ನ್ಯೂಯಾರ್ಕ್ ಮೇಯರ್ ಜೋಹ್ರಾನ್ ಮಮ್ದಾನಿ ಮನೆ ಮೇಲೆ 'ಬಾಂಬ್' ಎಸೆತ; 6 ಶಂಕಿತರ ಬಂಧನ

ನ್ಯೂಯಾರ್ಕ್ ಮೇಯರ್ ಜೋಹ್ರಾನ್ ಮಮ್ದಾನಿಯವರ ಮನೆಯ ಮೇಲೆ ಬಾಂಬ್ ಎಸೆಯಲಾಗಿದೆ ಎಂದು ಆರೋಪಿಸಲಾಗಿದೆ. ಅವರ ನ್ಯೂಯಾರ್ಕ್ ನಿವಾಸ ಗ್ರೇಸಿ ಮ್ಯಾನ್ಷನ್ ಹೊರಗೆ ಪ್ರತಿಭಟನೆ ನಡೆದಿದ್ದು ದುಷ್ಕರ್ಮಿಗಳು ದಾಳಿ ನಡೆಸಿದ್ದಾರೆ. ಘಟನೆ ನಂತರ ಆರು ಜನರನ್ನು ಬಂಧಿಸಲಾಗಿದೆ. ನ್ಯೂಯಾರ್ಕ್ ಪೊಲೀಸ್ ಆಯುಕ್ತ ಜೆಸ್ಸಿಕಾ ಎಸ್. ಟಿಶ್ ಅವರ ಪ್ರಕಾರ, ಪ್ರತಿಭಟನೆಯ ಸಮಯದಲ್ಲಿ ಅನುಮಾನಾಸ್ಪದ ಸಾಧನವನ್ನು ಎಸೆಯಲಾಯಿತು. ಇದು ಸ್ವಲ್ಪ ಸಮಯದ ಗದ್ದಲಕ್ಕೆ ಕಾರಣವಾಯಿತು. ಘಟನೆಯ ಸಮಯದಲ್ಲಿ ಮೇಯರ್ ಮಮ್ದಾನಿ ಮತ್ತು ಅವರ ಪತ್ನಿ ರಾಮ ದುವಾಜಿ ಮನೆಯೊಳಗೆ ಇದ್ದಾರೋ ಇಲ್ಲವೋ ಎಂಬುದು ಸ್ಪಷ್ಟವಾಗಿಲ್ಲ. ಇಸ್ಲಾಮಿಕ್ ವಿರೋಧಿ ಪ್ರತಿಭಟನೆಗಳು ಮತ್ತು ಪ್ರತಿ-ಪ್ರತಿಭಟನೆಗಳ ನಡುವಿನ ಘರ್ಷಣೆಯ ಸಮಯದಲ್ಲಿ ಈ ಘಟನೆ ಸಂಭವಿಸಿದೆ.

ಈ ಇಸ್ಲಾಮಿಕ್ ವಿರೋಧಿ ಪ್ರತಿಭಟನೆಯನ್ನು ಸಾರ್ವಜನಿಕ ಸ್ಥಳಗಳಲ್ಲಿ ಮುಸ್ಲಿಂ ಪ್ರಾರ್ಥನೆಗಳನ್ನು ಪ್ರತಿಭಟಿಸಲು ಆಯೋಜಿಸಲಾಗಿತ್ತು. ಇದನ್ನು ಬಲಪಂಥೀಯ ಕಾರ್ಯಕರ್ತ ಜೇಕ್ ಲ್ಯಾಂಗ್‌ಗೆ ಸಂಬಂಧಿಸಿದ ವ್ಯಕ್ತಿಗಳು ಆಯೋಜಿಸಿದ್ದರು. ಜನವರಿ 6ರಂದು ನಡೆದ ಕ್ಯಾಪಿಟಲ್ ದಾಳಿಗೆ ಲ್ಯಾಂಗ್ ಈ ಹಿಂದೆ ಸಂಬಂಧ ಹೊಂದಿದ್ದರು. ಆರಂಭದಲ್ಲಿ ಇದು ಮೇಯರ್ ಮಮ್ದಾನಿ ಮೇಲೆ ದಾಳಿ ಮಾಡುವ ಪ್ರಯತ್ನವಾಗಿರಬಹುದು ಎಂಬ ಭಯವಿತ್ತು. ಆದರೆ ಪೊಲೀಸರು ನಂತರ ಅಂತಹ ಯಾವುದೇ ಸೂಚನೆಗಳು ಕಂಡುಬಂದಿಲ್ಲ. ಈ ಘಟನೆಯು ನಡೆಯುತ್ತಿರುವ ಯುಎಸ್-ಇಸ್ರೇಲ್-ಇರಾನ್ ಉದ್ವಿಗ್ನತೆಗೆ ಸಂಬಂಧಿಸಿಲ್ಲ ಎಂದು ಹೇಳಿದ್ದಾರೆ.

ಇಸ್ಲಾಂ ವಿರೋಧಿ ಪ್ರತಿಭಟನೆಯಲ್ಲಿ ಸುಮಾರು 20 ಜನರು ಭಾಗವಹಿಸಿದ್ದರು. ಈಸ್ಟ್ ಎಂಡ್ ಅವೆನ್ಯೂ ಮತ್ತು ಪೂರ್ವ 87ನೇ ಬೀದಿಯ ಬಳಿ ಬೆಳಿಗ್ಗೆ 11 ಗಂಟೆ ಸುಮಾರಿಗೆ ಪ್ರದರ್ಶನ ಪ್ರಾರಂಭವಾಯಿತು. ಇದಕ್ಕೆ ಪ್ರತಿಕ್ರಿಯೆಯಾಗಿ ನ್ಯೂಯಾರ್ಕ್ ನಗರದಿಂದ ನಾಜಿಗಳನ್ನು ಓಡಿಸಿ / ದ್ವೇಷದ ವಿರುದ್ಧ ನಿಂತುಕೊಳ್ಳಿ ಎಂಬ ಪ್ರತಿ-ಪ್ರತಿಭಟನೆಯನ್ನು ಆಯೋಜಿಸಲಾಯಿತು. ಇದು ಸುಮಾರು 125 ಜನರನ್ನು ಆಕರ್ಷಿಸಿತು. ಪರಿಸ್ಥಿತಿಯನ್ನು ನಿಯಂತ್ರಿಸಲು, ಪೊಲೀಸರು ಎರಡು ಗುಂಪುಗಳನ್ನು ಬೇರ್ಪಡಿಸಿದರು. ಆದಾಗ್ಯೂ, ಮಧ್ಯಾಹ್ನ 12:15ರ ಸುಮಾರಿಗೆ ಇಸ್ಲಾಂ ವಿರೋಧಿ ಪ್ರತಿಭಟನೆಯಲ್ಲಿ ಭಾಗವಹಿಸುತ್ತಿದ್ದ ವ್ಯಕ್ತಿಯೊಬ್ಬರು ಪ್ರತಿ-ಪ್ರತಿಭಟನಾಕಾರರ ಮೇಲೆ ಪೆಪ್ಪರ್ ಸ್ಪ್ರೇ ಸಿಂಪಡಿಸಿದಾಗ ಪರಿಸ್ಥಿತಿ ಇದ್ದಕ್ಕಿದ್ದಂತೆ ಉದ್ವಿಗ್ನವಾಯಿತು.

ಮಧ್ಯಾಹ್ನ 12:30ರ ಸುಮಾರಿಗೆ 18 ವರ್ಷದ ಪ್ರತಿಭಟನಾಕಾರ ಎಮಿರ್ ಬಾಲಾಟ್ ಎದುರಾಳಿ ಗುಂಪಿನ ಕಡೆಗೆ ಉರಿಯುತ್ತಿರುವ ಸಾಧನವನ್ನು ಎಸೆದಿದ್ದಾನೆ ಎಂದು ಆರೋಪಿಸಲಾಗಿದೆ. ಸ್ಪ್ರೇ ರೀತಿಯ ಸಾಧನಗಳನ್ನು ಎಸೆದಿದ್ದರು. ಈ ಸಂಬಂಧ ಇಬ್ಬರನ್ನೂ ವಶಕ್ಕೆ ಪಡೆಯಲಾಯಿತು. ಇಡೀ ಘಟನೆಯನ್ನು ಪೊಲೀಸ್ ಕ್ಯಾಮೆರಾಗಳಲ್ಲಿ ದಾಖಲಿಸಲಾಗಿದೆ.