ಪಾಕ್ ದುರಭಿಮಾನಿಗಳಿಂದ ಸೌರವ್ ಗಂಗೂಲಿ ಕಾರಿಗೆ ತಡೆ!: ವಿಡಿಯೋ ವೈರಲ್

ಲಂಡನ್: ಇತ್ತ ಪಾಕಿಸ್ತಾನ ಮತ್ತು ಭಾರತ ದೇಶಗಳ ನಡುವಿನ ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಫೈನಲ್ ಪಂದ್ಯಕ್ಕೆ ಕ್ಷಣಗಣನೆ ಆರಂಭವಾಗಿರುವಂತೆಯೇ ಅತ್ತ ಪಾಕಿಸ್ತಾನ ದುರಭಿಮಾನಿಗಳ ದುಂಡಾವರ್ತನೆ ಕುರಿತ  ವರದಿಯೊಂದು ಬಹಿರಂಗವಾಗಿದೆ.

ಈ ಹಿಂದೆ ಸರಣಿಯ ಮೊದಲ ಸೆಮಿಫೈನಲ್ ಪಂದ್ಯದಲ್ಲಿ ಇಂಗ್ಲೆಂಡ್ ತಂಡವನ್ನು ಪಾಕಿಸ್ತಾನ ತಂಡ ಸೋಲಿಸಿದ ಬಳಿಕ ಮೈದಾನದ ಆವರಣದಲ್ಲಿ ಪಾಕಿಸ್ತಾನ ಅಭಿಮಾನಿಗಳ ಸಂಭ್ರಮಾಚರಣೆ ವಿವಾದಕ್ಕೆ ಕಾರಣವಾಗಿದ್ದು,  ಪಂದ್ಯದಲ್ಲಿ ವೀಕ್ಷಕ ವಿವರಣೆದಾರರಾಗಿದ್ದ ಗಂಗೂಲಿ ಅವರ ಕಾರನ್ನು ತಡೆದಿದ್ದಾರೆ. ಪಂದ್ಯ ಮುಕ್ತಾಯದ ಬಳಿಕ ಗಂಗೂಲಿ ತಮ್ಮ ಕಾರಿನಲ್ಲಿ ಮೈದಾನದಿಂದ ಹೊರಹೋಗುತ್ತಿದ್ದ ಸಂದರ್ಭದಲ್ಲಿ ಗಂಗೂಲಿ ಅವರ  ಕಾರನ್ನು ಅಡ್ಡಗಟ್ಟಿದ ಪಾಕಿಸ್ತಾನದ ದುರಭಿಮಾನಿಗಳು ಅವರ ಕಾರಿನ ಮೇಲೆ ಪಾಕಿಸ್ತಾನದ ಭಾವುಟ ಹಾಕಿ ತಡೆದಿದ್ದಾರೆ.

ಅಲ್ಲದೆ ಪಾಕಿಸ್ತಾನದ ಪರ ಘೋಷಣೆ ಕೂಗಿದ್ದು, ಗಂಗೂಲಿ ಅವರು ಕಾರು ಚಲಾಯಿಸದಂತೆ ತಡೆದಿದ್ದಾರೆ. ಈ ವೇಳೆ ಸ್ಥಳದಲ್ಲಿದ್ದ ಭದ್ರತಾ ಸಿಬ್ಬಂದಿ ಗಂಗೂಲಿ ಅವರ ನೆರವಿಗೆ ಧಾವಿಸಿದ್ದು, ಅವರ ಕಾರವ್ವು ಅಡ್ಡಗಟ್ಟಿದ್ದ ಪಾಕಿಸ್ತಾನ  ಅಭಿಮಾನಿಗಳನ್ನು ದೂರ ತಳ್ಳಿ ಕಾರು ಚಲಿಸಲು ಅನುವು ಮಾಡಿಕೊಟ್ಟಿದ್ದಾರೆ.

ಆದರೆ ಪಾಕಿಸ್ತಾನಿ ಅಭಿಮಾನಿಗಳ ದುಂಡಾವರ್ತನೆ ಹೊರತಾಗಿಯೂ ಕಾರಿನಲ್ಲಿದ್ದ ಸೌರವ್ ಗಂಗೂಲಿ ನಗುತ್ತಲೇ ಅಭಿಮಾನಿಗಳತ್ತ ಕೈ ಬೀಸಿ ಕಾರನ್ನು ಚಲಾಯಿಸಿಕೊಂಡು ಹೋಗಿದ್ದಾರೆ. ಘಟನೆಗೆ ಸಂಬಂಧಿಸಿದಂತೆ ಸೌರವ್  ಗಂಗೂಲಿ ಅವರು ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

ವಿಡಿಯೋಗಾಗಿ ಇಲ್ಲಿ ಕ್ಲಿಕ್ ಮಾಡಿ