ತೀವ್ರಗೊಂಡ ಕೊರೋನಾ ವೈರಸ್ ಭೀತಿ: ಸಾವಿನ ಸಂಖ್ಯೆ 636ಕ್ಕೆ ಏರಿಕೆ, 31,000 ಜನರಲ್ಲಿ ಸೋಂಕು ಪತ್ತೆ

ಬೀಜಿಂಗ್: ಚೀನಾದಲ್ಲಿ ಕೊರೋನಾ ವೈರಸ್ ಭೀತಿ ಮತ್ತಷ್ಟು ತೀವ್ರಗೊಂಡಿದ್ದು, ಸಾವಿನ ಸಂಖ್ಯೆ 636ಕ್ಕೆ ಏರಿಗೆಯಾಗಿದೆ. ಅಲ್ಲದೆ, ಸೋಂಕು ತಗುಲಿದವರ ಸಂಖ್ಯೆ 31,000 ತಲುಪಿದೆ ಎಂದು ಚೀನಾದ ಆರೋಗ್ಯಾಧಿಕಾರಿಗಳು ಮಾಹಿತಿ ನೀಡಿದ್ದಾರೆ. 

ವುಹಾನ್'ನ ಹುಬೆ ಪ್ರಾಂತ್ರಯಲ್ಲಿ 69 ಸಾವುಗಳಾಗಿರುವುದಾಗಿ ವರದಿಗಳಾಗಿದ್ದು, ಇದರಂತೆ ಹೆನಾನ್, ಗ್ವಾಂಗ್ಡೊಂಗ್, ಹೈನಾನ್ ಪ್ರದೇಶಗಳಲ್ಲಿಯೂ ಕೊರೋನಾ ವೈರಸ್ ತನ್ನ ಮರಣ ಮೃದಂಗವನ್ನು ಮುಂದುವರೆಸಿದೆ ಎಂದು ತಿಳಿಸಿದೆ. 

ಗುರುವಾರ ಒಂದೇ ದಿನದಲ್ಲಿ ಒಟ್ಟು 73 ಮಂದಿ ಸಾವನ್ನಪ್ಪಿದ್ದು, 3,143 ಮಂದಿಗೆ ಸೋಂಕು ತಗುಲಿರುವುದು ಪತ್ತೆಯಾಗಿದೆ. ಇದರಂತೆ ಸೋಂಕು ತಗುಲಿದವರ ಸಂಖ್ಯೆ 31,161ಕ್ಕೆ ಏರಿಕೆಯಾಗಿದೆ. ಈ ನಡುವೆ ಸೋಂಕು ತಗುಲಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ 1,540 ಮಂದಿ ಗುಣಮುಖರಾಗಿದ್ದು, ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. 

ಇನ್ನು ಚೀನಾದಲ್ಲಿದ್ದ 19 ಮಂದಿ ವಿದೇಶೀ ಪ್ರಜೆಗಳಿಗೂ ಸೋಂಕು ತಗುಲಿದ್ದು, ಯಾವ ರಾಷ್ಟ್ರದ ಪ್ರಜೆಗಳು ಎಂಬುದರ ಮಾಹಿತಿ ನೀಡಲು ಅಧಿಕಾರಿಗಳು ನಿರಾಕರಿಸಿದ್ದಾರೆ.