ಐಸಿಸಿ ವಿಶ್ವಕಪ್ 2019: ಬಾಂಗ್ಲಾ ಬಗ್ಗು ಬಡಿದ ಭಾರತ ಸೆಮೀಸ್ ಗೆ ಲಗ್ಗೆ!

ಇದಕ್ಕೂ ಮೊದಲು ಟಾಸ್ ಗೆದ್ದು ಬ್ಯಾಟಿಂಗ್ ಮಾಡಿದ ಭಾರತ ತಂಡಕ್ಕೆ ರೋಹಿತ್ ಶರ್ಮಾ (104 ರನ್) ಹಾಗೂ ಕೆಎಲ್ ರಾಹುಲ್ (77ರನ್) ಅದ್ಭುತ ಆರಂಭ ಒದಗಿಸಿದರು. ಬಳಿಕ ಕೊಹ್ಲಿ (26 ರನ್) ಜೊತೆಗೂಡಿದ ರಿಷಬ್ ಪಂತ್ (48 ರನ್) ಭರ್ಜರಿ ಆಟವಾಡಿದರೂ, ಕೇವಲ 2 ರನ್ ಗಳ ಅಂತರದಲ್ಲಿ ಅರ್ಧಶತಕ ಮಿಸ್ ಮಾಡಿಕೊಂಡರು. ಬಳಿಕ ಅಂತಿಮ ಹಂತದಲ್ಲಿ ಮಹೇಂದ್ರ ಸಿಂಗ್ (35 ರನ್) ತಂಡದ ಮೊತ್ತವನ್ನು 300ರ ಗಡಿ ದಾಟಿದರು. ಅಂತಿಮವಾಗಿ ಭಾರತ ತಂಡ ನಿಗದಿತ 50 ಓವರ್ ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 314ರನ್ ಗಳಿಸಿತು.

315 ರನ್ ಗಳ ಬೃಹತ್ ಗುರಿಯನ್ನು ಬೆನ್ನು ಹತ್ತಿದ ಬಾಂಗ್ಲಾದೇಶ ಆರಂಭದಿಂದಲೇ ನಿಯಮಿತವಾಗಿ ವಿಕೆಟ್ ಕಳೆದುಕೊಳ್ಳುತ್ತಾ ಹೋಯಿತು. 22 ರನ್ ಗಳಿಸಿದ್ದ ತಮೀಮ್ ಇಕ್ಬಾಲ್ ಶಮಿಗೆ ವಿಕೆಟ್ ಒಪ್ಪಿಸಿದರೆ, 33 ರನ್ ಗಳಿಸಿದ್ದ ಸೌಮ್ಯ ಸರ್ಕಾರ್ ಹಾರ್ದಿಕ್ ಪಾಂಡ್ಯಗೆ ಬಲಿಯಾದರು. ಬಳಿಕ ಬಂದ ಶಕೀಬ್ ಅಲ್ ಹಸನ್ ಅಕ್ಷರಶಃ ಭಾರತೀಯ ಬೌಲರ್ ಗಳನ್ನು ಕಾಡಿದರು. 74 ಎಸೆತಗಳನ್ನು ಎದುರಿಸಿದ ಶಕೀಬ್ 66ರನ್ ಗಳಿಸಿ ಭಾರತದ ಪಾಳಯದಲ್ಲಿ ಆಂತಕ ಮೂಡಿಸಿದರು. ಆದರೆ 34ನೇ ಓವರ್ ನಲ್ಲಿ ಹಾರ್ದಿಕ್ ಪಾಂಡ್ಯಾ ಬೌಲಿಂಗ್ ನಲ್ಲಿ ಶಕೀಬ್ ಔಟಾಗುವ ಮೂಲಕ ಬಾಂಗ್ಲಾ ಪಾಳಯದಲ್ಲಿ ಆಂತಕಕ್ಕೆ ಕಾರಣರಾದರು. 

ಆದರೂ ಪಟ್ಟು ಬಿಡದ ಬಾಂಗ್ಲಾದೇಶದ ಬಾಲಂಗೋಚಿ ಬ್ಯಾಟ್ಸಮನ್ ಗಳು ಎಲ್ಲಿಯೂ ಕೂಡ ತಂಡದ ರನ್ ರೇಟ್ ಕುಸಿಯದಂತೆ ನೋಡಿಕೊಂಡರು. ಸಬ್ಬೀರ್ ರೆಹಮಾನ್ (36 ರನ್) ಮತ್ತು ಮಹಮದ್ ಸೈಫುದ್ದೀನ್ ಕೊನೆಯವರೆಗೂ ಕ್ರೀಸ್ ನಲ್ಲಿ ನಿಂತು ಬಾಂಗ್ಲಾ ಗೆಲುವಿಗೆ ಹೋರಾಡಿದರು. ಆದರೆ 48ನೇ ಓವರ್ ಎಸೆದ ಭಾರತದ ಜಸ್ ಪ್ರೀತ್ ಬುಮ್ರಾ, ರುಬೆಲ್ ಹುಸೇನ್ ಮತ್ತು ಮುಸ್ತಫಿಜುರ್ ರೆಹಮಾನ್ ರನ್ನು ಔಟ್ ಮಾಡುವ ಮೂಲಕ ಬಾಂಗ್ಲಾ ಸೋಲಿಗೆ ಕಾರಣರಾದರು.

ಸೈಫುದ್ದೀನ್ 51ರನ್ ಗಳಿಸಿ ಅಜೇಯರಾಗಿ ಉಳಿದರು. ಇನ್ನು ಭಾರತದ ಪರ ಹಾರ್ದಿಕ್ ಪಾಂಡ್ಯಾ 3 ಮತ್ತು ಜಸ್ ಪ್ರೀತ್ ಬುಮ್ರಾ 4 ವಿಕೆಟ್ ಕಬಳಿಸಿದರೆ,  ಭುವನೇಶ್ವರ್ ಕುಮಾರ್, ಮಹಮದ್ ಶಮಿ ಮತ್ತು ಯಜುವೇಂದ್ರ ಚಹಲ್ ತಲಾ 1 ವಿಕೆಟ್ ಪಡೆದರು.