ಪಾಕ್-ಆಫ್ಘನ್ ಪಂದ್ಯ: ಕ್ರೀಡಾಂಗಣದ ಹೊರಗೆ ಅಭಿಮಾನಿಗಳ ಮಾರಾಮಾರಿ!

ಲೀಡ್ಸ್: ಹೆಡಿಂಗ್ಲೇಯಲ್ಲಿ ಪಾಕಿಸ್ತಾನ ಮತ್ತು ಆಫ್ಘಾನಿಸ್ತಾನ ತಂಡಗಳ ನಡುವೆ ಪಂದ್ಯ ನಡೆಯುತ್ತಿದ್ದರೆ, ಅತ್ತ ಮೈದಾನದ ಹೊರಗೆ ಉಭಯ ದೇಶಗಳ ನಡುವಿನ ಅಭಿಮಾನಿಗಳು ಪರಸ್ಪರ ಮಾರಾಮಾರಿಯಲ್ಲಿ ತೊಡಗಿದ್ದ ಘಟನೆ ನಡೆದಿದೆ.

ಲೀಡ್ಸ್​ನಲ್ಲಿ ನಡೆದ ಪಾಕಿಸ್ತಾನ ಮತ್ತು ಅಫ್ಘಾನಿಸ್ತಾನ ನಡುವಿನ ಪಂದ್ಯದ ವೇಳೆ ಉಭಯ ತಂಡಗಳ ಅಭಿಮಾನಿಗಳು ಪರಸ್ಪರ ಬಡಿದಾಡಿಕೊಂಡಿರುವ ಘಟನೆ ನಡೆದಿದೆ. ಪಂದ್ಯ ನಡೆಯುತ್ತಿರುವ ಹೆಡಿಂಗ್ಲೆ, ಕ್ರೀಡಾಂಗಣದ ಹೊರಗಡೆ ಈ ಘಟನೆ ನಡೆದಿದ್ದು, ಸಾಮಾಜಿಕ ಜಾಲತಾಣದಲ್ಲಿ ಅಭಿಮಾನಿಗಳು ಹೊಡೆದಾಡಿಕೊಂಡಿರುವ ವಿಡಿಯೋ ಸಖತ್​ ವೈರಲ್​ ಆಗಿದೆ.

ಇನ್ನು ಪಾಕ್-ಆಫ್ಘನ್ ಅಭಿಮಾನಿಗಳ ಬಡಿದಾಟಕ್ಕೆ ಬಲೂಚಿಸ್ತಾನ ಘೋಷಣೆ ಕಾರಣ ಎನ್ನಲಾಗಿದೆ.  ಈ ಕುರಿತು ಬಲೂಚಿಸ್ತಾನ್ ಪರ ಘೋಷಣೆಗಳನ್ನ ಮತ್ತು ರಾಜಕೀಯ ಸಂದೇಶಗಳು ಹೊಂದಿರುವ ಅನಧಿಕೃತ ವಿಮಾನವೊಂದು ಲೀಡ್ಸ್ ಕ್ರೀಡಾಂಗಣದ ಮೇಲೆ ಹಾರಿತ್ತು. ಇದನ್ನು ಕಂಡ ಅಭಿಮಾನಿಗಳು ಗದ್ದಲವೆಬ್ಬಿಸುತ್ತಿದ್ದಂತೆ ಕಾರ್ಯ ನಿರತ ಸಿಬ್ಬಂದಿ ಅವರನ್ನ ಸ್ಟೇಡಿಯಂನಿಂದ ಹೊರಗೆ ಹಾಕಲು ಯತ್ನಿಸಿದ್ದಾರೆ. ಹೀಗೆ ಹೊರ ಹಾಕಲ್ಪಟ್ಟಿದ್ದ ಅಭಿಮಾನಿಗಳು ಅತಿಕ್ರಮಣವಾಗಿ ಮೈದಾನದ ಗೋಡೆ ಜಿಗಿದು, ಕ್ರೀಡಾಂಗಣ ಪ್ರವೇಶ ಮಾಡುತ್ತಿದ್ದರು. ಇದನ್ನು ಕಂಡ ಕೆಲ ಪಾಕಿಸ್ತಾನದ ಅಭಿಮಾನಿಗಳು ಇದಕ್ಕೆ ವಿರೋಧ ಪಡಿಸಿದ್ದಾರೆ. 

ಈ ವೇಳೆ ಉಭಯ ದೇಶಗಳ ಅಭಿಮಾನಿಗಳು ಪರಸ್ಪರ ಕೈಕೈ ಮಿಲಾಯಿಸಿದ್ದಾರೆ.