BSNL ಬಂಪರ್ ಆಫರ್; ಕೇವಲ 51 ರೂಪಾಯಿಗೆ Unlimited ಕಾಲಿಂಗ್ ಜೊತೆಗೆ ದಿನವೂ 2GB ಡೇಟಾ!

ಟೆಲಿಕಾಂ ಲೋಕದಲ್ಲಿ ಮತ್ತೆ ಸರ್ಕಾರಿ ಸ್ವಾಮ್ಯದ BSNL ಅಲೆ ಎದ್ದಿದೆ. ಖಾಸಗಿ ಟೆಲಿಕಾಂ ಕಂಪನಿಗಳು ರೀಚಾರ್ಜ್ ದರಗಳನ್ನು ಏರಿಸಿ ಗ್ರಾಹಕರ ಜೇಬಿಗೆ ಕತ್ತರಿ ಹಾಕುತ್ತಿರುವ ಈ ಸಂದರ್ಭದಲ್ಲಿ, BSNL ಜನಸಾಮಾನ್ಯರಿಗೆ ಅಚ್ಚರಿಯ ಆಫರ್ ಒಂದನ್ನು ಉಡುಗೊರೆಯಾಗಿ ನೀಡಿದೆ. ಅದರಂತೆ, ಚಂದಾದಾರರನ್ನು ಸೆಳೆಯಲು ಕೇವಲ 51 ರೂಪಾಯಿಗೆ ದಿನವೂ ಡೇಟಾ ಹಾಗೂ ಅನಿಯಮಿತ ಕರೆ ಸೌಲಭ್ಯ ನೀಡುವ ಮೂಲಕ ಭರ್ಜರಿ ಸಂಚಲನ ಮೂಡಿಸಿದೆ. ಆ ಕುರಿತ ವರದಿ ಇಲ್ಲಿದೆ:

ಹೌದು, ಇದು BSNL ಇತ್ತೀಚೆಗೆ ಗ್ರಾಹಕರನ್ನು ಸೆಳೆಯಲು ಪರಿಚಯಿಸಿದ್ದ ಅತ್ಯಂತ ಜನಪ್ರಿಯ ಮತ್ತು ಆಕರ್ಷಕ ಆಫರ್ ಆಗಿದೆ. ಖಾಸಗಿ ಟೆಲಿಕಾಂ ಕಂಪನಿಗಳಾದ ಜಿಯೋ ಮತ್ತು ಏರ್‌ಟೆಲ್ ಬೆಲೆ ಹೆಚ್ಚಳ ಮಾಡಿರುವ ಬೆನ್ನಲ್ಲೇ, BSNL ಕೇವಲ ₹51 ರೂಪಾಯಿಗೆ ಈ ಬಂಪರ್ ಪ್ಲಾನ್ ಅನ್ನು ತಂದಿದೆ.ಇದು ಕೇವಲ ಹೊಸ ಗ್ರಾಹಕರಿಗೆ ಮಾತ್ರ ಲಭ್ಯವಿರುವ 'ಸ್ಮಾರ್ಟ್ ಸ್ಟಾರ್ಟ್' ಫಸ್ಟ್ ರೀಚಾರ್ಜ್ ಕೂಪನ್ ಆಫರ್ ಆಗಿದೆ.

ಯೋಜನೆಯ ಪ್ರಮುಖ ಪ್ರಯೋಜನಗಳೇನು?

ಈ ಪ್ಲಾನ್ ಅಡಿಯಲ್ಲಿ ಬಳಕೆದಾರರಿಗೆ ಯಾವುದೇ ನೆಟ್‌ವರ್ಕ್‌ಗೆ ಯಾವುದೇ ಮಿತಿಯಿಲ್ಲದೆ ಮಾತನಾಡಲು ಅನಿಯಮಿತ ವಾಯ್ಸ್ ಕರೆಗಳ ಸೌಲಭ್ಯ ಸಿಗಲಿದೆ. ಜೊತೆಗೆ ಪ್ರತಿದಿನ 2GB ಹೈ ಸ್ಪೀಡ್ ಡೇಟಾ ಲಭ್ಯವಾಗಲಿದ್ದು, ಇಂಟರ್ನೆಟ್ ಬ್ರೌಸಿಂಗ್ ಹಾಗೂ ಸಾಮಾಜಿಕ ಜಾಲತಾಣಗಳ ಬಳಕೆಗೆ ಇದು ಸಹಕಾರಿಯಾಗಿದೆ. ಅಲ್ಪ ವೆಚ್ಚದಲ್ಲಿ ಅತ್ಯುತ್ತಮ ಸಂಪರ್ಕ ಅನುಭವ ಪಡೆಯಲು ಇದು ಸೂಕ್ತವಾಗಿದೆ.

ಈ ಆಫರ್ ಪಡೆಯುವುದು ಹೇಗೆ?

ಹೊಸ ಬಿಎಸ್‌ಎನ್‌ಎಲ್ ಸಿಮ್ ಕಾರ್ಡ್ ಪಡೆದುಕೊಳ್ಳುವ ಗ್ರಾಹಕರು ತಮ್ಮ ಹತ್ತಿರದ ಬಿಎಸ್‌ಎನ್‌ಎಲ್ ಗ್ರಾಹಕ ಸೇವಾ ಕೇಂದ್ರ ಅಥವಾ ಅಧಿಕೃತ ರೀಚಾರ್ಜ್ ಮಳಿಗೆಗಳಲ್ಲಿ 51 ರೂಪಾಯಿಯ ಮೊದಲ ರೀಚಾರ್ಜ್ ಮಾಡಿಸುವ ಮೂಲಕ ಈ ಸೌಲಭ್ಯವನ್ನು ಸಕ್ರಿಯಗೊಳಿಸಿಕೊಳ್ಳಬಹುದು.