ರಾಕಿಂಗ್ ಸ್ಟಾರ್ ಬೆನ್ನಿಗೆ ನಿಂತ ಡಿವೈನ್ ಸ್ಟಾರ್: 'ವಿಭಿನ್ನ ಹಾದಿ ಹಿಡಿದ ಮಾತ್ರಕ್ಕೆ ಸಿನಿಮಾ ತಪ್ಪು ಹಾದಿಯಲ್ಲಿದೆ ಎಂದಲ್ಲ'; Yash ಸರ್ ನಿಮ್ಮ ಬದ್ಧತೆಗೆ ನಮ್ಮ ಸಲಾಂ- Rishab Shetty..!
ಒಬ್ಬ ಕಲಾವಿದನಾಗಿ ಪಾತ್ರವೊಂದನ್ನು ಮಾಡುವಾಗ, ಅದಕ್ಕೆ ಹೃದಯದ ಆಳದಿಂದ ಜೀವ ತುಂಬಲು ಪ್ರಯತ್ನಿಸುತ್ತೇವೆ. ಒಬ್ಬ ಪ್ರಭಾವಿ ವ್ಯಕ್ತಿಯ ಸಂಘರ್ಷಗಳನ್ನು ಈ ಚಿತ್ರದಲ್ಲಿ ತೋರಿಸಿರುವ ಬದ್ಧತೆಗೆ ನಾನು ಮನಸೋತಿದ್ದೇನೆ.
ಬೆಂಗಳೂರು: ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ‘ಟಾಕ್ಸಿಕ್’ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಧೂಳೆಬ್ಬಿಸುತ್ತಿದ್ದರೂ, ಮತ್ತೊಂದೆಡೆ ಕಥಾಹಂದರದ ವಿಚಾರವಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಮಿಶ್ರ ಪ್ರತಿಕ್ರಿಯೆಗಳನ್ನು ಎದುರಿಸುತ್ತಿದೆ.
ಇದರ ಬೆನ್ನಲ್ಲೇ ಸ್ಯಾಂಡಲ್‌ವುಡ್‌ನ ಪ್ರಮುಖ ನಟರು ಯಶ್ ಬೆಂಬಲಕ್ಕೆ ಧಾವಿಸುತ್ತಿದ್ದು, ಇದರಂತೆ ‘ಕಾಂತಾರ’ ಖ್ಯಾತಿಯ ಖ್ಯಾತ ನಟ-ನಿರ್ದೇಶಕ ರಿಷಬ್ ಶೆಟ್ಟಿ ಅವರು ಚಿತ್ರದ ಪರವಾಗಿ ಬ್ಯಾಟ್ ಬೀಸಿದ್ದಾರೆ.
ಈ ಕುರಿತು ಸಾಮಾಜಿಕ ಜಾಲತಾಣ ಟ್ವಿಟರ್ (X) ಖಾತೆಯಲ್ಲಿ ಸುದೀರ್ಘ ಪೋಸ್ಟ್ ಹಂಚಿಕೊಂಡಿರುವ ರಿಷಬ್ ಶೆಟ್ಟಿ, ‘ಟಾಕ್ಸಿಕ್’ ಒಂದು ಧೈರ್ಯಶಾಲಿ ಪ್ರಯೋಗ ಎಂದು ಕೊಂಡಾಡಿದ್ದಾರೆ.
ಕಥೆ ವಿಭಿನ್ನ ಹಾದಿಯಲ್ಲಿದೆ ಎಂದ ಮಾತ್ರಕ್ಕೆ ಸಿನಿಮಾ ತಪ್ಪು ಹಾದಿಯಲ್ಲಿದೆ ಎಂದರ್ಥವಲ್ಲ ಎಂದು ಅವರು ಚಿತ್ರತಂಡವನ್ನು ಬಲವಾಗಿ ಸಮರ್ಥಿಸಿಕೊಂಡಿದ್ದಾರೆ.
"ಒಬ್ಬ ಕಲಾವಿದನಾಗಿ ಪಾತ್ರವೊಂದನ್ನು ಮಾಡುವಾಗ, ಅದಕ್ಕೆ ಹೃದಯದ ಆಳದಿಂದ ಜೀವ ತುಂಬಲು ಪ್ರಯತ್ನಿಸುತ್ತೇವೆ. ಒಬ್ಬ ಪ್ರಭಾವಿ ವ್ಯಕ್ತಿಯ ಸಂಘರ್ಷಗಳನ್ನು ಈ ಚಿತ್ರದಲ್ಲಿ ತೋರಿಸಿರುವ ಬದ್ಧತೆಗೆ ನಾನು ಮನಸೋತಿದ್ದೇನೆ. ಬಹುಶಃ ಕಥಾವಸ್ತು ಮತ್ತು ಪಾತ್ರಗಳು ಎಂದಿನ ರೆಗ್ಯುಲರ್ ಶೈಲಿಯಲ್ಲಿಲ್ಲದಿರಬಹುದು. ಆದರೆ, ಆ ಕಾರಣಕ್ಕೆ ಈ ಚಿತ್ರದ ಹಾದಿ ತಪ್ಪಾಗಿದೆ ಎಂದು ಹೇಳಲು ಸಾಧ್ಯವಿಲ್ಲ. ಒಂದು ಆಲೋಚನೆಯನ್ನು ಬೆಳ್ಳಿಪರದೆಯ ಮೇಲೆ ತರುವವರೆಗಿನ ಸಿನಿಮಾ ಪಯಣ ಮತ್ತು ಶ್ರಮ ತುಂಬಾ ದೊಡ್ಡದಾಗಿರುತ್ತದೆ".
"ಯಶ್ ಸರ್, ಇಂತಹ ದೊಡ್ಡ ಚಿತ್ರದ ವಿಭಿನ್ನ ಜಗತ್ತಿಗೆ ನಿಮ್ಮನ್ನು ನೀವು ಸಂಪೂರ್ಣವಾಗಿ ಶರಣಾಗಿಸಿಕೊಂಡ ರೀತಿಗೆ ಹ್ಯಾಟ್ಸಾಫ್. ಪ್ರತಿ ದೃಶ್ಯದಲ್ಲೂ ನಿಮ್ಮ ಶ್ರಮ ಎದ್ದು ಕಾಣುತ್ತಿದೆ. ಕನ್ನಡ ಸಿನಿಮಾವನ್ನು ಜಾಗತಿಕ ವೇದಿಕೆಗೆ ಕೊಂಡೊಯ್ಯಲು ನೀವು ಹೊಂದಿರುವ ಬದ್ಧತೆಗೆ ನಾವು ನಿಮ್ಮನ್ನು ಪ್ರೀತಿಸುತ್ತೇವೆ" ಎಂದು ಹಾರೈಸಿದ್ದಾರೆ. ಅಲ್ಲದೆ, ನಿರ್ದೇಶಕಿ ಗೀತು ಮೋಹನ್‌ದಾಸ್ ಹಾಗೂ ಕೆವಿಎನ್ ಪ್ರೊಡಕ್ಷನ್ಸ್‌ಗೆ ಶುಭ ಕೋರಿದ್ದಾರೆ.
‘ಟಾಕ್ಸಿಕ್’ ಚಿತ್ರದ ಮೇಲಿನ ನೆಗೆಟಿವ್ ಕಮೆಂಟ್‌ಗಳ ವಿರುದ್ಧ ಇಡೀ ಕನ್ನಡ ಚಿತ್ರರಂಗವೇ ಒಗ್ಗಟ್ಟಿನಿಂದ ನಿಂತಿರುವುದು ವಿಶೇಷವಾಗಿದೆ.
ರಿಷಬ್ ಶೆಟ್ಟಿಗೂ ಮುನ್ನ ಸ್ಯಾಂಡಲ್‌ವುಡ್‌ನ ಹಿರಿಯ ನಟ ಉಪೇಂದ್ರ ಮತ್ತು ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಕೂಡ ಯಶ್ ಮತ್ತು ಅವರ ಸಿನಿಮಾವನ್ನು ಬಹಿರಂಗವಾಗಿ ಬೆಂಬಲಿಸಿ ಟ್ವೀಟ್ ಮಾಡಿದ್ದರು.
ಆಗಸ್ಟ್ 26, 2026 ರಂದು ಜಾಗತಿಕವಾಗಿ ಬಿಡುಗಡೆಯಾಗಿರುವ ಟಾಕ್ಸಿಕ್ ಚಿತ್ರದಲ್ಲಿ ನಯನತಾರಾ, ಕಿಯಾರಾ ಅಡ್ವಾಣಿ ಮತ್ತು ಹುಮಾ ಖುರೇಷಿ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ಪ್ರಸ್ತುತ ಚಿತ್ರ ಭರ್ಜರಿ ಕಲೆಕ್ಷನ್ ಮಾಡುತ್ತಿದ್ದು, ಚಿತ್ರರಂಗದ ಸ್ಟಾರ್‌ಗಳ ಒಗ್ಗಟ್ಟಿನಿಂದ ಚಿತ್ರ ಮತ್ತಷ್ಟು ಸದ್ದು ಮಾಡುತ್ತಿದೆ.
Follow KannadaPrabha channel on WhatsApp
Subscribe to KannadaPrabha YouTube Channel and watch Videos
Download the KannadaPrabha News app to follow the latest news updates
Subscribe and Receive exclusive content and updates on your favorite topics
Disclaimer : ಕಾಮೆಂಟ್‌ಗಳಲ್ಲಿ ವ್ಯಕ್ತಪಡಿಸಿದ ಅಭಿಪ್ರಾಯಗಳು ಅವುಗಳನ್ನು ಪೋಸ್ಟ್ ಮಾಡುವ ವ್ಯಕ್ತಿಯ ಸಂಪೂರ್ಣ ಜವಾಬ್ದಾರಿಯಾಗಿದೆ; ಅವು kannadaprabha.com ನ ಅಭಿಪ್ರಾಯಗಳನ್ನು ಪ್ರತಿಬಿಂಬಿಸುವುದಿಲ್ಲ. ಒಬ್ಬ ವ್ಯಕ್ತಿ, ಸಮುದಾಯ, ಧರ್ಮ ಅಥವಾ ದೇಶದ ವಿರುದ್ಧ ಅವಹೇಳನಕಾರಿ ಅಥವಾ ಅಶ್ಲೀಲವಾದ ಯಾವುದೇ ಕಾಮೆಂಟ್‌ಗಳು ಭಾರತ ಸರ್ಕಾರದ ಮಾಹಿತಿ ತಂತ್ರಜ್ಞಾನ ನೀತಿಯ ಅಡಿಯಲ್ಲಿ ಶಿಕ್ಷಾರ್ಹವಾಗಿವೆ. ಅಂತಹ ಕಾಮೆಂಟ್‌ಗಳ ವಿರುದ್ಧ ಸೂಕ್ತ ಕಾನೂನು ಕ್ರಮ ಕೈಗೊಳ್ಳಲಾಗುವುದು.