ವೃದ್ಧ ದಂಪತಿ ದರೋಡೆ: ಆರೋಪಿ ಸೆರೆ

ಬೆಂಗಳೂರು: ಕೆಲಸ ಮಾಡುತ್ತಿದ್ದ ಮನೆಯಲ್ಲೇ ವೃದ್ಧ ದಂಪತಿಯ ಕೈ ಕಾಲು ಕಟ್ಟಿ ಹಾಕಿ ಆಭರಣ ದೋಚಿ ಪರಾರಿಯಾಗಿದ್ದ ಅಡುಗೆ ಕೆಲಸದ ಆನಂದ್ ಬೆಹ್ರಾ ಎಂಬಾತನನ್ನು (27) ವಿದ್ಯಾರಣ್ಯಪುರ ಪೊಲೀಸರು ಒಡಿಶಾದಲ್ಲಿ ಬಂಧಿಸಿದ್ದಾರೆ.

ಎಚ್‍ಎಂಟಿ ಲೇಔಟ್‍ನ ಶ್ರೀನಿವಾಸ್ (75) ಹಾಗೂ ಜಯಲಕ್ಷ್ಮಿ (62) ದಂಪತಿ ಮನೆಯಲ್ಲಿ ಬಾಣಸಿಗನಾಗಿ ಆನಂದ ಕೆಲಸ ಮಾಡುತ್ತಿದ್ದ. ನ.4ರಂದು ಭುವನೇಶ್ವರದ ಸ್ನೇಹಿತ ಜಗನ್ ಜತೆ ಸೇರಿಕೊಂಡು ದರೋಡೆ ಮಾಡಿದ್ದ. ತಲೆಮರೆಸಿಕೊಂಡಿರುವ ಜಗನ್‍ಗಾಗಿ ಶೋಧ ಕಾರ್ಯ ನಡೆದಿದೆ ಎಂದು ಪೊಲೀಸರು ಹೇಳಿದ್ದಾರೆ.

ನ.4ರಂದು ನಸುಕಿನ ಜಾವ 3 ಗಂಟೆ ಸುಮಾರಿಗೆ ಜಗನ್‍ಗೆ ಕರೆ ಮಾಡಿದ್ದ ಆನಂದ್, ದರೋಡೆ ಸಂಚಿನ ಬಗ್ಗೆ ವಿವರಿಸಿ ಮನೆಗೆ ಕರೆಸಿಕೊಂಡಿದ್ದ. ಇಬ್ಬರು ಸೇರಿ ವೃದ್ಧ ದಂಪತಿ ಮಲಗಿದ್ದ ಕೋಣೆಗೆ ತೆರಳಿ ಬೆಡ್‍ಶೀಟ್‍ಗಳಿಂದ ಅವರ ಕೈ-ಕಾಲುಗಳನ್ನು ಕಟ್ಟಿ ಹಾಕಿ ತಲೆದಿಂಬುಗಳಿಂದ ವೃದ್ಧ ದಂಪತಿಯ ಉಸಿರುಗಟ್ಟಿಸಿದ್ದರು.

ಆಗ ಅವರು ಸತ್ತಂತೆ ನಟಿಸಿ ಜೀವ ಉಳಿಸಿಕೊಂಡಿದ್ದರು. ಇಬ್ಬರು ಮೃತಪಟ್ಟಿರಬಹುದೆಂದು ಭಾವಿಸಿದ ಆರೋಪಿಗಳು, ಮನೆಯೆಲ್ಲ ಹುಡುಕಾಡಿ ಆಭರಣ ಸಿಗದಿದ್ದಾಗ ಜಯಲಕ್ಷ್ಮಿ ಧರಿಸಿದ್ದ 70 ಗ್ರಾಂನ ಚಿನ್ನದ ಸರ ಹಾಗೂ ಎರಡು ಉಂಗುರುಗಳನ್ನು ಬಿಚ್ಚಿಕೊಂಡು ಪರಾರಿಯಾಗಿದ್ದರು ಎಂದು ಪೊಲೀಸರು ಹೇಳಿದ್ದಾರೆ. ಆರೋಪಿ ಆನಂದ್ ಬಳಸುತ್ತಿದ್ದ ಮೊಬೈಲ್ ಫೋನ್ ಸಿಡಿಆರ್ ಪರಿಶೀಲಿಸಿದಾಗ ಆತ ಒಡಿಶಾದ ಬನಾಸಿಯಾ ಗ್ರಾಮದಲ್ಲಿರುವುದು ಗೊತ್ತಾಯಿತು. ಅಲ್ಲಿಗೆ ತೆರಳಿದ ಪೊಲೀಸರ ತಂಡ ಆರೋಪಿಯನ್ನು ಬಂಧಿಸಿ ನಗರಕ್ಕೆ ಕರೆತಂದಿದೆ.