ಒಂದೇ ಒಂದು ಸೋಲಿನಿಂದ ಅಗ್ರಸ್ಥಾನ ಕಳೆದುಕೊಂಡ ಟೀಂ ಇಂಡಿಯಾ!

ಬೆಂಗಳೂರು: ಆಸ್ಟ್ರೇಲಿಯಾ ವಿರುದ್ದದ ಇಂದೋರ್ ಏಕದಿನ ಪಂದ್ಯದ ಬಳಿಕ ಅಗ್ರ ಸ್ಥಾನಕ್ಕೇರಿದ್ದ ಟೀಂ ಇಂಡಿಯಾ ಕೇವಲ ಒಂದೇ ಒಂದು ಸೋಲಿನಿಂದಾಗಿ ತನ್ನ ಅಗ್ರ ಸ್ಥಾನ ಕಳೆದುಕೊಂಡಿದೆ.

ಗುರುವಾರ ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ನಡೆದ ಆಸ್ಟ್ರೇಲಿಯಾ ವಿರುದ್ಧದ 4ನೇ ಪಂದ್ಯದಲ್ಲಿ ಭಾರತ 21 ರನ್‍ ಗಳಿಂದ ಸೋಲು ಕಂಡಿತ್ತು. ಇದರ ಬೆನ್ನಲ್ಲೇ ರ್ಯಾಂಕಿಂಗ್ ಪಟ್ಟಿ ಪರಿಷ್ಕರಣೆಯಾಗಿದ್ದ, ಟೀಂ ಇಂಡಿಯಾ ಏಕದಿನ  ರ್ಯಾಂಕಿಂಗ್‍ ನಲ್ಲಿ ಅಗ್ರಸ್ಥಾನವನ್ನು ಕಳೆದುಕೊಂಡಿದೆ. ಪಟ್ಟಿಯಲ್ಲಿ ಭಾರತಕ್ಕೆ ತೀವ್ರ ಪೈಪೋಟಿ ನೀಡತ್ತಿರುವ ದಕ್ಷಿಣ ಆಫ್ರಿಕಾ ತಂಡ 120 ಅಂಕಗಳೊಂದಿಗೆ ಮತ್ತೆ ಅಗ್ರ ಸ್ಥಾನ ಅಲಂಕರಿಸಿದ್ದು, ಭಾರತದ ಬಳಿ ಇದೀಗ 119  ಅಂಕಗಳಿವೆ.

ಭಾರತಕ್ಕೆ ಮತ್ತೆ ಅಗ್ರ ಸ್ಥಾನದ ಅವಕಾಶ
ಇನ್ನು ಭಾರತಕ್ಕೆ ಪಟ್ಟಿಯಲ್ಲಿ ಮತ್ತೆ ಅಗ್ರ ಸ್ಥಾನಕ್ಕೇರುವ ಅವಕಾಶವಿದ್ದು, ಇದೇ ಅಕ್ಟೋಬರ್ 1 ರಂದು ನಾಗ್ಪುರ ಪಂದ್ಯದ ಫಲಿತಾಂಶದ ಮೇಲೆ ಭಾರತದ ಅಗ್ರ ಸ್ಥಾನದ ಭವಿಷ್ಯ ಆಧಾರಿತವಾಗಿದೆ. ಅಂದಿನ ಪಂದ್ಯವನ್ನು ಗೆದ್ದರೆ  ಭಾರತ ಮತ್ತೆ ನಂಬರ್ 1 ಸ್ಥಾನಕ್ಕೇರಲಿದೆ. ಒಂದು ವೇಳೆ ಸೋತರೆ ದಕ್ಷಿಣ ಆಫ್ರಿಕಾ ಅಗ್ರಸ್ಥಾನದಲ್ಲಿ ಮುಂದುವರೆಯಲಿದೆ.