'ವಿಜಯ್ ಜೊತೆಗೆ ತ್ರಿಶಾ ಸಾರ್ವಜನಿಕವಾಗಿ ಕಾಣಿಸಿಕೊಳ್ಳಬಾರದು'; ನಾನೇನಾದರೂ ಅವರ ಸ್ಥಾನದಲ್ಲಿದ್ದರೆ...: ಹಿರಿಯ ನಟಿ ಅಂಬಿಕಾ

ನಟ ಹಾಗೂ ತಮಿಳುನಾಡು ಮುಖ್ಯಮಂತ್ರಿ ವಿಜಯ್ ಮತ್ತು ನಟಿ ತ್ರಿಶಾ ಕೃಷ್ಣನ್ ಇತ್ತೀಚೆಗೆ ಸಾರ್ವಜನಿಕವಾಗಿ ಕಾಣಿಸಿಕೊಂಡಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತೊಮ್ಮೆ ಗಮನ ಸೆಳೆದಿದೆ. ಯುಕೆಯ ಸಿಲ್ವರ್‌ಸ್ಟೋನ್‌ನಲ್ಲಿ ನಡೆದ ಅಜಿತ್ ಕುಮಾರ್ ಅವರ 'ಲೆ ಮಾನ್ಸ್ ಕಪ್' (Le Mans Cup) ರೇಸ್‌ನಲ್ಲಿ ಇವರಿಬ್ಬರೂ ಒಟ್ಟಿಗೆ ಕಾಣಿಸಿಕೊಂಡರು; ಅಲ್ಲಿ ವಿಜಯ್ ಈ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು. ರೇಸ್ ವೀಕ್ಷಿಸುತ್ತಿರುವ ವಿಜಯ್ ಮತ್ತು ತ್ರಿಶಾ ಅವರ ವಿಡಿಯೋಗಳು ಹೊರಬಂದಿದ್ದು, ಮತ್ತೊಮ್ಮೆ ಚರ್ಚೆಗೆ ಕಾರಣವಾಗಿದೆ.

ಈ ಕುರಿತು ನಡೆಯುತ್ತಿರುವ ಚರ್ಚೆಯ ನಡುವೆ, ಹಿರಿಯ ನಟಿ ಅಂಬಿಕಾ ಅವರು ವಿಜಯ್ ಮತ್ತು ತ್ರಿಶಾ ಅವರ ಸ್ನೇಹದ ಬಗ್ಗೆ ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡಿದ್ದಾರೆ.

'ರೆಡ್‌ಪಿಕ್ಸ್' (RedPix) ವಾಹಿನಿಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ಅವರು, ಒಬ್ಬ ವ್ಯಕ್ತಿ ಉನ್ನತ ಸ್ಥಾನವನ್ನು ತಲುಪಿದ ಮಾತ್ರಕ್ಕೆ ಅವರ ಸ್ನೇಹಕ್ಕೆ ತಕ್ಷಣವೇ ಬೇರೊಂದು ಅರ್ಥವನ್ನು ಕಲ್ಪಿಸಬಾರದು. ಆದರೆ, ಪ್ರಮುಖ ಹುದ್ದೆಯಲ್ಲಿರುವ ಆಪ್ತ ಸ್ನೇಹಿತರ ಬಗ್ಗೆ ನಕಾರಾತ್ಮಕ ಟೀಕೆಗಳಿಗೆ ಎಡೆಮಾಡಿಕೊಡುವಂತಹ ಸನ್ನಿವೇಶಗಳನ್ನು ನಾನು ತಪ್ಪಿಸುತ್ತಿದ್ದೆ. 'ನಾನೇನಾದರೂ ತ್ರಿಶಾ ಅವರ ಸ್ಥಾನದಲ್ಲಿದ್ದು, ನಕಾರಾತ್ಮಕ ಟೀಕೆಗಳು ಬರಬಹುದು ಎಂದು ತಿಳಿದಿದ್ದರೆ, ನಾನು ಅವರೊಂದಿಗೆ ಹೋಗುತ್ತಿರಲಿಲ್ಲ. ಇದು ನನ್ನ ಅಭಿಪ್ರಾಯ. ನಾವು ಸ್ನೇಹಕ್ಕೆ ಬೆಲೆ ನೀಡಬೇಕು, ಆದರೆ ಅದೇ ಸಮಯದಲ್ಲಿ ಎಚ್ಚರಿಕೆಯಿಂದಲೂ ಇರಬೇಕು' ಎಂದು ಅವರು ಹೇಳಿದರು.

ಒಬ್ಬ ವ್ಯಕ್ತಿ ಉನ್ನತ ಸ್ಥಾನಕ್ಕೇರಿದರೆಂದ ಮಾತ್ರಕ್ಕೆ ಜನರು ಸ್ನೇಹವನ್ನು ಮುರಿದುಕೊಳ್ಳಲು ಸಾಧ್ಯವಿಲ್ಲ. ಇಬ್ಬರು ವ್ಯಕ್ತಿಗಳು ಸ್ನೇಹಿತರಾಗಿದ್ದಾಗ, ಅವರಲ್ಲಿ ಒಬ್ಬರು ಜೀವನದಲ್ಲಿ ಉನ್ನತ ಸ್ಥಾನವನ್ನು ತಲುಪಿದರೆ, ಆ ಸ್ನೇಹವನ್ನು ನಾವು ತಿರಸ್ಕರಿಸಲಾಗುವುದಿಲ್ಲ. ಅದಕ್ಕೆ ಬೇರೆಯದೇ ಅರ್ಥ ಕಲ್ಪಿಸಬಾರದು. ಅಂತಹ ಸಂದರ್ಭದಲ್ಲಿ ನಾವೇನು ​​ಮಾಡುತ್ತಿದ್ದೆವು ಎಂಬುದನ್ನು ಹೇಳಬಹುದೇ ಹೊರತು, ಇನ್ನೊಬ್ಬರು ಏನು ಮಾಡಬೇಕು ಅಥವಾ ಮಾಡಬಾರದು ಎಂದು ನಾವು ಹೇಳಲಾಗುವುದಿಲ್ಲ' ಎಂದರು.

ನಿರ್ದಿಷ್ಟ ಸ್ಥಳವೊಂದರಲ್ಲಿ ಸ್ನೇಹಿತರೊಂದಿಗೆ ತಾವು ಕಾಣಿಸಿಕೊಳ್ಳುವುದು ಅನಗತ್ಯ ಟೀಕೆಗಳಿಗೆ ಎಡೆಮಾಡಿಕೊಡಬಹುದಾದರೆ, ಅಲ್ಲಿಗೆ ಹೋಗದಿರುವುದನ್ನೇ ತಾವು ಆಯ್ಕೆ ಮಾಡಿಕೊಳ್ಳುತ್ತೇನೆ. ವಿಜಯ್ ಮತ್ತು ತ್ರಿಶಾ ಒಟ್ಟಿಗೆ ಕಾಣಿಸಿಕೊಳ್ಳುತ್ತಿರುವುದು ಆನ್‌ಲೈನ್‌ನಲ್ಲಿ ಸಾಕಷ್ಟು ಗಮನ ಸೆಳೆಯುತ್ತಿರುವ ಸಮಯದಲ್ಲೇ ಅವರ ಈ ಹೇಳಿಕೆಗಳು ಹೊರಬಂದಿವೆ.

ವಿಜಯ್ ಮತ್ತು ತ್ರಿಶಾ ದೀರ್ಘಕಾಲದ ವೃತ್ತಿಪರ ಒಡನಾಟವನ್ನು ಹೊಂದಿದ್ದಾರೆ; ಇದು 2004ರ 'ಗಿಲ್ಲಿ' ಚಿತ್ರದೊಂದಿಗೆ ಆರಂಭವಾಗಿ 'ತಿರುಪಾಚಿ' (Thirupaachi), 'ಆತಿ' (Aathi), 'ಕುರುವಿ' (Kuruvi) ಮತ್ತು 'ಲಿಯೋ' (Leo) ಮುಂತಾದ ಚಿತ್ರಗಳವರೆಗೆ ಮುಂದುವರೆದಿದೆ. ತೆರೆಯ ಹೊರಗೆ ಅವರು ಒಟ್ಟಿಗೆ ಕಾಣಿಸಿಕೊಳ್ಳುವುದು ಕೂಡ ಆಗಾಗ್ಗೆ ಅಭಿಮಾನಿಗಳಲ್ಲಿ ಚರ್ಚೆಯ ವಿಷಯವಾಗಿದೆ.

ಮೇ ತಿಂಗಳಲ್ಲಿ ನಡೆದ ವಿಜಯ್ ಅವರ ಪ್ರಮಾಣವಚನ ಸ್ವೀಕಾರ ಸಮಾರಂಭದಲ್ಲಿ ತ್ರಿಶಾ ಕಾಣಿಸಿಕೊಂಡಿದ್ದರು ಮತ್ತು ಅಲ್ಲಿ ಅವರು ವಿಜಯ್ ಅವರ ಕುಟುಂಬದೊಂದಿಗೆ ಬೆರೆತಿದ್ದರು. ಆಗಿನಿಂದಲೂ ಇಬ್ಬರ ಕುರಿತಾದ ವದಂತಿಗಳು ಹರಡುತ್ತಲೇ ಇವೆ. ತಮ್ಮ ಕುರಿತು ಹರಿದಾಡುತ್ತಿರುವ ಸಂಬಂಧದ ವದಂತಿಗಳನ್ನು ಈ ಇಬ್ಬರೂ ನಟರು ಸಾರ್ವಜನಿಕವಾಗಿ ದೃಢಪಡಿಸಿಲ್ಲ.