ಆರು ಮನೆಗಳಲ್ಲಿ ಲಕ್ಷ ರು. ಮೌಲ್ಯದ ಬ್ರ್ಯಾಂಡೆಡ್ ಶೂ ಕದ್ದ ಚಾಲಾಕಿ ಕಳ್ಳ

ಬೆಂಗಳೂರು: ಸುಮಾರು ಒಂದು ಲಕ್ಷ ರು. ಮೌಲ್ಯದ ಬ್ರ್ಯಾಂಡೆಡ್ ಶೂ ಮತ್ತು ಚಪ್ಪಲಿಗಳನ್ನು ಕಳ್ಳತನ ಮಾಡಿರುವ ಪ್ರಕರಣ ಬೆಂಗಳೂರಿನ ಕಸವನಹಳ್ಳಿ ಲೇಔಟ್ ನಲ್ಲಿ ನಡೆದಿದೆ.

ನಗರದ ಕಸವನಹಳ್ಳಿಯಲ್ಲಿರುವ ರಿಲಯಬಲ್ ಲೈಫ್ ಸ್ಟೈಲ್ ಲೇಔಟ್ ನಲ್ಲಿ ಈ ಪ್ರಕರಣ ಬೆಳಕಿಗೆ ಬಂದಿದ್ದು, ಬೆಳಗಿನ ಜಾವ 4-5 ಗಂಟೆಯೊಳಗೆ ಕಳ್ಳ ತನ್ನ ಕೈ ಚಳಕ ತೋರಿದ್ದಾನೆ.

ಆರು ಮನೆಗಳಲ್ಲಿ 4 ರಿಂದ 5 ಸಾವಿರ ರು ಬೆಲೆ ಬಾಳುವ ಸುಮಾರು 40 ಜೊತೆ ಶೂ ಮತ್ತು ಚಪ್ಪಲಿಗಳನ್ನು ಕದ್ದೊಯ್ದಿರುವುದು ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಸುಮಾರು 84 ಮನೆಗಳಿರುವ ಈ ಲೇಔಟ್ ನಲ್ಲಿ  30 ಕುಟುಂಬಗಳು ವಾಸಿಸುತ್ತಿವೆ. ಇನ್ನುಳಿದ ಮನೆಗಳು ನಿರ್ಮಾಣ ಹಂತದಲ್ಲಿದ್ದು ಸೆಕ್ಯೂರಿಟಿಯು ಉತ್ತಮವಾಗಿದೆ.

ರಮೇಶ್ ಎಂಬುವರ ಮನೆ ಮುಂದೆ ಬಿಟ್ಟಿದ್ದ ಬೆಲೆ ಬಾಳುವ ಒಂದು ಜೊತೆ ಶೂ ಮತ್ತು ಚಪ್ಪಲಿ ಕಾಣೆಯಾಗಿತ್ತು. ಈ ಸಂಬಂಧ ಅವರು ಚರ್ಚಿಸುತ್ತಿದ್ದಾಗಲೇ ಉಳಿದ ಆರು ಜನರು ಬಂದು ತಮ್ಮ ಮನೆಯಲ್ಲೂ ಬ್ರಾಂಡೆಡ್ ಶೂ ಮತ್ತು ಚಪ್ಪಲಿ ಕಳ್ಳತನ ವಾಗಿರುವ ಬಗ್ಗೆ ತಿಳಿಸಿದಾಗ ಪ್ರಕರಣ ಬೆಳಕಿಗೆ ಬಂದಿದೆ. ಈ ಸಂಬಂಧ ಎಚ್ ಎಸ್ ಆರ್ ಲೇಔಟ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದು, ಪೊಲೀಸರು ಸಿಸಿ ಟಿವಿ ಕ್ಯಾಮೆರಾ ವಶಕ್ಕೆ ತೆಗೆದು ಕೊಂಡು ಪರಿಶಿಲನೆ ನಡೆಸಿದ್ದಾರೆ.