ಟ್ರೇಲರ್ ಬಿಡುಗಡೆಗೆ ಸುದೀಪ್ ಮತ್ತು ಪೂರಿ ಜಗನ್ನಾಥ್?

ಬೆಂಗಳೂರು: ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ೫೩ನೆ ವಸಂತಕ್ಕೆ ಕಾಲಿಡಲಿದ್ದು ಅವರ ಅಭಿಮಾನಿಗಳು ಜನ್ಮದಿನ ಸಂಭ್ರಮಾಚರಣೆಗಳಿಗೆ ಸಿದ್ಧರಾಗುತ್ತಿದ್ದಾರೆ. ಕೆಲವು ಕಡೆ ದೈತ್ಯ ಕಟ್-ಔಟ್ ಗಳು ಎದ್ದು ನಿಲ್ಲುತ್ತಿದ್ದರೆ ನೆಲಮಂಗಲದ ಅಭಿಮಾನಿಗಳ ಸಂಘ ಜುಲೈ ೧೨ ರಂದು ನಟನ ಹುಟ್ಟುಹಬ್ಬಕ್ಕೆ ಬೇವಿನ ಗಿಡ ಹಂಚುವುದರ ಮೂಲಕ ಸಂಭ್ರಮಾಚರಣೆಗಳಿಗೆ ಚಾಲನೆ ನೀಡಲು ಮುಂದಾಗಿದೆ. ಇತ್ತ ಕನ್ನಡ ಚಿತ್ರರಂಗ ಶಿವಣ್ಣ ನಟನೆಯ ಶಿವಲಿಂಗ, ಕಿಲ್ಲಿಂಗ್ ವೀರಪ್ಪನ್ ಮತ್ತು ಮಾಸ್ ಲೀಡರ್ ಟ್ರೇಲರ್ ಬಿಡುಗಡೆಗೆ ಸಜಾಗುತ್ತಿದೆ.

ಮೂಲಗಳ ಪ್ರಕಾರ ಎಲ್ಲವೂ ಸರಿಬಂದರೆ ರಾಮ್ ಗೋಪಾಲ್ ವರ್ಮ ನಿರ್ದೇಶನದ ಕಿಲ್ಲಿಂಗ್ ವೀರಪ್ಪನ್ ಸಿನೆಮಾದ ಟ್ರೇಲರ್ ಅನ್ನು ನಟ ಸುದೀಪ್ ಬಿಡುಗಡೆ ಮಾಡಲಿದ್ದರಂತೆ. ಅಂದು ತೆಲುಗು ನಿರ್ದೇಶಕ ಪೂರಿ ಜಗನ್ನಾಥ್ ಕೂಡ ಉಪಸ್ಥಿತರಿರುತ್ತಾರೆ ಎಂದು ತಿಳಿದುಬಂದಿದೆ. ಇವರಿಬ್ಬರೂ ಆರ್ ಜಿ ವಿ ಅವರಿಗೆ ಹತ್ತಿರದ ಗೆಳೆಯರಾಗಿರುವುದರಿಂದ ಈ ವಿಶೇಷ ಕಾರ್ಯಕ್ರಮಕ್ಕೆ ಇಬ್ಬರನ್ನೂ ನಿರ್ದೇಶಕ ಆಹ್ವಾನಿಸಿದ್ದರಂತೆ.

ಕಿಲ್ಲಿಂಗ್ ವೀರಪ್ಪನ್ ಚಿತ್ರದ ಮತ್ತೊಂದು ವಿಶೇಷವೆಂದರೆ ನಾಯಕ ನಟ ಶಿವಣ್ಣನವರಿಗೆ ಪವರ್ ಸ್ಟಾರ್ ಪುನೀತ್ ರಾಜಕುಮಾರ್ ಕಂಠದಾನ ಮಾಡುತ್ತಿರುವುದು.