ಇರಾನ್ ಯುದ್ಧದ ನಡುವೆ ಪುಟಿನ್ ಗೆ ಟ್ರಂಪ್ ದೂರವಾಣಿ ಕರೆ; ನಡೆದ ಚರ್ಚೆ ಏನು?

ಮಾಸ್ಕೋ: ಇರಾನ್ ಮೇಲೆ ಅಮೆರಿಕ-ಇಸ್ರೇಲಿ ದಾಳಿಗಳಿಂದ ಉಂಟಾದ ಜಾಗತಿಕ ಇಂಧನ ವ್ಯತ್ಯಯದ ಮಧ್ಯೆ, ಸೋಮವಾರ ತಡರಾತ್ರಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರಿಗೆ ಕರೆ ಮಾಡಿ ಮಾತನಾಡಿದ್ದಾರೆ. ಇರಾನ್ ಮೇಲಿನ ಇಸ್ರೇಲ್- ಅಮೆರಿಕ ಜಂಟಿ ದಾಳಿ ಹಾರ್ಮುಜ್ ಜಲಸಂಧಿಯನ್ನು ಸಂಪೂರ್ಣವಾಗಿ ಮುಚ್ಚಲು ಕಾರಣವಾಗಿದೆ.

ಕ್ರೆಮ್ಲಿನ್ ವಿದೇಶಾಂಗ ನೀತಿ ಸಹಾಯಕ ಯೂರಿ ಉಷಕೋವ್ ಅವರು ನೀಡಿರುವ ಮಾಹಿತಿಯ ಪ್ರಕಾರ, ಇಬ್ಬರು ನಾಯಕರ ನಡುವಿನ ಒಂದು ಗಂಟೆಯ ದೂರವಾಣಿ ಸಂಭಾಷಣೆಯಲ್ಲಿ ಅಮೆರಿಕ ಮತ್ತು ಇರಾನ್ ನಡುವಿನ ಮತ್ತು ರಷ್ಯಾ ಮತ್ತು ಉಕ್ರೇನ್ ನಡುವಿನ ಸಂಘರ್ಷಗಳ ಬಗ್ಗೆ ಚರ್ಚಿಸಿದರು.

"ಸಂಭಾಷಣೆ ಇರಾನ್ ಸಂಘರ್ಷ ಮತ್ತು ಮಾಸ್ಕೋ, ವಾಷಿಂಗ್ಟನ್ ಮತ್ತು ಕೈವ್ ನಡುವಿನ ತ್ರಿಪಕ್ಷೀಯ ಮಾತುಕತೆಗಳ ಮೇಲೆ ಕೇಂದ್ರೀಕರಿಸಿದೆ. ಉಕ್ರೇನ್ ಸಂಘರ್ಷವನ್ನು ಇತ್ಯರ್ಥಪಡಿಸುವ ಗುರಿಯನ್ನು ಹೊಂದಿದೆ. ಇಬ್ಬರು ಅಧ್ಯಕ್ಷರ ನಡುವಿನ ಸಂಭಾಷಣೆ ವ್ಯವಹಾರಿಕ, ಮುಕ್ತ ಮತ್ತು ರಚನಾತ್ಮಕವಾಗಿತ್ತು" ಎಂದು ಉಷಕೋವ್ ಹೇಳಿದರು.

ಮಧ್ಯರಾತ್ರಿಯ ಸ್ವಲ್ಪ ಮೊದಲು ಕ್ರೆಮ್ಲಿನ್ ಪೂಲ್ ವರದಿಗಾರರಿಗೆ ಅಧ್ಯಕ್ಷ ಪುಟಿನ್ ಅವರು ಇರಾನ್‌ನಲ್ಲಿ ನಡೆಯುತ್ತಿರುವ ಸಂಘರ್ಷದ ಬಗ್ಗೆ ತಮ್ಮ ಆಲೋಚನೆಗಳನ್ನು ಹಂಚಿಕೊಂಡರು ಮತ್ತು ಗಲ್ಫ್ ರಾಷ್ಟ್ರಗಳ ನಾಯಕರು ಮತ್ತು ಇರಾನಿನ ಅಧ್ಯಕ್ಷ ಮಸೌದ್ ಪೆಜೆಶ್ಕಿಯಾನ್ ಅವರೊಂದಿಗೆ ಕಳೆದ ವಾರ ನಡೆದ ಸಂಭಾಷಣೆಗಳ ಬಗ್ಗೆ ಟ್ರಂಪ್‌ಗೆ ವಿವರಿಸಿದರು ಎಂದು ಉಷಕೋವ್ ಹೇಳಿದರು.

"ಟ್ರಂಪ್, ಪ್ರತಿಯಾಗಿ, ಪರಿಸ್ಥಿತಿಯ ಬಗ್ಗೆ ತಮ್ಮ ಅಭಿಪ್ರಾಯವನ್ನು ವ್ಯಕ್ತಪಡಿಸಿದರು. ಅವರು ಈ ವಿಷಯದ ಬಗ್ಗೆ ಬಹಳ ಮಹತ್ವದ ಚರ್ಚೆ ನಡೆಸಿದರು" ಎಂದು ಉಷಕೋವ್ ಹೇಳಿದರು. ಇದು ಪುಟಿನ್ ಮತ್ತು ಟ್ರಂಪ್ ಅವರ 11ನೇ ಫೋನ್ ಸಂಭಾಷಣೆಯಾಗಿದ್ದು, ಈ ವರ್ಷದ ಮೊದಲನೆಯ ಸಂಭಾಷಣೆಯಾಗಿದೆ. ಡಿಸೆಂಬರ್‌ನಲ್ಲಿ ಕೊನೆಯ ಬಾರಿಗೆ ಅವರು ಮಾತನಾಡಿದ್ದರು ಎಂದು ಉಷಕೋವ್ ಗಮನಿಸಿದರು.

ರಷ್ಯಾದ ಅಧ್ಯಕ್ಷರು ಇಂಧನ ಅಧಿಕಾರಿಗಳ ಉನ್ನತ ಸಭೆಯನ್ನು ಕರೆದು ಮಾಸ್ಕೋ ತನ್ನ ಸ್ನೇಹಪರ ರಾಷ್ಟ್ರಗಳಿಗೆ (ಭಾರತ ಮತ್ತು ಚೀನಾ) ವಿಶ್ವಾಸಾರ್ಹ ಪಾಲುದಾರ ಎಂದು ಘೋಷಿಸಿದ ಗಂಟೆಗಳ ನಂತರ ಟ್ರಂಪ್ ಪುಟಿನ್ ಗೆ ಕರೆ ಮಾಡಿದ್ದಾರೆ. ಮತ್ತು ಅವರು ನಿರ್ಬಂಧಗಳನ್ನು ತೆಗೆದುಹಾಕಲು ಸಿದ್ಧರಿದ್ದರೆ ದೀರ್ಘಾವಧಿಯ ಆಧಾರದ ಮೇಲೆ ಯುರೋಪಿಯನ್ ಒಕ್ಕೂಟಕ್ಕೆ ಪೂರೈಕೆಯನ್ನು ಪುನರಾರಂಭಿಸಲು ಸಿದ್ಧರಿರುವುದಾಗಿ ಪುಟಿನ್ ಘೋಷಿಸಿದ್ದಾರೆ.

ಪಶ್ಚಿಮ ಏಷ್ಯಾದಲ್ಲಿ ನಡೆಯುತ್ತಿರುವ ಸಂಘರ್ಷ ಜಾಗತಿಕ ತೈಲ ಮತ್ತು ಅನಿಲ ಹರಿವನ್ನು ಗಂಭೀರವಾಗಿ ಅಡ್ಡಿಪಡಿಸುವ ಅಪಾಯವನ್ನುಂಟುಮಾಡುತ್ತದೆ ಎಂದು ಪುಟಿನ್ ಎಚ್ಚರಿಸಿದರು, ವಿಶೇಷವಾಗಿ ಪ್ರಮುಖ ಸಮುದ್ರ ಮಾರ್ಗವಾದ ಹಾರ್ಮುಜ್ ಜಲಸಂಧಿಯನ್ನು ಮುಚ್ಚಲಾಗಿರುವುದರಿಂದ ಜಾಗತಿಕ ಪರಿಣಾಮ ಉಂಟಾಗುತ್ತಿದೆ.

ಸೋಮವಾರ ಸಂಜೆ ಕ್ರೆಮ್ಲಿನ್‌ನಲ್ಲಿ ನಡೆದ ಸಭೆಯಲ್ಲಿ, ಜಾಗತಿಕ ಇಂಧನ ಪೂರೈಕೆ ಅಡಚಣೆಯ ನಡುವೆ ಗಲ್ಫ್ ತೈಲ ಉತ್ಪಾದನೆಯಲ್ಲಿ ಸ್ಥಗಿತ ಮತ್ತು ಹೊಸ ಬೆಲೆಗಳಿಗೆ ಕಾರಣವಾಗಬಹುದು ಎಂದು ಎಚ್ಚರಿಸಿದರು. ಯುದ್ಧದ ಹಿನ್ನೆಲೆಯಲ್ಲಿ ರಷ್ಯಾ ಈಗ ತೈಲ ಪೂರೈಕೆಯಲ್ಲಿ ಮುಂಚೂಣಿ ಸ್ಥಾನದಲ್ಲಿದೆ.

"ಮಾಸ್ಕೋ ವಿಶ್ವಾಸಾರ್ಹ ಇಂಧನ ಪೂರೈಕೆದಾರನಾಗಿ ಉಳಿದಿದೆ. ಅದು ವಿಶ್ವಾಸಾರ್ಹ ಪಾಲುದಾರರೆಂದು ನೋಡುವ ರಾಷ್ಟ್ರಗಳಿಗೆ ತೈಲ ಮತ್ತು ಅನಿಲವನ್ನು ಒದಗಿಸುವುದನ್ನು ಮುಂದುವರಿಸುತ್ತದೆ" ಎಂದು ಪುಟಿನ್ ಹೇಳಿದ್ದಾರೆ.