ಬೆಂಗಳೂರು: ಸಾದಹಳ್ಳಿ ಜಂಕ್ಷನ್ ಓವರ್ ಪಾಸ್ ಅಂತಿಮಗೊಳಿಸಿದ ಎನ್ ಹೆಚ್ಎಐ, ಏರ್ ಪೋರ್ಟ್ ಮೇಟ್ರೋ ಮಾರ್ಗದ ಮೇಲೆ ಪರಿಣಾಮ ಇಲ್ಲ 

ಬೆಂಗಳೂರು: ಕೆಂಪೇಗೌಡ ಅಂತಾರಾಷ್ಟ್ರೀಯ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸುವ ಸಾದಹಳ್ಳಿ ಜಂಕ್ಷನ್ ನಲ್ಲಿ ಕೆಳಸೇತುವೆ ನಿರ್ಮಿಸುವ ಯೋಜನೆಯನ್ನು ಬದಲಾವಣೆ ಮಾಡಲಾಗಿದ್ದು, ಎನ್ ಹೆಚ್ಎಐ ಮೇಲ್ಸೇತುವೆ ನಿರ್ಮಿಸುವ ಯೋಜನೆಯನ್ನು ಅಂತಿಮಗೊಳಿಸಿದೆ.
 
ಕೆಐಎಯಿಂದ 7 ಕಿ.ಮೀ ದೂರದಲ್ಲಿರುವ ಸಾದಹಳ್ಳಿ ಜಂಕ್ಷನ್ ನಲ್ಲಿ ಈ ಮೇಲ್ಸೇತುವೆ ನಿರ್ಮಾಣವಾಗುವುದರಿಂದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮಾರ್ಗದಲ್ಲಿ ಸಂಚರಿಸುವ ಮಂದಿಗೆ ವಾಹನ ದಟ್ಟಣೆಯಿಂದ ರಿಲೀಫ್ ದೊರೆಯಲಿದೆ.
 
ಕೆಳಸೇತುವೆ ನಿರ್ಮಾಣಕ್ಕೆ 38 ಕೋಟಿ ರೂಪಾಯಿ ಖರ್ಚಾಗುತ್ತಿತ್ತು. ನಮ್ಮ ಹೊಸ ಯೋಜನೆಗೆ ಬಿಎಂಆರ್ ಸಿಎಲ್ ಸಹ ಒಪ್ಪಿಗೆ ಸೂಚಿಸಿದೆ ಹಾಗೂ 2-3 ತಿಂಗಳಲ್ಲಿ ಮೇಲ್ಸೇತುವೆ ನಿರ್ಮಾಣ ಕಾಮಗಾರಿ ಪ್ರಾರಂಭವಾಗಲಿದೆ. ಇಂತಹ ಯೋಜನೆಗಳು ಪೂರ್ಣಗೊಳ್ಲುವುದಕ್ಕೆ 2 ವರ್ಷಗಳಾದರೂ ಬೇಕು ಆದರೆ ನಾವು ಡಿಸೆಂಬರ್ 2024 ರ ವೇಳೆಗೆ ಪೂರ್ಣಗೊಳಿಸುವ ಗುರಿ ಹೊಂದಿದ್ದೇವೆ ಎಂದು ಎನ್ ಹೆಚ್ಎಐ ಹೇಳಿದೆ.

ಯೋಜನೆಗೆ ಹೊಸ ಟೆಂಡರ್ ಗಳನ್ನು ಕರೆಯುವ ಅಗತ್ಯವಿಲ್ಲ ಹಾಗೂ ಈ ಹಿಂದಿನಂತೆ ಅಂಥಾಂಗ್ ಇನ್ಫ್ರಾಸ್ಟ್ರಕ್ಚರ್ ಪ್ರೈವೆಟ್ ಲಿಮಿಟೆಡ್ ಕಾಮಗಾರಿಯನ್ನು ಪ್ರಾರಂಭಿಸಲಿದೆ.
 
ಹಿರಿಯ ಅಧಿಕಾರಿಯೊಬ್ಬರು ಈ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದು, ಓವರ್ ಪಾಸ್ 500 ಮೀಟರ್ ಗಳಷ್ಟು ಉದ್ದ ಇರಲಿದೆ. ವಾಹನ ಸಂಚಾರವನ್ನು ಸುಗಮಗೊಳಿಸಲು ಸಾಧ್ಯವಾಗುತ್ತದೆ ಎಂದು ಹೇಳಿದ್ದಾರೆ.