ಹಿನ್ನೋಟ 2020: ಕಿರುತೆರೆಯಲ್ಲಿ ಮಿಂಚಿ ಮರೆಯಾದ ಖ್ಯಾತ ಕಲಾವಿದರಿವರು!

ಹಳೆಯ ವರ್ಷದ ಖುಷಿಯ ಜೊತೆ ದುಃಖಗಳ ಭಾರವನ್ನೂ ಹೊತ್ತು ಹೊಸ ವರ್ಷಕ್ಕೆ ಅಡಿ ಇಡಬೇಕಾಗುತ್ತದೆ. ಕೆಲವರ ಸಾವು ಮನಸ್ಸಿಗೆ ಭಾರವೆನಿಸುತ್ತವೆ. ಸಾವು ಭಾವನಾತ್ಮಕವಾಗಿ ಸಮಾಜವನ್ನು ಅಲ್ಲಾಡಿಸಿ ಬಿಡುತ್ತದೆ. ಈ ವರ್ಷವಂತೂ ಹಲವು ಗಣ್ಯರು, ಸಾಧಕರ ಅಕಾಲಿಕ ನಿಧನ ಆಘಾತವನ್ನೇ ತಂದಿತು. 

ಎಷ್ಟೋ ಸಮಯ ಮಡುಗಟ್ಟಿದ ಶೋಕ ಹಾನಿಯ ತೀವ್ರತೆಗೆ ಸಾಕ್ಷಿಯಾಗಿತ್ತು. ಹೀಗೆ ಕಾಲದ ಕರೆಗೆ ಓಗೊಟ್ಟು ಹೊರಟವರು, ಉಳಿಸಿದ್ದು ಅಸಂಖ್ಯ ನೆನಪುಗಳನ್ನು. ಹೀಗೆ ಕಾಲದ ಕರೆಗೆ ಓಗೊಟ್ಟು ಹೊರಟ ಕಿರುತೆರೆ ಖ್ಯಾತ ಕಲಾವಿದರ ಮಾಹಿತಿ ಇಲ್ಲಿದೆ...

ಪದ್ಮನಾಭ್

ಕೆ.ಆರ್.ಪೇಟೆ ತಾಲೂಕಿನ ರಾಯನಸಮುದ್ರ ಗ್ರಾಮದ ನಿವಾಸಿಗಳು, ಪಂಚರಂಗಿ ಪಾಂಡು, ಉಘೇ ಉಘೇ ಮಹದೇಶ್ವರ ಸೇರಿದಂತೆ ಹಲವು ಧಾರವಾಹಿಗಳಲ್ಲಿ ಹಾಸ್ಯ ನಟರಾಗಿ ನಟಿಸಿದ್ದ ಕಿರುತೆರೆ ನಟ ಪದ್ಮನಾಭ್ ಅವರು ಅಕ್ಟೋಬರ್ 1 ರಂದು ಹೃದಯಾಘಾತದಿಂದ ಸಾವನ್ನಪ್ಪಿದ್ದರು. ಪದ್ಮನಾಭ್ ಅವರಿಗೆ 47 ವರ್ಷ ವಯಸ್ಸಾಗಿತ್ತು. 

ಸಿದ್ದರಾಜ್ ಕಲ್ಯಾಣ್‌ಕರ್

ಖ್ಯಾತ ಹಿರಿಯ ನಟ ಸಿದ್ದರಾಜ್ ಕಲ್ಯಾಣ್ಕರ್ ಸೆಪ್ಟೆಂಬರ್ 8 ರಂದು ಹೃದಯಾಘಾತದಿಂದ ಮೃತಪಟ್ಟಿದ್ದರು. ಸಿದ್ದರಾಜ್ ಕಲ್ಯಾಣ್ಕರ್ ಅವರಿಗೆ 60 ವರ್ಷ ವಯಸ್ಸಾಗಿತ್ತು. ಸಾಯುವ ಹಿಂದಿನದಿನದವರೆಗೂ ಅವರು ಶೂಟಿಂಗ್‌ನಲ್ಲಿ ಭಾಗಿಯಾಗಿದ್ದರು.

ಸುಶೀಲ್ ಗೌಡ

ಜೀವನದಲ್ಲಿ ಜಿಗುಪ್ಸೆಗೊಂಡು ಸ್ಯಾಂಡಲ್ ವುಡ್ ಕಿರುತೆರೆ ನಟ ನೇಣು ಬಿಗಿದುಕೊಂಡು ಜು.8 ರಂದು ಆತ್ಮಹತ್ಯೆಗೆ ಶರಣಾಗಿದ್ದರು. ಸುಶೀಲ್ ಗೌಡ ಅವರಿಗೆ 30 ವರ್ಷ ವಯಸ್ಸಾಗಿತ್ತು. 

ಹುಲಿವನ ಗಂಗಾಧರಯ್ಯ

ಕನ್ನಡ ಚಿತ್ರರಂಗ ಹಿರಿಯ ನಟ ಮತ್ತು ಕಿರುತೆರೆ ಪೋಷಕ ನಟರಾಗಿ ಕಾಣಿಸಿಕೊಳ್ಳುತ್ತಿದ್ದ ಹುಲಿವನ್ ಗಂಗಾಧರ್‌ ಅವರು ಜು.18 ರಂದು ವಿಧಿವಶರಾಗಿದ್ದರು. ಗಂಗಾಧರಯ್ಯ ಅವರು ಕೊರೊನಾ ವೈರಸ್ ಸೋಂಕಿಗೆ ತುತ್ತಾಗಿ ಬೆಂಗಳೂರಿನ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಇಹಲೋಕ ತ್ಯಜಿಸಿದ್ದರು. ಗಂಗಾಧರಯ್ಯ ಅವರಿಗೆ 70 ವರ್ಷ ವಯಸ್ಸಾಗಿತ್ತು. 

ಮೆಬಿನಾ ಮೈಕಲ್

ಖಾಸಗಿ ವಾಹಿನಿಯೊಂದರಲ್ಲಿ ಪ್ರಸಾರವಾಗುತ್ತಿದ್ದ ರಿಯಾಲಿಟಿ ಶೋನಲ್ಲಿ ಸ್ಪರ್ಧಿಸಿ ಖ್ಯಾತಿ ಗಳಿಸಿದ್ದ ವಿಜೇತೆ ಮೆಬಿನಾ ಮೈಕಲ್ ಅವರು ಅಪಘಾತದಿಂದಾಗಿ ಜೂನ್.3ರಂದು ಮೃತಪಟ್ಟಿದ್ದರು, ಮೆಬಿನಾ ಅವರಿಗೆ 22 ವರ್ಷ ವಯಸ್ಸಾಗಿತ್ತು. 

ಕೃಷ್ಣ ನಾಡಿಗ್

ಚಿತ್ರೀಕರಣವೊಂದರಲ್ಲಿ ತೊಡಗಿಕೊಂಡಿರುವಾಗಲೇ ಹೃದಯಾಘಾತ ಸಂಭವಿಸಿ ಖ್ಯಾತ ಕಿರುತೆರೆ ನಟ ಕೃಷ್ಣ ನಾಡಿಗ್ ಅವರು ಅಕ್ಟೋಬರ್ 18 ರಂದು ಮೃತಪಟ್ಟಿದ್ದರು. ಕೃಷ್ಣ ನಾಡಿಗ್ ಅವರಿಗೆ 60 ವರ್ಷ ವಯಸ್ಸಾಗಿತ್ತು. 

ರಾಕ್​ಲೈನ್​ ಸುಧಾಕರ್ 

ಕನ್ನಡ ಚಿತ್ರರಂಗದ ಹಾಸ್ಯ ನಟ ರಾಕ್​ಲೈನ್​ ಸುಧಾಕರ್ ಅವರು ಹೃದಯಾಘಾತದಿಂದ ಸೆಪ್ಟೆಂಬರ್ 24 ರಂದು ಮೃತಪಟ್ಟಿದ್ದರು. ಸುಧಾಕರ್ ಅವರಿಗೆ 65 ವರ್ಷ ವಯಸ್ಸಾಗಿತ್ತು.