ಸ್ಟೆಪ್ 1, ಸ್ಟೆಪ್ 2

ಬೇರೆಯವರಿಗಿಂತ ಚೆನ್ನಾಗಿ ಕಾಣಬೇಕು ಎಂದು ಯಾರೂ ಅಂದುಕೊಳ್ಳುವುದಿಲ್ಲ ಹೇಳಿ? ಆದರೂ ಕೆಲಸದ ನಡುವೆ ಆರೋಗ್ಯದಲ್ಲಿ ಸಮತೋಲನ ಕಂಡುಕೊಳ್ಳಲಾಗದೇ ಅಥವಾ ಊಟದಲ್ಲಿನ ಏರುಪೇರಿನಿಂದ ತೂಕ ಹೆಚ್ಚಾಗುತ್ತಿದೆ ಎಂದು ಬೇಜಾರಾಗಿದ್ದೀರಾ?
ಬೇಜಾರು ಬಿಟ್ಹಾಕಿ. ದಿನದಲ್ಲಿ ಕೇವಲ 3 ನಿಮಿಷ ಮಾಡುವ ಸುಲಭ ವ್ಯಾಯಾಮವೊಂದಿದೆ. ಅದಕ್ಕೆ ಶಾರ್ಟ್ ಬರ್ಸ್ಟ್ ಎಕ್ಸರ್ಸೈಜ್ ಎಂದು ಹೆಸರು. ಅಂದರೆ, ಮೆಟ್ಟಿಲುಗಳನ್ನು ಏರಿ ಇಳಿಯುವುದು. ಈ ವ್ಯಾಯಾಮವನ್ನು ದಿನದಲ್ಲಿ ಮೂರು ಬಾರಿ 30 ಸೆಕೆಂಡುಗಳ ಕಾಲ ಮಾಡಿದರೂ ಸಾಕು.
ಕೆಲವು ವಿವಿಗಳು ಈ ಬಗ್ಗೆ ಅಧ್ಯಯನ ಕೈಗೊಂಡು ಮೆಟ್ಟಿಲು ಹತ್ತುವುದರಿಂದ ಆಗುವ ಅನುಕೂಲಗಳನ್ನು ಕಂಡುಕೊಂಡಿವೆ. ಮನೆಯಲ್ಲಿರಬೇಕಾದರೆ ಮೆಟ್ಟಿಲುಗಳನ್ನು ಹತ್ತಿಳಿಯುವುದು, ರನ್ನಿಂಗ್ ಯಂತ್ರದಲ್ಲಿ ನಿರಂತರವಾಗಿ 30 ಸೆಕೆಂಡುಗಳ ಕಾಲ ಓಡುವುದಕ್ಕೆ ಸಮ. ಹೀಗೆ ಮಾಡುವುದರಿಂದ ತುಂಬಾ ಸಮಯ ತೆಗೆದುಕೊಂಡು ವಾರಪೂರ್ತಿ ಮಾಡುವ ದೀರ್ಘಾವಧಿಯ ವ್ಯಾಯಾಮದಷ್ಟೇ ಪರಿಣಾಮ ಬೀರುತ್ತದೆ. ಈ ವಿಷಯವನ್ನು ಕೆನಡದ ಬಯಾಲಜಿ ಸಿಸ್ಟಮ್ಸ್ ಪ್ರೊ. ಜಾಮಿ ಟಿಮ್ಮಾನ್ಸ್ ಖಚಿತಪಡಿಸಿದ್ದಾರೆ.
ಜಾಮಿ ಟಿಮ್ಮಾನ್ಸ್ ಮತ್ತು ಅವರ ತಂಡ ಕೆನಡಾ ಮತ್ತು ಬ್ರಿಟನ್ನ ನೂರಾರು ಅನ್ಫಿಟ್ ಮಧ್ಯ ವಯಸ್ಸಿನವರ ಮೇಲೆ 8 ವರ್ಷ ನಿರಂತರವಾಗಿ ಈ ವ್ಯಾಯಾಮವನ್ನು ಪ್ರಯೋಗಿಸಿ, ಈ ಸತ್ಯವನ್ನು ಕಂಡುಕೊಂಡಿದ್ದಾರೆ. ಹಂತಹಂತವಾಗಿ ಜಿಮ್ನಲ್ಲಿ ವ್ಯಾಯಾಮ ಮಾಡಿದಷ್ಟೇ ಉತ್ಸಾಹ, ಪರಿಣಾಮ ಮೆಟ್ಟಿಲು ಹತ್ತಿ ಇಳಿಯುವುದರಿಂದ ದೊರೆಯುತ್ತದೆ. ಫಿಟ್ನೆಸ್ ಮಾತ್ರವಲ್ಲದೆ ಆರೋಗ್ಯದಲ್ಲೂ ಸುಧಾರಣೆ ಕಂಡುಬರುತ್ತದೆ ಎನ್ನುವುದು ಈ ತಂಡದ ಅಧ್ಯಯನದ ಫಲಿತಾಂಶ.
ಇದರಿಂದ ಶ್ವಾಸಕೋಶ, ಹೃದಯ ಮತ್ತು ರಕ್ತನಾಳ ತೊಂದರೆಗಳು ನಿವಾರಣೆಯಾಗುತ್ತವೆ. ಹೆಚ್ಚು ಬಳಲದೆ, ಹಣ ವ್ಯಯ ಮಾಡದೆ ಹೆಚ್ಚಿನ ಲಾಭ ತಂದುಕೊಡುವ ಶಾರ್ಟ್ ಬರ್ಸ್ಟ್ ಎಕ್ಸ್ರ್ಸೈಜ್ನಿಂದ ಸಾಧ್ಯ ಎನ್ನುತ್ತಾರೆ ಟಿಮ್ಮಾನ್ಸ್. ಇದನ್ನು ವಿಜ್ಞಾನಿಗಳು ಪೂರ್ತಿಯಾಗಿ ಒಪ್ಪಿಕೊಂಡಿಲ್ಲ.

-ಎನ್.ಎಲ್. ಶಿವಮಾದು