ಬಿಬಿಎಂಪಿ: ಬಿಜೆಪಿಗಿಲ್ಲ ಅಧಿಕಾರ

ಬೆಂಗಳೂರು: ಬಿಜೆಪಿ ಪಾಲಿಗೆ ಬಿಬಿಎಂಪಿ ಅಧಿಕಾರ ಇನ್ನು ದೂರ ದೂರ. ಬಿಬಿಎಂಪಿ ಚುನಾವಣೆಯಲ್ಲಿ ಅತ್ಯಧಿಕ ಸ್ಥಾನಗಳನ್ನು ಗೆದ್ದು ಬೀಗುತ್ತಿದ್ದ ಬಿಜೆಪಿ ಈಗ ಏಕಾಂಗಿ. ಅಧಿಕಾರ ಹಿಡಿಯಲು ಬಿಜೆಪಿಗೆ ಇದ್ದಂಥ ಎಲ್ಲಾ ದಾರಿಗಳೂ ಬಂದ್ ಆಗಿದ್ದು, ಅದಕ್ಕೀಗ ಉಳಿದಿರುವುದು ಪ್ರತಿಪಕ್ಷ ಸ್ಥಾನ ಮಾತ್ರ. ಹೀಗಾಗಿ ಪಕ್ಷದ ನಾಯಕರು ಇನ್ನೂ ಏನಾದರೂ ಮಾಡಲು ಸಾಧ್ಯವೇ ಎನ್ನುವ ನಿಟ್ಟಿನಲ್ಲಿ ಚಿಂತನೆ ಶುರು ಮಾಡಿದ್ದಾರೆ.

ಅಷ್ಟೇ ಅಲ್ಲ. ಕೊನೆಯ ಹಂತದಲ್ಲಿ ಏನಾದರೂ ಪ್ರಯತ್ನ ಮಾಡಲು ಸಾಧ್ಯವೇ ಎನ್ನುವ ಆಲೋಚನೆ ಪ್ರಾರಂಭವಾಗಿದೆ. ಬಿಬಿಎಂಪಿ ಚುನಾವಣೆಯ ಇಡೀ ರಂಗವನ್ನು ಕೇವಲ 14 ಸ್ಥಾನಗಳನ್ನು ಪಡೆ- ದಿರುವ ಜೆಡಿಎಸ್ ನಿರ್ಧರಿಸು-ವಂತಾಗಿದ್ದು ನಿಜಕ್ಕೂ ಅನಿರೀಕ್ಷಿತ. ಅದರಲ್ಲೂ ಬಿಜೆಪಿ 100 ಸದಸ್ಯರನ್ನು ಪಡೆದಿದ್ದರೂ, 76 ಸದಸ್ಯರ ಬಲದ ಕಾಂಗ್ರೆಸ್ ಪಕ್ಷೇತರ 6 ಮಂದಿಯನ್ನು ಹಿಡಿದಿಟ್ಟುಕೊಂಡಿದ್ದರೂ ಜೆಡಿಎಸ್ ನಿರ್ಧಾರವೇ ರಂಗವನ್ನು ಅಂತಿಮಗೊಳಿಸಬೇಕಾಯಿತು.

ಅಂದರೆ ಚುನಾವಣೆ ನಂತರದಲ್ಲಿ ಜೆಡಿಎಸ್‍ನ ರಾಜಕೀಯ ನಡೆಗಳನ್ನು ತಿಳಿಯುವಲ್ಲಿ ಸೋತಿದ್ದು ಕೂಡ ಬಿಜೆಪಿ ವೈಫಲ್ಯಕ್ಕೆ ಕಾರಣ. ಇದೆಲ್ಲದರಿಂದಾಗಿ ಪಕ್ಷೇತರರು ಅಥವಾ ಜೆಡಿಎಸ್ ನೆಚ್ಚಿಕೊಂಡು ಅಧಿಕಾರ ಹಿಡಿಯುವ ಬಿಜೆಪಿಯ ಆಸೆ ಸಂಪೂರ್ಣ ಕಮರಿ ಹೋಗಿದ್ದು, ಈಗ ಬಹುತೇಕ ಸೋಲು ಒಪ್ಪಿಕೊಳ್ಳುವ ಹಂತಕ್ಕೆ ಬಂದಿದೆ ಎಂಬುದು ಅವರದೇ ಪಕ್ಷದವರು ಹೇಳುವ ಮಾತು. ಇರುವ ಕೊನೆಯ ಐದಾರು ದಿನಗಳಲ್ಲಿ ಎದುರಾಳಿ ಪಕ್ಷಗಳಿಗೆ ಹೇಗಾದರೂ ಅಧಿಕಾರ ತಪ್ಪಿಸಲು ಸಾಧ್ಯವೇ ಎನ್ನುವ ಚಿಂತನೆಯೂ ನಡೆದಿದೆ. ಪಕ್ಷದ ಮುಖಂಡರು ಹಾಗೂ ಕೆಲವು ಪಾಲಿಕೆ ಸದಸ್ಯರು ನಾಮಕರಣ ಸದಸ್ಯರಿಗೆ ಮತ ಚಲಾಯಿಸುವ ಹಕ್ಕಿಲ್ಲ ಎನ್ನುವ ವಿಚಾರ ಮುಂದಿಟ್ಟುಕೊಂಡು ಹೈಕೋರ್ಟ್ ಮೆಟ್ಟಿಲೇರಿದ್ದಾರೆ. ಇದೇ ರೀತಿ ಸಾಧ್ಯವಿ ರುವ ಎಲ್ಲಾ ಕರಸತ್ತುಗಳನ್ನು ನಡೆಸಲು ಗುರುವಾರ ಮುಖಂಡರ ಸಭೆಯನ್ನೂ ನಡೆಸಲಿದೆ.