ಉದ್ಯಮ ಸ್ನೇಹಿ ರ್ಯಾಂಕ್ ಮೇಲೇರಿಕೆ

ವಾಷಿಂಗ್ಟನ್: ಉದ್ಯಮ ಸ್ನೇಹಿ ಪರಿಸರ ಪಟ್ಟಿಯಲ್ಲಿ ಭಾರತದ ಸ್ಥಾನ ಮೇಲೇರಿದೆ. ವಿಶ್ವಬ್ಯಾಂಕ್ 189 ದೇಶಗಳು ಒಳಗೊಂಡ ಪಟ್ಟಿಯನ್ನು ಬಿಡುಗಡೆ ಮಾಡಿದ್ದು ಭಾರತ 130ನೇ ಸ್ಥಾನದಲ್ಲಿದೆ. ಈ ಹಿಂದೆ ಬಿಡುಗಡೆ ಮಾಡಿದ ಪಟ್ಟಿಯಲ್ಲಿ ಭಾರತ 142ನೇ ಸ್ಥಾನದಲ್ಲಿತ್ತು. ಅಂದರೆ 12 ಸ್ಥಾನಗಳಷ್ಟು ಮೇಲೇರಿದೆ ಎಂದು ವಿಶ್ವಬ್ಯಾಂಕ್‍ನ ಮುಖ್ಯ ಆರ್ಥಿಕ ತಜ್ಞ ಮತ್ತು ಹಿರಿಯ ಉಪಾಧ್ಯಕ್ಷ ಕೌಶಿಕ್ ಬಸು ಹೇಳಿದ್ದಾರೆ. ಯಾವುದೇ ಒಂದು ದೇಶಕ್ಕೆ ಒಮ್ಮೆಗೆ 12 ರ್ಯಾಂಕ್ ಏರಿಕೆ ಕಾಣವುದು ದೊಡ್ಡ ಸಾಧನೆಯಾಗಿದೆ. ಭಾರತದ ಈ ಪ್ರಗತಿ ಅತ್ಯುತ್ತಮ ಸೂಚನೆಯಾಗಿದೆ. ಭಾರತದಲ್ಲಿ ನಡೆಯುತ್ತಿರುವ ಆಡಳಿತದ ಕುರಿತು ಒಳ್ಳೆಯ ಸೂಚನೆಗಳನ್ನು ನೀಡಲಿದೆ ಎಂದಿದ್ದಾರೆ. ಈ ಪಟ್ಟಿಯಲ್ಲಿ ಚೀನಾ 84ನೇ ಸ್ಥಾನದಲ್ಲಿದ್ದರೆ ಪಾಕಿಸ್ತಾನ 138ನೇ ಸ್ಥಾನದಲ್ಲಿದೆ. ಕಳೆದ ಬಾರಿ ಪಾಕಿಸ್ತಾನ 128ನೇ ಸ್ಥಾನದಲ್ಲಿ ಇದ್ದದು ಈ ಬಾರಿ ಹತ್ತು ಸ್ಥಾನ ಕುಸಿದಿದ್ದರೆ ಚೀನಾ ಆರು ಸ್ಥಾನ ಮೇಲೇರಿದೆ. ಕಳೆದ ವರ್ಷ ಕೇಂದ್ರ ಸರ್ಕಾರ ಎರಡು ಸುಧಾರಣೆಗಳನ್ನು ಕೈಗೊಂಡಿತು. ಮೊದಲನೆಯದ ದೇಶದಲ್ಲಿ ವಹಿವಾಟು ನಡೆಸಲು ಇಡಬೇಕಾದ ಕನಿಷ್ಠ ಬಂಡವಾಳ ಮತ್ತು ಪ್ರಮಾಣ ಪತ್ರ ಕಡ್ಡಾಯವಾಗಿ ಪಡೆಯುವುದನ್ನು ತೆಗೆದುಹಾಕಿತು. ಇದು ರ್ಯಾಂಕ್‍ನಲ್ಲಿ ಏರಿಕೆ ಕಾಣಲು ಪ್ರಮುಖ ಕಾರಣವಾಗಿದೆ ಎಂದು ವಿಶ್ವಬ್ಯಾಂಕ್ ಹೇಳಿದೆ.