Stock Market: ಇರಾನ್ ಮೇಲೆ ಯುದ್ಧ ಸ್ಥಗಿತಗೊಳಿಸಿದ ಅಮೆರಿಕ; ಷೇರು ಮಾರುಕಟ್ಟೆ ಜಿಗಿತ

ಮುಂಬೈ: ಕತಾರ್, ಸೌದಿ ಅರೇಬಿಯಾ ಮತ್ತು ಯುಎಇಗಳ ಮನವಿಯ ಮೇರೆಗೆ ಇರಾನ್ ಮೇಲಿನ ಹೊಸ ದಾಳಿಗಳನ್ನು ತಾತ್ಕಾಲಿಕವಾಗಿ ನಿಲ್ಲಿಸಿದ್ದೇನೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿದ ನಂತರ, ಇಂದು ಮಂಗಳವಾರ ಆರಂಭಿಕ ವಹಿವಾಟಿನಲ್ಲಿ ಷೇರು ಮಾರುಕಟ್ಟೆಯ ಪ್ರಮುಖ ಸೂಚ್ಯಂಕಗಳು ಭಾರೀ ಏರಿಕೆ ಕಂಡವು.

ಮುಂಚೂಣಿ ಐಟಿ ಷೇರುಗಳಲ್ಲಿ ಖರೀದಿ, ಅದಾನಿ ಸಮೂಹದ ಕಂಪನಿಗಳ ಷೇರುಗಳ ಏರಿಕೆ ಹಾಗೂ ವಿದೇಶಿ ನಿಧಿಗಳ ಹರಿವು ಕೂಡ ಷೇರುಪೇಟೆಯ ಸಕಾರಾತ್ಮಕ ಪ್ರವೃತ್ತಿಗೆ ಬೆಂಬಲ ನೀಡಿದವು. ಸೋಮವಾರ ತಡ ಮಧ್ಯಾಹ್ನ ಟ್ರಂಪ್ ತಮ್ಮ Truth Social ಖಾತೆಯಲ್ಲಿ ಈ ಘೋಷಣೆ ಮಾಡಿದರು.

ಕತಾರ್‌ನ ಎಮೀರ್ ತಮೀಮ್ ಬಿನ್ ಹಮದ್ ಅಲ್ ಥಾನಿ, ಸೌದಿ ಅರೇಬಿಯಾದ ಕ್ರೌನ್ ಪ್ರಿನ್ಸ್ ಮೊಹಮ್ಮದ್ ಬಿನ್ ಸಲ್ಮಾನ್ ಅಲ್ ಸೌದ್ ಹಾಗೂ ಯುನೈಟೆಡ್ ಅರಬ್ ಎಮಿರೇಟ್ಸ್ ಅಧ್ಯಕ್ಷ ಮೊಹಮ್ಮದ್ ಬಿನ್ ಜಾಯೆದ್ ಅಲ್ ನಹ್ಯಾನ್ ಅವರು ಇರಾನ್ ಇಸ್ಲಾಮಿಕ್ ಗಣರಾಜ್ಯದ ಮೇಲೆ ಯೋಜಿಸಿದ್ದ ಸೇನಾ ದಾಳಿಯನ್ನು ತಾತ್ಕಾಲಿಕವಾಗಿ ನಿಲ್ಲಿಸುವಂತೆ ನನ್ನನ್ನು ಮನವಿ ಮಾಡಿದ್ದಾರೆ ಎಂದು ಟ್ರಂಪ್ ಹೇಳಿದ್ದಾರೆ.

ನಾವು ಇರಾನ್ ಮೇಲೆ ಬಹಳ ದೊಡ್ಡ ದಾಳಿಗೆ ಸಿದ್ಧರಾಗಿದ್ದೆವು. ಆದರೆ ನಾನು ಅದನ್ನು ಸ್ವಲ್ಪ ಸಮಯಕ್ಕೆ ಮುಂದೂಡಿದ್ದೇನೆ. ಸಾಧ್ಯವಾದರೆ ಶಾಶ್ವತವಾಗಿ, ಇಲ್ಲವಾದರೆ ಸ್ವಲ್ಪ ಸಮಯಕ್ಕಾದರೂ. ಇರಾನ್ ಜೊತೆ ಮಹತ್ವದ ಮಾತುಕತೆಗಳು ನಡೆದಿವೆ. ಅವು ಯಾವ ದಿಕ್ಕಿಗೆ ಸಾಗುತ್ತವೆ ನೋಡೋಣ ಎಂದು ಶ್ವೇತಭವನದಲ್ಲಿ ಸುದ್ದಿಗಾರರಿಗೆ ಟ್ರಂಪ್ ತಿಳಿಸಿದ್ದಾರೆ.

ಆರಂಭಿಕ ವಹಿವಾಟಿನಲ್ಲಿ 30 ಷೇರುಗಳ ಬಿಎಸ್‌ಇ ಸೆನ್ಸೆಕ್ಸ್ 366.71 ಅಂಕಗಳಷ್ಟು ಏರಿ 75,706.88ಕ್ಕೆ ತಲುಪಿತು. 50 ಷೇರುಗಳ ಎನ್‌ಎಸ್‌ಇ ನಿಫ್ಟಿ 107.45 ಅಂಕಗಳಷ್ಟು ಏರಿ 23,760ಕ್ಕೆ ತಲುಪಿತು.

30 ಸೆನ್ಸೆಕ್ಸ್ ಕಂಪನಿಗಳ ಪೈಕಿ ಇನ್ಪೋಸಿಸ್, ಹೆಚ್ ಸಿಎಲ್ ಟೆಕ್ನಾಲಜೀಸ್, ಟೆಕ್ ಮಹೀಂದ್ರಾ, ಟಾಟಾ ಕನ್ಸಲ್ಟೆನ್ಸಿ ಸರ್ವಿಸ್, ಟ್ರೆಂಟ್ ಲಿಮಿಟೆಡ್ ಹಾಗೂ ಇಂಟರ್ ಗ್ಲೋಬ್ ಏವಿಯೇಷನ್ ಪ್ರಮುಖ ಲಾಭಾಂಶ ಗಳಿಸಿದವು.

ಇನ್ನೊಂದೆಡೆ ಅಲ್ಟ್ರಾಟೆಕ್ ಸಿಮೆಂಟ್ಸ್, ಕೊಟಾಕ್ ಮಹೀಂದ್ರ ಬ್ಯಾಂಕ್, ಟೈಟಾನ್ ಕಂಪೆನಿ ಮತ್ತು ಇಟರ್ನಲ್ ಷೇರುಗಳು ಹಿನ್ನಡೆ ಕಂಡವು. ಜಾಗತಿಕ ತೈಲ ಮಾನದಂಡವಾದ ಬ್ರೆಂಟ್ ಕ್ರೂಡ್ ದರವು ಶೇಕಡಾ 2ರಷ್ಟು ಇಳಿದು ಪ್ರತಿ ಬ್ಯಾರೆಲ್‌ಗೆ 109.9 ಡಾಲರ್‌ಗೆ ವಹಿವಾಟಾಗುತ್ತಿತ್ತು.

ವಿದೇಶಿ ಸಂಸ್ಥಾ ಹೂಡಿಕೆದಾರರು (FII) ಸೋಮವಾರ 2,813.69 ಕೋಟಿ ರೂಪಾಯಿ ಮೌಲ್ಯದ ಷೇರುಗಳನ್ನು ಖರೀದಿಸಿದ್ದಾರೆ ಎಂದು ವಿನಿಮಯದ ಅಂಕಿಅಂಶಗಳು ತಿಳಿಸಿವೆ.

ಎಫ್‌ಐಐಗಳು ಖರೀದಿದಾರರಾಗಿ ಮರಳುತ್ತಿರುವುದು ಇನ್ನೂ ಸ್ಪಷ್ಟ ಪ್ರವೃತ್ತಿಯಾಗದಿದ್ದರೂ, ಭಾರತದ ಮೌಲ್ಯಮಾಪನಗಳು ಆಕರ್ಷಕವಾಗುತ್ತಿವೆ ಎಂಬ ಸೂಚನೆ ನೀಡುತ್ತದೆ.

ಎಐ ಷೇರುಗಳಲ್ಲಿ ಬಬಲ್ ಮೌಲ್ಯಮಾಪನದ ಆತಂಕವೂ ಹೆಚ್ಚುತ್ತಿದೆ. ಎಫ್‌ಐಐ ಖರೀದಿ ಮುಂದುವರಿದರೆ, ಪ್ರಮುಖ ಬ್ಯಾಂಕ್‌ಗಳನ್ನೊಳಗೊಂಡ ಹಣಕಾಸು ಕ್ಷೇತ್ರದ ಲಾರ್ಜ್‌ಕ್ಯಾಪ್ ಷೇರುಗಳು ಹೆಚ್ಚಿನ ಏರಿಕೆ ಕಾಣುವ ಸಾಧ್ಯತೆ ಇದೆ. ಏಕೆಂದರೆ ಅವುಗಳ ಮೌಲ್ಯಮಾಪನ ಆಕರ್ಷಕವಾಗಿದ್ದು, ಬೆಳವಣಿಗೆಯ ಸಾಮರ್ಥ್ಯವೂ ಇದೆ,” ಎಂದು ವಿಕೆ ವಿಜಯ್ ಕುಮಾರ್ ತಿಳಿಸಿದ್ದಾರೆ.

ಅಮೆರಿಕ ನ್ಯಾಯಾಂಗ ಇಲಾಖೆ ಭಾರತೀಯ ಉದ್ಯಮಿ ಗೌತಮ್ ಅದಾನಿ ಹಾಗೂ ಅವರ ಅಳಿಯ ಸಾಗರ್ ವಿರುದ್ಧದ ಎಲ್ಲಾ ಕ್ರಿಮಿನಲ್ ಆರೋಪಗಳನ್ನು ಶಾಶ್ವತವಾಗಿ ಕೈಬಿಟ್ಟಿರುವ ಹಿನ್ನೆಲೆಯಲ್ಲಿ ಅದಾನಿ ಸಮೂಹದ ಷೇರುಗಳು ಏರಿಕೆ ಕಂಡವು. ನ್ಯೂಯಾರ್ಕ್‌ನಲ್ಲಿ ದಾಖಲಾಗಿದ್ದ ಉನ್ನತ ಮಟ್ಟದ ಸೆಕ್ಯುರಿಟೀಸ್ ಮತ್ತು ವೈರ್ ಫ್ರಾಡ್ ಪ್ರಕರಣದಲ್ಲಿ ಆರೋಪಗಳನ್ನು ಸಾಬೀತುಪಡಿಸಲು ಸಾಧ್ಯವಿಲ್ಲವೆಂದು ಅಭಿಯೋಜಕರು ತೀರ್ಮಾನಿಸಿದ ನಂತರ ಪ್ರಕರಣ ಸಂಪೂರ್ಣ ಮುಕ್ತಾಯಗೊಂಡಿದೆ.

ಏಷ್ಯಾದ ಮಾರುಕಟ್ಟೆಗಳಲ್ಲಿ ದಕ್ಷಿಣ ಕೊರಿಯಾದ ಕೋಸ್ಪಿ ಹಾಗೂ ಜಪಾನ್‌ನ ನಿಕ್ಕೈ 225 ಸೂಚ್ಯಂಕಗಳು ಇಳಿಕೆಯಲ್ಲಿ ವಹಿವಾಟಾಗಿದ್ದರೆ, ಶಾಂಘೈ SSE ಕಾಂಪೊಸಿಟ್ ಮತ್ತು ಹಾಂಗ್ ಕಾಂಗ್ ಹ್ಯಾಂಗ್ ಸೆಂಗ್ ಸೂಚ್ಯಂಕಗಳು ಏರಿಕೆಯಲ್ಲಿ ವಹಿವಾಟಾಗುತ್ತಿದ್ದವು.

ಅಮೆರಿಕದ ಮಾರುಕಟ್ಟೆಗಳು ಸೋಮವಾರ ಮಿಶ್ರವಾಗಿ ಮುಕ್ತಾಯಗೊಂಡವು. ಗಲ್ಫ್ ರಾಷ್ಟ್ರಗಳ ನಾಯಕರ ಮನವಿಯ ಮೇರೆಗೆ ಇರಾನ್ ವಿರುದ್ಧದ ಯಾವುದೇ ಸೇನಾ ಕ್ರಮವನ್ನು ಅಮೆರಿಕ ಮುಂದೂಡುತ್ತಿದೆ ಎಂಬ ಟ್ರಂಪ್ ಅವರ ಇತ್ತೀಚಿನ ಹೇಳಿಕೆಗಳು ಉದ್ವಿಗ್ನತೆ ಕಡಿಮೆಯಾಗುವ ನಿರೀಕ್ಷೆ ಮೂಡಿಸಿವೆ.

ಆದರೆ ಭೌಗೋಳಿಕ-ರಾಜಕೀಯ ಪರಿಸ್ಥಿತಿ ಇನ್ನೂ ಅಸ್ಥಿರವಾಗಿದ್ದು, ಉದ್ವಿಗ್ನತೆ ಮರುಕಳಿಸುವ ಅಪಾಯದ ನಡುವೆ ಹೂಡಿಕೆದಾರರು ಎಚ್ಚರಿಕೆಯಿಂದಲೇ ಇದ್ದಾರೆ,” ಎಂದು ಪೊನ್ಮುಡಿ ಆರ್ ಹೇಳಿದ್ದಾರೆ.

ಸೋಮವಾರ ಬಿಎಸ್‌ಇ ಸೂಚ್ಯಂಕವು 77.05 ಅಂಕಗಳು ಅಥವಾ 0.10 ಶೇಕಡಾ ಏರಿಕೆ ಕಂಡು 75,315.04ಕ್ಕೆ ಮುಕ್ತಾಯಗೊಂಡಿತ್ತು.

ನಿಫ್ಟಿ ಕೂಡ 6.45 ಅಂಕಗಳು ಅಥವಾ 0.03 ಶೇಕಡಾ ಏರಿಕೆ ಕಂಡು 23,649.95ಕ್ಕೆ ಮುಕ್ತಾಯಗೊಂಡಿತ್ತು.