ಪ್ರಧಾನಿ ನರೇಂದ್ರ ಮೋದಿ ಬೆಂಗಾವಲು ಪಡೆಯಲ್ಲಿ 'ಸೂಪರ್ ಕಾರ್'ಗಳು; ವಿಶೇಷತೆ ಏನು?

ಭಾರತದ ಪ್ರಧಾನಿ ನರೇಂದ್ರ ಮೋದಿ (Narendra Modi) ಅವರ ಭದ್ರತಾ ವಾಹನಗಳ ಕಾನ್ವಾಯ್‌ನಲ್ಲಿ ಕಾಣಿಸಿಕೊಳ್ಳುವ ಸೂಪರ್ ಸುರಕ್ಷಿತ ಕಾರುಗಳು ದೇಶದ ಅತ್ಯಾಧುನಿಕ ಭದ್ರತಾ ವ್ಯವಸ್ಥೆಗಳಲ್ಲಿ ಒಂದಾಗಿ ಪರಿಗಣಿಸಲ್ಪಡುತ್ತವೆ.

ಬಾಂಬ್ ಸ್ಫೋಟವನ್ನೂ ತಡೆಯಬಲ್ಲ ಶಕ್ತಿಯುಳ್ಳ ಆರ್ಮರ್ಡ್ ಲಿಮೋಸಿನ್ ಕಾರುಗಳಿಂದ ಹಿಡಿದು, ಗದ್ದಲಮಯ ನಗರ ರಸ್ತೆಗಳಲ್ಲೂ ಕ್ಷಣಾರ್ಧದಲ್ಲಿ ಸಂಚರಿಸಬಲ್ಲ ಟ್ಯಾಕ್ಟಿಕಲ್ ಎಸ್‌ಯುವಿಗಳವರೆಗೆ, ಪ್ರಧಾನಮಂತ್ರಿಯವರ ಕಾನ್ವಾಯ್ ಅತ್ಯಂತ ತಂತ್ರಜ್ಞಾನಾಧಾರಿತವಾಗಿ ರೂಪಿಸಲಾಗಿದೆ.

ಈ ಸಂಪೂರ್ಣ ಭದ್ರತಾ ವ್ಯವಸ್ಥೆಯನ್ನು ವಿಶೇಷ ರಕ್ಷಣಾ ಪಡೆ (Special Protection Group) ನಿರ್ವಹಿಸುತ್ತದೆ. ಪ್ರಧಾನಮಂತ್ರಿಯವರ ವಾಹನ ಪಡೆ ಗರಿಷ್ಠ ಭದ್ರತೆ, ವೇಗ ಮತ್ತು ತಂತ್ರಾತ್ಮಕ ರಹಸ್ಯತೆಯನ್ನು ಗಮನದಲ್ಲಿಟ್ಟು ವಿನ್ಯಾಸಗೊಳಿಸಲಾಗಿದೆ.

ಹಾಗಾದ್ರೆ ಪ್ರಧಾನಿ ಮೋದಿ ಅವರ ಬೆಂಗಾವಲು ಪಡೆಯಲ್ಲಿ ಬಳಸುವ ಪ್ರಮುಖ ಕಾರುಗಳ ಬಗ್ಗೆ ತಿಳಿಯೋಣ.

ಭಾರತದ ಟಾಟಾ ಮೋಟರ್ಸ್ ಒಡೆತನದ ರೆಂಜ್ ರೋವರ್ ಸೆಂಟಿನೆಲ್ ಕಾರು ಪ್ರಧಾನಮಂತ್ರಿಗಳ ಬೆಂಗಾವಲು ಪಡೆಯಲ್ಲಿ ಬಳಸುವ ಪ್ರಮುಖ ಕಾರಾಗಿದೆ.

ಸಾಮಾನ್ಯವಾಗಿ ನಗರ ಪ್ರದೇಶಗಳಲ್ಲಿ ಸಂಚರಿಸುವಾಗ ಹಾಗೂ ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಹೆಚ್ಚಾಗಿ ಈ ಕಾರು ಕಾಣಿಸುತ್ತದೆ. ಇದನ್ನು ಲ್ಯಾಂಡ್ ರೋವರ್‌ನ ಸ್ಪೆಷಲ್ ವೆಹಿಕಲ್ ಆಪರೇಷನ್ಸ್ ವಿಭಾಗ ಅಭಿವೃದ್ಧಿಪಡಿಸಿದೆ.

ಈ ವಾಹನದಲ್ಲಿ ಬಲಿಷ್ಠ ಉಕ್ಕಿನ ರಕ್ಷಣಾ ಪದರ, ಸ್ಫೋಟ ನಿರೋಧಕ ಗಾಜು ಮತ್ತು ರನ್-ಫ್ಲಾಟ್ ಟೈರ್‌ಗಳಿವೆ. ಅಂತೆಯೇ ಎಸ್‌ಯುವಿ ಮಾದರಿಯ ವಿನ್ಯಾಸ ಇರುವುದರಿಂದ ಭಾರತೀಯ ನಗರ ರಸ್ತೆಗಳಲ್ಲೂ ವೇಗವಾಗಿ ಚಲಿಸಲು ಸಾಧ್ಯವಾಗುತ್ತದೆ.

ಟೊಯೋಟಾ ಸಂಸ್ಥೆ ತಯಾರಿಸುವ ಫಾರ್ಚುನರ್ ಕಾರನ್ನು ಪ್ರಧಾನಮಂತ್ರಿಯವರ ಕಾನ್ವಾಯ್‌ನಲ್ಲಿ ಎಸ್ಕಾರ್ಟ್ ಹಾಗೂ ಟ್ಯಾಕ್ಟಿಕಲ್ ಸಪೋರ್ಟ್ ಎಸ್‌ಯುವಿಯಾಗಿ ಬಳಸಲಾಗುತ್ತದೆ.

ಮೇಬ್ಯಾಕ್ ಕಾರಿನಷ್ಟು ಐಷಾರಾಮಿ ಅಲ್ಲದಿದ್ದರೂ, ಇದು ಬಲಿಷ್ಠತೆ, ವೇಗವರ್ಧನೆ ಮತ್ತು ಭಾರತೀಯ ರಸ್ತೆಗಳಿಗೆ ಸೂಕ್ತವಾದ ಕಾರ್ಯಕ್ಷಮತೆಯನ್ನು ಒದಗಿಸುತ್ತದೆ.

ಪ್ರಧಾನಿಗಳು ಸಂಚರಿಸುವಾಗ ಭದ್ರತೆಯ ಹಲವು ಪದರಗಳನ್ನು ನಿರ್ಮಿಸಲು ಅನೇಕ ಫಾರ್ಚುನರ್ ವಾಹನಗಳನ್ನು ಒಟ್ಟಿಗೆ ಬಳಸಲಾಗುತ್ತದೆ.

ಟೊಯೋಟಾ ಸಂಸ್ಥೆ ತಯಾರಿಸುವ ಮತ್ತೊಂದು ಬಲಿಷ್ಠ ಕಾರು ಲ್ಯಾಂಡ್ ಕ್ರೂಸರ್ ವಾಹನವು ಪ್ರಧಾನಮಂತ್ರಿಯವರ ಕಾನ್ವಾಯ್‌ನ ವಿಶ್ವಾಸಾರ್ಹ ಬೆಂಬಲ ಮತ್ತು ಎಸ್ಕಾರ್ಟ್ ವಾಹನಗಳಲ್ಲಿ ಒಂದಾಗಿದೆ.

ವಿಶ್ವದಾದ್ಯಂತ ವಿಶ್ವಾಸಾರ್ಹತೆ ಮತ್ತು ಆಫ್‌ರೋಡ್ ಸಾಮರ್ಥ್ಯಕ್ಕಾಗಿ ಪ್ರಸಿದ್ಧವಾಗಿರುವ ಈ ಎಸ್‌ಯುವಿಗಳನ್ನು ಭದ್ರತಾ ಕಾರ್ಯಾಚರಣೆಗಳಿಗೆ ಅನುಗುಣವಾಗಿ ವಿಶೇಷವಾಗಿ ಪರಿಷ್ಕರಿಸಲಾಗುತ್ತದೆ.

ದೂರ ಪ್ರಯಾಣಗಳು ಮತ್ತು ಕಠಿಣ ಪ್ರದೇಶಗಳಲ್ಲಿ ಸಂಚರಿಸಲು ಈ ವಾಹನಗಳು ಸೂಕ್ತವಾಗಿವೆ.

ಮೇಬ್ಯಾಕ್ ಸೇವೆಗೆ ಬರುವ ಮೊದಲು, ಬಿಎಂಡಬ್ಲ್ಯು 7 ಸಿರೀಸ್ ಹೈ ಸೆಕ್ಯುರಿಟಿ ಸೆಡಾನ್ ಪ್ರಧಾನಮಂತ್ರಿಯವರ ಪ್ರಮುಖ ಅಧಿಕೃತ ವಾಹನಗಳಲ್ಲಿ ಒಂದಾಗಿತ್ತು.

ಭಾರೀ ರಕ್ಷಣಾ ವ್ಯವಸ್ಥೆ ಮತ್ತು ಅತ್ಯಾಧುನಿಕ ಸಂವಹನ ತಂತ್ರಜ್ಞಾನ ಹೊಂದಿದ್ದ ಈ ಕಾರು, ಭಾರತದಲ್ಲಿ ವಿಐಪಿ ಭದ್ರತೆಗೆ ಯುರೋಪಿಯನ್ ಹೈ ಸೆಕ್ಯುರಿಟಿ ಲಕ್ಸುರಿ ಕಾರುಗಳ ಬಳಕೆಯತ್ತ ನಡೆದ ಬದಲಾವಣೆಯನ್ನು ಪ್ರತಿಬಿಂಬಿಸುತ್ತದೆ.