ರೈಲ್ವೆ ಅಭಿವೃದ್ಧಿಯಲ್ಲಿ ಇನ್ನು ರಾಜ್ಯಗಳೂ ಪಾಲುದಾರರು

ನವದೆಹಲಿ: ಕರ್ನಾಟಕ ಸೇರಿದಂತೆ ಹಲವು ರಾಜ್ಯಗಳ ರೈಲು ಮಾರ್ಗ ನಿರ್ಮಾಣ ಬೇಡಿಕೆ ಶೀಘ್ರದಲ್ಲೇ ಈಡೇರಲಿದೆ.

ಅದಕ್ಕಾಗಿ ಮೋದಿ ಸರ್ಕಾರ ರಾಜ್ಯಗಳನ್ನೇ ಯೋಜನೆಯಲ್ಲಿ ಸೇರ್ಪಡೆಗೊಳಿಸುವ ಪ್ರಸ್ತಾಪ ಮುಂದಿಟ್ಟಿದೆ. ಲೋಕಸಭೆಯಲ್ಲಿ ರೈಲ್ವೆ ಸಚಿವ ಸುರೇಶ್ ಪ್ರಭು ಈ ಘೋಷಣೆ ಮಾಡಿದ್ದಾರೆ. ಕಳೆದ ಹಲವು ವರ್ಷಗಳಲ್ಲಿ ಹಣಕಾಸಿನ ತೊಂದ ರೆಯಿಂದಾಗಿ ರಾಜ್ಯಗಳ ಬೇಡಿಕೆ ಪರಿಗಣಿಸಲು ಸಾಧ್ಯವಾಗಿರಲಿಲ್ಲ. ಅದಕ್ಕಾಗಿ ವಿಶೇಷ ಹಣಕಾಸು ವ್ಯವಸ್ಥೆ (ಸ್ಪೆಷಲ್ ಪರ್ಪಸ್ ವೆಹಿಕಲ್) ಅನ್ನು ರಚಿಸಲಾಗುತ್ತದೆ ಎಂದು ಅವರು ತಿಳಿಸಿದ್ದಾರೆ. ಈ ಮೂಲಕ ಪ್ರಾದೇಶಿಕ ಅಸಮತೋಲನ ನಿವಾರಿಸಲು ಮೋದಿ ನೇತೃತ್ವದ ಸರ್ಕಾರ ಬದ್ಧವಾಗಿದೆ ಎಂದರು.

ಅಲ್ಲದೇ, ರೈಲ್ವೆಯ ಯೋಜನೆಗಳನ್ನು ತಡೆಯಿಲ್ಲದೆ ಜಾರಿಗೊಳಿಸಲು ಬಹುಕೋಟಿ ಮೊತ್ತದ ಬಂಡವಾಳ ಬೇಕು ಎಂದಿದ್ದಾರೆ. ಲೋಕಸಭೆಯಲ್ಲಿ ರೈಲ್ವೆ ಬಜೆಟ್ ಚರ್ಚೆಯಲ್ಲಿ ಅವರು ಮಾತನಾಡಿದರು. ಮೋದಿ ಸರ್ಕಾರದ ರೈಲ್ವೆ ಬಜೆಟ್ ಜನ ಸಾಮಾನ್ಯರನ್ನು ಉದ್ದೇಶಿಸಿ ಮಂಡಿಸಲಾಗಿದೆ. ರೈಲ್ವೆ ಇಲಾಖೆ ಆಂತರಿಕವಾಗಿ ಹಣಕಾಸಿನ ಸಮಸ್ಯೆ ಎದುರಿಸುತ್ತಿದೆ. ವಿಶೇಷ ಹಣಕಾಸು ವ್ಯವಸ್ಥೆ ರಚಿಸುವ ಮೂಲಕ ಹೆಚ್ಚಿನ ಆದಾಯಗಳಿಸುವ ಗುರಿ ಹಾಕಿಕೊಳ್ಳಲಾಗಿದೆ.

ಈಗಾಗಲೇ ನೀಡಿರುವ ವಾಗ್ದಾನಗಳನ್ನು ಮುಂದಿನ 5 ವರ್ಷಗಳ ಅವಧಿಯಲ್ಲಿ ಈಡೇರಿಸುವ ನಿಟ್ಟಿನಲ್ಲಿ ಕಾರ್ಯತಂತ್ರ ರೂಪಿಸಲಾಗಿದೆ ಎಂದು ರೈಲ್ವೆ ಸಚಿವ ಸುರೇಶ್ ಪ್ರಭು ತಿಳಿಸಿದ್ದಾರೆ. ರೈಲು ನಿಲ್ದಾಣಗಳ ಅಭಿವೃದ್ಧಿ, ಮೂಲಸೌಕರ್ಯ ಅಭಿವೃದ್ಧಿಗಾಗಿ ಸೂಕ್ತ ಬಂಡವಾಳ ಬೇಕು. ಇಲಾಖೆಯಲ್ಲಿ ಅದರ ಕೊರತೆಯಿಂದಾಗಿ ಎಲ್ಲವೂ ಕುಂಟುತ್ತಾ ಸಾಗಿದೆ ಎಂದರು. ಬಜೆಟಿನಲ್ಲಿ ಘೋಷಿಸಿದ ಕ್ರಮಗಳಿಂದಾಗಿ ಇಲಾಖೆಗೆ ತೊಂದರೆಯಾಗಲಿದೆ ಎನ್ನುವ ಪ್ರತಿಪಕ್ಷಗಳ ವಾದವನ್ನು ಸುರೇಶ್ ಪ್ರಭು ತಿರಸ್ಕರಿಸಿದ್ದಾರೆ.