ಮಟನ್ ಕೈಮಾ ಉಂಡೆ ಸಾರು

ಉಂಡೆಗೆ ಬೇಕಾಗುವ ಪದಾರ್ಥಗಳು...

• ಮಟನ್ ಕೈಮಾ- 500 ಗ್ರಾಂ
• ಮಟನ್ ಮೂಳೆ – 4 ಪೀಸ್‌
• ಕೊಬ್ಬರಿ - ಸ್ವಲ್ಪ
• ಉಪ್ಪು- ರುಚಿಗೆ ತಕ್ಕಷ್ಟು
• ಕಾಳು ಮೆಣಸು- ಸ್ವಲ್ಪ
• ದನಿಯಾಪುಡಿ- 1 ಚಮಚ
• ಅಚ್ಚ ಖಾರದ ಪುಡಿ- 1 ಚಮಚ
• ಬೆಳ್ಳುಳ್ಳು- ಸ್ವಲ್ಪ
• ಚಕ್ಕೆ, ಲವಂಗ- ಸ್ವಲ್ಪ
• ಗಸಗಸೆ- ಸ್ವಲ್ಪ
• ಮೊಟ್ಟೆ- 1
• ಹುರಿಗಡಲೆ-ಸ್ವಲ್ಪ

ಸಾರಿಗೆ ಬೇಕಾಗುವ ಪದಾರ್ಥಗಳು...

• ತೆಂಗಿನ ತುರಿ- ಒಂದು ಬಟ್ಟಲು
• ಈರುಳ್ಳಿ-1
• ಬೆಳ್ಳುಳ್ಳಿ-ಸ್ವಲ್ಪ
• ಚಕ್ಕೆ, ಲವಂಗ- ಸ್ವಲ್ಪ
• ಟೊಮೆಟೋ- ಒಂದು ಸಣ್ಣದ್ದು
• ಗಸಗಸೆ- ಸ್ವಲ್ಪ
• ಕೊತ್ತಂಬರಿ ಸೊಪ್ಪು- ಸ್ವಲ್ಪ
• ಎಣ್ಣೆ- ಸ್ವಲ್ಪ

ಮಾಡುವ ವಿಧಾನ... 

• ಮೊದಲಿಗೆ ಮೊಟ್ಟೆ ಹಾಗೂ ಹುರಿಗಡಲೆ ಬಿಟ್ಟು ಮೇಲೆ ತಿಳಿಸಿದ ಉಂಡೆಗೆ ಬೇಕಾದ ಎಲ್ಲಾ ಪದಾರ್ಥಗಳನ್ನು ನೀರು ಹಾಕದೆ ಮಿಕ್ಸಿ ಜಾರ್ ನಲ್ಲಿ ಪುಡಿ ಮಾಡಿಕೊಳ್ಳಬೇಕು. ನಂತರ ಇದಕ್ಕೆ ಒಂದು ಮೊಟ್ಟೆ ಹಾಕಿ ನುಣ್ಣಗೆ ರುಬ್ಬಿಕೊಳ್ಳಬೇಕು. ಹುರಿಗಡಲೆಯನ್ನು ಪುಡಿ ಮಾಡಿಟ್ಟುಕೊಳ್ಳಬೇಕು.
• ನಂತರ ಒಂದು ಪಾತ್ರೆಗೆ ಕೈಮಾ, ರುಬ್ಬಿಕೊಂಡ ಮಸಾಲೆಯನ್ನು, ಹುರಿಗಡಲೆ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿಕೊಂಡು ಸಣ್ಣ ಸಣ್ಣ ಉಂಡೆಗಳನ್ನಾಗಿ ಮಾಡಿಕೊಳ್ಳಬೇಕು.
• ನಂತರ ಕುಕ್ಕರ್'ನ್ನು ಒಲೆಯ ಮೇಲಿಟ್ಟು, ಸ್ವಲ್ಪ ಎಣ್ಣೆ ಹಾಕಿ ಕಾದ ನಂತರ ಈರುಳ್ಳಿ, ಅರಿಶಿನವನ್ನು ಹಾಕಿ ಕೆಂಪಗೆ ಹುರಿದುಕೊಳ್ಳಬೇಕು. ಬಳಿಕ ಮೂಳೆಗಳನ್ನು ಹಾಕಿ ಸ್ವಲ್ಪ ನೀರು, ಉಪ್ಪು ಹಾಕಿ ಚೆನ್ನಾಗಿ ಬೇಯಿಸಿಕೊಳ್ಳಬೇಕು.
• ಬಳಿಕ ಮಿಕ್ಸಿ ಜಾರ್'ಗೆ ಈ ಮೇಲೆ ಹೇಳಿದ ಸಾರಿನ ಮಸಾಲೆಗೆ ಬೇಕಾದ ಎಲ್ಲಾ ಪದಾರ್ಥಗಳನ್ನು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಬೇಕು. ಈ ರುಬ್ಬಿಕೊಂಡ ಮಸಾಲೆಯನ್ನು ಬೆಂದ ಮೂಳೆಗಳಿಗೆ ಹಾಕಿ. ಅಗತ್ಯಕ್ಕೆ ತಕ್ಕಷ್ಟು ನೀರು ಹಾಕಿ 10-10-15 ಕುದಿಯಲು ಬಿಡಬೇಕು. ಕುಡಿಯುತ್ತಿರುವ ಈ ಮಸಾಲೆಗೆ ಈಗಾಗಲೇ ಮಾಡಿಟ್ಟುಕೊಂಡ ಕೈಮಾ ಉಂಡೆಗಳನ್ನು ಹಾಕಿ 10-20 ನಿಮಿಷ ಬೇಯಿಸಿದರೆ ರುಚಿಕರವಾದ ಕೈಮಾ ಉಂಡೆ ಸಾರು ಸವಿಯಲು ಸಿದ್ಧ.