Duleep Trophy 2026: ಸೆಂಟ್ರಲ್ ಝೋನ್ ಮುನ್ನಡೆಸಲಿರುವ ರಜತ್ ಪಾಟೀದಾರ್; ಸೌತ್ ಝೋನ್ ನಾಯಕನಾಗಿ ತಿಲಕ್ ವರ್ಮಾ ನೇಮಕ!

ಚೆನ್ನೈ: ಮುಂಬರುವ ದುಲೀಪ್ ಟ್ರೋಫಿಯಲ್ಲಿ ಆರ್‌ಸಿಬಿ ನಾಯಕ ರಜತ್ ಪಾಟೀದಾರ್ 'ಸೆಂಟ್ರಲ್ ಝೋನ್' ತಂಡವನ್ನು ಮುನ್ನಡೆಸಲಿದ್ದು, ತಿಲಕ್ ವರ್ಮಾ ಅವರನ್ನು 'ಸೌತ್ ಝೋನ್' ತಂಡದ ನಾಯಕನನ್ನಾಗಿ ನೇಮಿಸಲಾಗಿದೆ. ಈ ವಲಯ ಮಟ್ಟದ ಪ್ರಥಮ ದರ್ಜೆ ಟೂರ್ನಿಯು ಆಗಸ್ಟ್ 23 ರಿಂದ ಸೆಪ್ಟೆಂಬರ್ 10 ರವರೆಗೆ ಬಿಸಿಸಿಐನ 'ಸೆಂಟರ್ ಆಫ್ ಎಕ್ಸಲೆನ್ಸ್'ನಲ್ಲಿ ನಡೆಯಲಿದೆ.

ಹೈದರಾಬಾದ್‌ನ ಬ್ಯಾಟರ್ ತಿಲಕ್ ವರ್ಮಾ 'ದಕ್ಷಿಣ' ತಂಡವನ್ನು ಮುನ್ನಡೆಸಲಿದ್ದು, ಆಂಧ್ರದ ಹಿರಿಯ ಬ್ಯಾಟರ್ ರಿಕ್ಕಿ ಭುಯಿ ಉಪನಾಯಕರಾಗಿ ಕಾರ್ಯನಿರ್ವಹಿಸಲಿದ್ದಾರೆ. ಇದೇ ತಂಡದಲ್ಲಿ ಕರ್ನಾಟಕದ ಹಿರಿಯ ಬ್ಯಾಟರ್ ಕರುಣ್ ನಾಯರ್ ಹಾಗೂ ಅವರ ರಾಜ್ಯ ತಂಡದ ಸಹ ಆಟಗಾರ ಆರ್. ಸ್ಮರಣ್ ಕೂಡ ಸ್ಥಾನ ಪಡೆದಿದ್ದಾರೆ. ಹೈದರಾಬಾದ್‌ನ ಕೆ. ಹಿಮತೇಜಾ ಕೂಡ ತಂಡದ ಭಾಗವಾಗಿದ್ದಾರೆ. ತಮಿಳುನಾಡಿನ ಎನ್. ಜಗದೀಶನ್ ಅವರನ್ನು ವಿಕೆಟ್ ಕೀಪರ್ ಆಗಿ ಆಯ್ಕೆ ಮಾಡಲಾಗಿದೆ.

ಸೆಂಟ್ರಲ್ ಝೋನ್ ತಂಡದಲ್ಲಿ ಉಪನಾಯಕರಾಗಿ ರಿಂಕು ಸಿಂಗ್ ಅವರನ್ನು ನೇಮಿಸಲಾಗಿದೆ ಮತ್ತು ಆಫ್-ಸ್ಪಿನ್ನರ್ ಸಾರಂಶ್ ಜೈನ್ ಅವರನ್ನು ಕೂಡ ತಂಡಕ್ಕೆ ಸೇರಿಸಿಕೊಳ್ಳಲಾಗಿದೆ. ಆದಾಗ್ಯೂ, ಆಗಸ್ಟ್ 27ರವರೆಗೆ ನಡೆಯಲಿರುವ ಶ್ರೀಲಂಕಾ ಪ್ರವಾಸದ ಭಾರತೀಯ ಟೆಸ್ಟ್ ತಂಡದಲ್ಲಿ ಜೈನ್ ಭಾಗವಾಗಿರುವುದರಿಂದ, ಅವರು ಟೂರ್ನಿಯ ಆರಂಭಿಕ ಹಂತವನ್ನು ತಪ್ಪಿಸಿಕೊಳ್ಳುವ ನಿರೀಕ್ಷೆಯಿದೆ.

ಆಫ್-ಸ್ಪಿನ್ ಆಲ್‌ರೌಂಡರ್ ವಾಷಿಂಗ್ಟನ್ ಸುಂದರ್ ಮೊದಲ ಪಂದ್ಯದಿಂದ ಹೊರಗುಳಿದಿರುವುದರಿಂದ, ಗಾಲೆಯಲ್ಲಿ ನಡೆಯಲಿರುವ ಪಂದ್ಯದಲ್ಲಿ ಜೈನ್ ತಮ್ಮ ಟೆಸ್ಟ್ ಪದಾರ್ಪಣೆ ಮಾಡುವ ಸಾಧ್ಯತೆಯಿದೆ. ಮೊದಲ ಟೆಸ್ಟ್ ಆಗಸ್ಟ್ 15 ರಂದು ಗಾಲೆಯ ಅಂತರರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಆರಂಭವಾಗಲಿದ್ದು, ಎರಡನೇ ಟೆಸ್ಟ್ ಆಗಸ್ಟ್ 23 ರಿಂದ ಕೊಲಂಬೊದಲ್ಲಿ ಪ್ರಾರಂಭವಾಗಲಿದೆ.

ದಕ್ಷಿಣ ವಲಯ: ತಿಲಕ್ ವರ್ಮಾ (ನಾಯಕ), ರಿಕಿ ಭುಯಿ (ಉಪನಾಯಕ), ಅಭಿನವ್ ತೇಜ್ರಾನಾ, ಎಸ್‌ಕೆ ರಶೀದ್, ಕೆ ಹಿಮತೇಜ, ಆರ್ ಸ್ಮರಣ್, ಎನ್ ಜಗದೀಸನ್, ಕರುಣ್ ನಾಯರ್, ಟಿ ತ್ಯಾಗರಾಜನ್, ಶ್ರೇಯಸ್ ಗೋಪಾಲ್, ಕೆ ಸಾಯಿ ತೇಜ, ಟಿ ವಿಜಯ್, ವಿ ಕಾವೇರಪ್ಪ, ಅಮನ್ ಖಾನ್.

ಕೇಂದ್ರ ವಲಯ: ರಜತ್ ಪಾಟೀದಾರ್ (ನಾಯಕ), ರಿಂಕು ಸಿಂಗ್ (ಉಪನಾಯಕ), ಆರ್ಯನ್ ಜುಯಲ್ (ವಿಕೆಟ್ ಕೀಪರ್), ಸಾರಾಂಶ್ ಜೈನ್, ಅಮನ್ ಮೊಖಾಡೆ, ಕುನಾಲ್ ಚಂಡೇಲಾ, ಜೀಶನ್ ಅನ್ಸಾರಿ, ಆರ್ಯನ್ ಪಾಂಡೆ, ಅರ್ಷದ್ ಖಾನ್, ಆಯುಷ್ ಪಾಂಡೆ, ಯಶ್ ರಾಥೋಡ್, ಹರ್ಷ್ ದುಬೆ, ಕುನಾಲ್ ಸಿಂಗ್ ರಾಥೋಡ್ (ವಿಕೆಟ್ ಕೀಪರ್), ಯಶ್ ಠಾಕೂರ್ ಮತ್ತು ನಚಿಕೇತ್ ಭೂಟೆ.

ಸ್ಟ್ಯಾಂಡ್-ಬೈ ಆಟಗಾರರು: ಅಮನ್‌ದೀಪ್ ಖರೆ, ಮಯಾಂಕ್ ಮಿಶ್ರಾ, ಸೌರಭ್ ರಾವತ್, ಭಾರ್ಗವ್ ಮೆರಾಯ್, ಕುನಾಲ್ ಯಾದವ್ ಮತ್ತು ಕುಮಾರ್ ಕಾರ್ತಿಕೇಯ.