮೂಲಕವಾದರೂ ಜನರನ್ನು ಕೊಲ್ಲಲು ಬಯಸುತ್ತದೆ'' ಎಂದು ಹೆಸರು ಬಹಿರಂಗಗೊಳಿಸದ ಬ್ರಿಟಿಷ್ ಸೈನಿಕನೊಬ್ಬ ಚಿಕನ್ ಬಾಂಬ್ ಆವಿಷ್ಕಾರದ ವಿರುದ್ಧಪ್ರತಿಕ್ರಿಯಿಸಿದ್ದಾನೆ.