India vs Australia: ಆಸ್ಟ್ರೇಲಿಯಾ ತಂಡದಲ್ಲಿ ಭಾರತ ಮೂಲದ ಇಬ್ಬರಿಗೆ ಸ್ಥಾನ; ಟೀಂ ಇಂಡಿಯಾ ವಿರುದ್ಧವೇ ಕಣಕ್ಕೆ!

ಆಸ್ಟ್ರೇಲಿಯಾ ಕ್ರಿಕೆಟ್ ಸಂಸ್ಥೆ ಭಾರತೀಯ ಮೂಲದ ಇಬ್ಬರು ಯುವ ಆಟಗಾರರಿಗೆ ಗುಡ್ ನ್ಯೂಸ್ ನೀಡಿದ್ದು, ಭಾರತ ಮೂಲದ ಬ್ಯಾಟರ್ ಜರ್ಸಿಸ್ ವಾಡಿಯಾ ಮತ್ತು ಆಸ್ಟ್ರೇಲಿಯಾದ ಅಂಡರ್-19 ಆಟಗಾರ ಆರ್ಯನ್ ಶರ್ಮಾ ಅವರನ್ನು ವಿವಿಧ ತಂಡಗಳಿಗೆ ಆಯ್ಕೆ ಮಾಡಲಾಗಿದೆ.

ಆಗಸ್ಟ್ 6 ರಿಂದ 8ರ ವರೆಗೆ ಡಾರ್ವಿನ್‌ನಲ್ಲಿ ನಡೆಯಲಿರುವ ಮೂರು ದಿನಗಳ ಪಂದ್ಯದಲ್ಲಿ ಬಾಂಗ್ಲಾದೇಶ ಟೆಸ್ಟ್ ತಂಡವನ್ನು ಎದುರಿಸಲಿರುವ ಕ್ರಿಕೆಟ್ ಆಸ್ಟ್ರೇಲಿಯಾ ಇಲೆವೆನ್(CA XI) ತಂಡಕ್ಕೆ ವಾಡಿಯಾ ಆಯ್ಕೆಯಾಗಿದ್ದರೆ, ಕ್ರಿಕೆಟ್ ಆಸ್ಟ್ರೇಲಿಯಾ ಪಾಥ್‌ವೇ ತಂಡಕ್ಕೆ ಆರ್ಯನ್ ಶರ್ಮಾ ಅವರನ್ನು ಆಯ್ಕೆ ಮಾಡಲಾಗಿದೆ.

ವಿಕ್ಟೋರಿಯನ್ ಆಲ್‌ರೌಂಡರ್ ಆರ್ಯನ್ ಶರ್ಮಾ ಅವರನ್ನು ಭಾರತಕ್ಕೆ ಪ್ರವಾಸ ಹೋಗುವ ಆಸ್ಟ್ರೇಲಿಯಾ ಅಭಿವೃದ್ಧಿ ತಂಡದಲ್ಲೂ ಸೇರಿಸಿಕೊಳ್ಳಲಾಗಿದೆ.

ಶರ್ಮಾ ಅವರು ಐಸಿಸಿ ಅಂಡರ್-19 ಪುರುಷರ ಕ್ರಿಕೆಟ್ ವಿಶ್ವಕಪ್‌ನಲ್ಲಿ ಆಸ್ಟ್ರೇಲಿಯಾವನ್ನು ಪ್ರತಿನಿಧಿಸಿದ್ದರು ಮತ್ತು ಕಳೆದ ಋತುವಿನಲ್ಲಿ ಮೆಲ್ಬೋರ್ನ್ ಸ್ಟಾರ್ಸ್ ತಂಡದ ಭಾಗವಾಗಿದ್ದರು.

ಆಸ್ಟ್ರೇಲಿಯಾದ 18 ವರ್ಷದ ಆಟಗಾರ ಆರ್ಯನ್ ಶರ್ಮಾ ಅವರನ್ನು ಚೆನ್ನೈನ MRF ಅಕಾಡೆಮಿಯಲ್ಲಿ ನಡೆಯಲಿರುವ ಕಾರ್ಯಕ್ರಮಕ್ಕಾಗಿ ಆಸ್ಟ್ರೇಲಿಯಾ ಅಭಿವೃದ್ಧಿ ತಂಡಕ್ಕೆ ಆಯ್ಕೆ ಮಾಡಲಾಗಿದೆ. ವಿಕ್ಟೋರಿಯಾದ ಆಲ್‌ರೌಂಡರ್ ಆಗಿರುವ ಆರ್ಯನ್, ಆಗಸ್ಟ್ 5-6 ಮತ್ತು ಆಗಸ್ಟ್ 10-11 ರಂದು ಭಾರತದಲ್ಲಿ ನಡೆಯುವ ಎರಡು ದಿನಗಳ ಪಂದ್ಯಗಳಲ್ಲಿ ಆಡಲಿದ್ದಾರೆ.

ಆಸ್ಟ್ರೇಲಿಯಾದ ಮಾಜಿ ಕೋಚ್ ಟಿಮ್ ನೀಲ್ಸನ್ ಡಾರ್ವಿನ್‌ನಲ್ಲಿ CA XI ತಂಡವನ್ನು ಮುನ್ನಡೆಸಲಿದ್ದಾರೆ, ಆದರೆ ಟಿಮ್ ಪೈನ್ ಮತ್ತು ಆಂಥೋನಿ ಕ್ಲಾರ್ಕ್ ಚೆನ್ನೈನಲ್ಲಿ ತರಬೇತಿ ತಂಡವನ್ನು ನೋಡಿಕೊಳ್ಳುತ್ತಾರೆ.

ಆರ್ಯನ್ ಶರ್ಮಾ ಅವರು ನವೆಂಬರ್ 15, 2007 ರಂದು ಆಸ್ಟ್ರೇಲಿಯಾದ ಸಿಡ್ನಿ ನಗರದಲ್ಲಿ ಜನಿಸಿದರು. ಆದರೆ ಅವರ ತಂದೆ ಭಾರತೀಯರು. ಆರ್ಯನ್ ಬಾಲ್ಯದಿಂದಲೇ ಕ್ರಿಕೆಟ್ ಆಡುತ್ತಿದ್ದಾರೆ. 16ನೇ ವಯಸ್ಸಿನಲ್ಲಿ ಅವರು ಆಸ್ಟ್ರೇಲಿಯಾದ ಅಂಡರ್-19 ತಂಡಕ್ಕೆ ಪಾದಾರ್ಪಣೆ ಮಾಡಿದರು. ಅಂಡರ್-19 ವಿಶ್ವಕಪ್ ಇತಿಹಾಸದಲ್ಲಿ 300 ರನ್ ಗಳಿಸಿದ ಅತ್ಯಂತ ಕಿರಿಯ ಆಟಗಾರ ಎಂಬ ದಾಖಲೆ ಅವರದ್ದಾಗಿದೆ.

ಇನ್ನು ಮುಂಬೈನಲ್ಲಿ ಜನಿಸಿದ ಜರ್ಸಿಸ್ ವಾಡಿಯಾ, ತಮ್ಮ ಕ್ರಿಕೆಟ್ ವೃತ್ತಿಯನ್ನು ಭಾರತದ ಬರೋಡಾದಲ್ಲಿ ಆರಂಭಿಸಿದರು. ಅಲ್ಲಿ ಅವರು ಏಜ್ ಗ್ರೂಪ್ ಕ್ರಿಕೆಟ್ ಆಡುತ್ತಿದ್ದರು. ನಂತರ ಚಿಕ್ಕ ವಯಸ್ಸಿನಲ್ಲೇ ಆಸ್ಟ್ರೇಲಿಯಾಗೆ ಹೋದರು. ಅಲ್ಲಿ ಟೀ ಟ್ರೀ ಗಲ್ಲಿ ಕ್ರಿಕೆಟ್ ಕ್ಲಬ್‌ನ ಪರವಾಗಿ ಪ್ರೀಮಿಯರ್ ಕ್ರಿಕೆಟ್ ಆಡಿದರು. ಅವರ ಉತ್ತಮ ಪ್ರದರ್ಶನದಿಂದ ಅಡಿಲೇಡ್ ಸ್ಟ್ರೈಕರ್ಸ್ ಅಕಾಡೆಮಿಯಲ್ಲಿ ಸ್ಥಾನ ಪಡೆದರು. ಈಗ ಅವರು ಕ್ರಿಕೆಟ್ ಆಸ್ಟ್ರೇಲಿಯಾ ಇಲೆವೆನ್ ತಂಡದಲ್ಲಿ ಆಡುವ ಅವಕಾಶ ಪಡೆದಿದ್ದಾರೆ.