ಯೋಧರಿಂದ ಉಗ್ರಗಾಮಿಗಳ ಹತ್ಯೆ: ಅಡಗುದಾಣ ನಾಶ

ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರದ ಕುಪ್ವಾರ ಜಿಲ್ಲೆಯಲ್ಲಿರುವ ಕೆರಾನ್ ವಲಯದಲ್ಲಿ ಗಡಿ ಭಾಗದಲ್ಲಿ ಭಾರತದೊಳಗೆ ನುಸುಳಲು ಯತ್ಮಿಸುತ್ತಿದ್ದ ಮೂವರು ಉಗ್ರರನ್ನು ಗಡಿ ಭದ್ರತಾ ಯೋಧರು ಕೊಂದುಹಾಕಿ ಅವರ ಅಡಗುದಾಣಗಳನ್ನು ನಾಶಪಡಿಸಿದ್ದಾರೆ.

ಕೆರಾನ್ ವಲಯದ ಗಡಿ ರೇಖೆಯ ಬೇಲಿ ಬಳಿ ಕಳೆದ ಮಧ್ಯರಾತ್ರಿ ಉಗ್ರರು ಒಳನುಸುಳಲು ಯತ್ನಿಸುತ್ತಿದ್ದರು.  ಭದ್ರತಾಪಡೆ ಯೋಧರು ಜಾಗೃತರಾದಾಗ ಉಗ್ರಗಾಮಿಗಳು ಸಹ ಬಂದೂಕು ಮೂಲಕ ದಾಳಿ ನಡೆಸಲು ಆರಂಭಿಸಿದರು.

ಗಂಟೆಗಳ ಕಾಲ ದಾಳಿ ಮುಂದುವರಿಯಿತು. ಕೊನೆಗೂ ಯೋಧರು ಸವಾಲನ್ನು ದಿಟ್ಟವಾಗಿ ಎದುರಿಸಿ ಮೂರು ಮಂದಿ ಉಗ್ರಗಾಮಿಗಳನ್ನು ಕೊಂದು ಅನೇಕ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಂಡಿದ್ದಾರೆ ಎಂದು ಹಿರಿಯ ಮಿಲಿಟರಿ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಕಾಶ್ಮೀರದಲ್ಲಿ ಕಳೆದ ಕೆಲ ದಿನಗಳಿಂದ ಮಂಜುಗಡ್ಡೆ ಕರಗಿ ನೀರಾಗುತ್ತಿರುವುದರಿಂದ ಗಡಿ ರೇಖೆಯೊಳಗೆ ನುಸುಳಿ ಬರುವ ಭಯೋತ್ಪಾದಕರ ಸಂಖ್ಯೆ ಹೆಚ್ಚಾಗುತ್ತಿದೆ. ಕುಪ್ವಾರ ಜಿಲ್ಲೆಯ ತಂಗ್ದಾರ್ ವಲಯದಲ್ಲಿ ಮೇ 25, ಮೇ 31 ಮತ್ತು ಜೂನ್ 6ರಂದು ಯೋಧರು ಉಗ್ರರ ಅಡಗುದಾಣಗಳನ್ನು ನಾಶಪಡಿಸಿದ್ದರು.