ಮತದಾರರ ಪಟ್ಟಿ ತಿದ್ದುಪಡಿಗೆ ಚುನಾವಣಾ ಆಯೋಗ ಕಸರತ್ತು

ನವದೆಹಲಿ: ಮತದಾರರ ಪಟ್ಟಿ ತಿದ್ದುಪಡಿ, ಹೊಸದಾಗಿ ಸೇರ್ಪಡೆ ಹಾಗೂ ಹೆಸರು ತೆಗೆದುಹಾಕಲು ಚುನಾವಣಾ ಆಯೋಗವು ರಾಷ್ಟ್ರೀಯ ಮಟ್ಟದ ದಾಖಲೆ ಪಟ್ಟಿಯೊಂದನ್ನು ಸಿದ್ಧಪಡಿಸಲು ನಿರ್ಧರಿಸಿದೆ.

ಈ ಮಾಹಿತಿಯನ್ನು ರಾಷ್ಟ್ರೀಯ ದಾಖಲೆ ಕೇಂದ್ರದಲ್ಲೂ ಆಯೋಗ ಸಂಗ್ರಹಿಸಿಡಲಿದೆ. ಇದಲ್ಲದೆ ಈ ರಾಷ್ಟ್ರೀಯ ದಾಖಲೆಯಿಂದಾಗಿ ಮತದಾರರಿಗೆ ಹೆಸರು ಹುಡುಕಾಟ, ಸಂಬಂಧಪಟ್ಟ ಬ್ಲಾಕ್ ಹಂತದ ಅಧಿಕಾರಿಯ ಹೆಸರು ತಿಳಿದುಕೊಳ್ಳುವುದು, ಕ್ಷೇತ್ರದ ಹೆಸರು ಮತ್ತು ಸಂಖ್ಯೆ ಹಾಗೂ ಮತದಾರರಿಗೆ ಸಂಬಂಧಿಸಿದ ಮಾಹಿತಿ ಪಡೆಯುವುದು ಸುಲಭವಾಗಲಿದೆ.

ಜತೆಗೆ, ಹೊಸದಾಗಿ ಹೆಸರು ನೋಂದಾಣಿ ಮಾಡಲು, ತಿದ್ದುಪಡಿ ಮತ್ತು ಹೆಸರು ತೆಗೆದುಹಾಕುವ ಸಂಬಂಧ ಅರ್ಜಿ ಸಲ್ಲಿಸಲೂ ಅನುಕೂಲವಾಗಲಿದೆ. ಮತದಾರರಿಗೆ ವಿವಿಧ ಸೇವೆ ಒದಗಿಸುವ ಏಕಗವಾಕ್ಷಿ ಸೇವೆ ಇದಾಗಲಿದೆ.