ಅಮೆರಿಕ ನಿಯೋಜಿತ ಅಧ್ಯಕ್ಷ ಜೋ ಬೈಡೆನ್ ಗೆ ಬ್ರೆಜಿಲ್ ಅಧ್ಯಕ್ಷರ ಅಭಿನಂದನೆ

ಬ್ರಸಿಲಿಯಾ: ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ಭರ್ಜರಿ ಜಯಗಳಿಸಿದ ಜೋ ಬೈಡೆನ್ ಅವರನ್ನು ಬ್ರೆಜಿಲ್ ಅಧ್ಯಕ್ಷ ಜೈರ್ ಬೋಲ್ಸನಾರೊ ಅವರು ಬುಧವಾರ ಅಭಿನಂದಿಸಿದ್ದಾರೆ.

ಪೋರ್ಚುಗೀಸ್ ಭಾಷೆಯಲ್ಲಿ ಬರೆದ ಟ್ವಿಟ್ಟರ್ ಪೋಸ್ಟ್ ನಲ್ಲಿ ತಾವು ಅಮೆರಿಕದ ಹೊಸ ಆಡಳಿತದೊಂದಿಗೆ ಕೆಲಸ ಮಾಡಲು ಸಿದ್ಧವಾಗಿದ್ದು, ದೇಶದ ಜನರ ಅನುಕೂಲಕ್ಕಾಗಿ "ಬ್ರೆಜಿಲ್-ಅಮೆರಿಕ ಮೈತ್ರಿಯನ್ನು ಮುಂದುವರಿಸಲಾಗುವುದು ಎಂದು ಬೋಲ್ಸೊನಾರೊ ಹೇಳಿದ್ದಾರೆ.

ಈ ಸಂದೇಶವನ್ನು ಬ್ರೆಜಿಲ್ ವಿದೇಶಾಂಗ ಸಚಿವಾಲಯದ ವೆಬ್‌ಸೈಟ್‌ನಲ್ಲಿ ಪೋಸ್ಟ್ ಮಾಡಲಾಗಿದೆ.

ಅಮೆರಿಕ ಚುನಾವಣಾ ಸಂಸ್ಥೆಯು ಸೋಮವಾರ ಬೈಡೆನ್‌ ಅವರಿಗೆ 306 ಮತಗಳ ಬಹುಮತವನ್ನು ನೀಡಿದ್ದು, ಇದು ನವೆಂಬರ್ ಚುನಾವಣೆಯಲ್ಲಿ ಅವರ ವಿಜಯವನ್ನು ದೃಢಪಡಿಸಿತು. 2021 ಜನವರಿ 20ರಂದು ಬೈಡೆನ್ ಅಮೆರಿಕ ಅಧ್ಯಕ್ಷರಾಗಿ ಅಧಿಕಾರ ಸ್ವೀಕರಿಸಲಿದ್ದಾರೆ.