ಕೆಂಪೇಗೌಡ ವಿಮಾನ ನಿಲ್ದಾಣದ ನಿರ್ಬಂಧಿತ ಪ್ರದೇಶದಲ್ಲಿ ಬೃಹತ್ ಬಲೂನ್ ಹಾರಾಟ; ಆತಂಕ ಸೃಷ್ಟಿ, FIR ದಾಖಲು

ಬೆಂಗಳೂರು: ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ (ಕೆಐಎ) ನಿರ್ಬಂಧಿತ ಕಾರ್ಯಾಚರಣೆ ಪ್ರದೇಶದೊಳಗೆ ಜಾಹೀರಾತು ಉದ್ದೇಶಕ್ಕಾಗಿ ಬಳಸಲಾಗುವ ಬೃಹತ್ ಗಾತ್ರದ ಬಲೂನ್ ಅನ್ನು ಅನಧಿಕೃತವಾಗಿ ಹಾರಿಸಲಾಗಿದ್ದು, ಇದು ವಾಯುಯಾನ ಸುರಕ್ಷತಾ ಮಾನದಂಡಗಳ ಗಂಭೀರ ಉಲ್ಲಂಘನೆಯಾಗಿದೆ ಮತ್ತು ಭದ್ರತಾ ಕಳವಳಗಳನ್ನು ಉಂಟುಮಾಡಿದೆ ಎಂದು ಪೊಲೀಸರು ಸೋಮವಾರ ತಿಳಿಸಿದ್ದಾರೆ.

ಪೊಲೀಸರ ಪ್ರಕಾರ, ಈ ಘಟನೆ ಜನವರಿ 5 ರಂದು ನಡೆದಿದ್ದರೂ, ಕೇಂದ್ರ ಕೈಗಾರಿಕಾ ಭದ್ರತಾ ಪಡೆಯ (ಸಿಐಎಸ್‌ಎಫ್) ನ ವಾಯುಯಾನ ಭದ್ರತಾ ಗುಂಪಿನ (ಎಎಸ್‌ಜಿ) ಎಲ್. ನಾಗೇಂದ್ರನ್ ಅವರು ಫೆಬ್ರುವರಿ 8 ರಂದು ದೂರು ದಾಖಲಿಸಿದ್ದಾರೆ.

ಜನವರಿ 5 ರಂದು ಕೆಐಎ ಕಾರ್ಯಾಚರಣೆ ಪ್ರದೇಶದಲ್ಲಿ 'ಬಿಸಿಡಿ ಕನ್‌ಸ್ಟ್ರಕ್ಷನ್' ಎಂಬ ಹೆಸರಿನ ಬಲೂನ್ ಅನಧಿಕೃತವಾಗಿ ಹಾರುತ್ತಿರುವುದು ಕಂಡುಬಂದಿದೆ ಎಂದು ನಾಗೇಂದ್ರನ್ ದೂರಿನಲ್ಲಿ ತಿಳಿಸಿದ್ದಾರೆ.

ಇದನ್ನು ಗಮನಿಸಿದ ಎಎಸ್‌ಜಿ/ಬಿಡಿಡಿಎಸ್ ಸಿಬ್ಬಂದಿ ತಕ್ಷಣವೇ ಅದನ್ನು ತಡೆದು ಪರಿಶೀಲಿಸಿದ್ದಾರೆ.

ಪರಿಶೀಲನೆಯ ನಂತರ, 'BCD ಕನ್‌ಸ್ಟ್ರಕ್ಷನ್' ಎಂಬ ಹೆಸರನ್ನು ಹೊಂದಿರುವ ಬಲೂನ್ KIA ಯ ರೆಡ್ ಝೋನ್/ಹಾರಾಟ ನಿಷೇಧ ಪ್ರದೇಶದಲ್ಲಿ (DGCA ಮಾರ್ಗಸೂಚಿಗಳ ಪ್ರಕಾರ) ಇರುವುದು ಕಂಡುಬಂದಿದೆ' ಎಂದು ನಾಗೇಂದ್ರನ್ ಹೇಳಿದರು.

ವಿಮಾನ ನಿಲ್ದಾಣದ ನಿಷೇಧಿತ ಪ್ರದೇಶದಲ್ಲಿ ಬಲೂನ್ ಕಂಡುಬಂದಿದೆ. ಇದನ್ನು ನಾಗರಿಕ ವಿಮಾನಯಾನ ನಿರ್ದೇಶನಾಲಯ (DGCA) ಮಾನದಂಡಗಳ ಅಡಿಯಲ್ಲಿ ರೆಡ್ ಝೋನ್ ಎಂದು ಗೊತ್ತುಪಡಿಸಲಾಗಿದೆ. ಅಲ್ಲಿ ಯಾವುದೇ ಹಾರುವ ವಸ್ತುಗಳನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ ಎಂದು ದೂರಿದ್ದಾರೆ.

ವಿಮಾನ ನಿಲ್ದಾಣದ ನಿಷೇಧಿತ ಪ್ರದೇಶದೊಳಗೆ ಈ ಕೃತ್ಯವು ಡಿಜಿಸಿಎ ಮಾರ್ಗಸೂಚಿಗಳ ಉಲ್ಲಂಘನೆಯಾಗಿದೆ ಎಂದು ಎಫ್‌ಐಆರ್‌ನಲ್ಲಿ ತಿಳಿಸಲಾಗಿದೆ. ಈ ಸಂಬಂಧ ಪ್ರಕರಣ ದಾಖಲಿಸಲಾಗಿದ್ದು, ಹೆಚ್ಚಿನ ತನಿಖೆ ನಡೆಯುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.