ವಾದ್ರಾ ಹೆಸರಲ್ಲಿ ಮಿತಿಗಿಂತಲೂ ಹೆಚ್ಚು ಭೂಮಿ

ನವದೆಹಲಿ: ಹರ್ಯಾಣದಲ್ಲಿ ಕಾಂಗ್ರೆಸ್ ಸರ್ಕಾರದ ಕೃಪಾಕಟಾಕ್ಷದಿಂದ ಬೇಕಾದಷ್ಟು ಭೂಮಿ ಕೊಂಡಿದ್ದಾರೆ ಎಂಬ ಆರೋಪ ಎದುರಿಸುತ್ತಿರುವ ರಾಬರ್ಟ್ ವಾದ್ರಾಗೆ ಹೊಸ ಸಂಕಷ್ಟ ಎದುರಾಗಿದೆ.

ಸೋನಿಯಾ ಅಳಿಯ ವಾದ್ರಾರ ಭೂಮಿಯ ದಾಖಲೆಗಳು ಸೋರಿಕೆಯಾಗಿದ್ದು, ಅವರು ಕಾನೂನಿನ ಮಿತಿಗಿಂತ ಹೆಚ್ಚು ಜಮೀನು ಹೊಂದಿರುವುದು ಬೆಳಕಿಗೆ ಬಂದಿದೆ. ಹರ್ಯಾಣದಲ್ಲಿ ವಾದ್ರಾ, ಅವರ ಕಂಪನಿಗಳು ಹಾಗೂ ಪತ್ನಿ ಪ್ರಿಯಾಂಕಾ ಗಾಂಧಿ ಹೆಸರಲ್ಲಿ ಬರೋಬ್ಬರಿ 146,755 ಎಕರೆ ಭೂಮಿಯಿದೆ.

ಆದರೆ ಕಾನೂನಿನ ಅನ್ವಯ ಒಬ್ಬ ವ್ಯಕ್ತಿ ಅಥವಾ ಆತನ ಕುಟುಂಬ 53.8 ಎಕರೆ ಭೂಮಿ ಹೊಂದಲಷ್ಟೇ ಅವಕಾಶವಿದೆ. ಈ ಬಗ್ಗೆ ಸೋರಿಕೆಯಾದ ದಾಖಲೆಗಳು ದೆಹಲಿ ಮೂಲದ ಆಂಗ್ಲ ದೈನಿಕ ಮೇಲ್ ಟುಡೇಗೆ ದೊರೆತಿದೆ. ಒಂದು ವೇಳೆ ವಾದ್ರಾ ವಿರುದ್ಧದ ಈ ಆರೋಪ ಸಾಬೀತಾದರೆ ಅವರಿಗೆ 2 ವರ್ಷ ಜೈಲು ಶಿಕ್ಷೆಯಾಗುವ ಸಾಧ್ಯತೆಯಿದೆ.

2010 ಮತ್ತು 2012ರೊಳಗೆ ವಾದ್ರಾ ಅವರು 82.2 ಎಕರೆ ಜಮೀನನ್ನು ಮಾರಾಟ ಮಾಡಿದ್ದಾರೆ. ಆದರೆ ಅವರು ಸಂಬಂಧಪಟ್ಟ ಅಧಿಕಾರಿಗಳಿಗೆ ಸಲ್ಲಿಸಲಾದ ಅಫಿಡವಿಟ್‌ನಲ್ಲಿ ಈ ವಿಚಾರ ಮುಚ್ಚಿಟ್ಟದ್ದಾರೆ ಎಂದು ವರದಿ ಹೇಳುತ್ತದೆ. ವಾದ್ರಾ ಕೊಂಡಿರುವ ಭೂಮಿ ಗುರ್‌ಗಾಂವ್ ಪರೀದಾಬಾದ್, ಮೇವತ್, ಪಲ್ವಾಲ್ ಜಿಲ್ಲೆಗಳಲ್ಲಿ ವ್ಯಾಪಿಸಿದೆ.