ನೇಪಾಳದಲ್ಲಿ ಭಾರಿ ಭೂ ಕುಸಿತ: ಕನಿಷ್ಠ 18 ಸಾವು, 21 ಮಂದಿ ನಾಪತ್ತೆ

ಕಠ್ಮಂಡು: ಕಳೆದ ಕೆಲ ದಿನಗಳಿಂದ ಸುರಿಯುತ್ತಿರುವ ಭಾರಿ ಮಳೆಯಿಂದಾಗಿ ನೇಪಾಳದಲ್ಲಿ ಭಾರಿ ಭೂ ಕುಸಿತ ಸಂಭವಿಸಿದ್ದು, ಘಟನೆಯಲ್ಲಿ ಕನಿಷ್ಟ 18 ಮಂದಿ ಸಾವನ್ನಪ್ಪಿ 21 ಮಂದಿ ನಾಪತ್ತೆಯಾಗಿದೆ.

ಮಧ್ಯ ನೇಪಾಳದ ಸಿಂಧೂಪಾಲ್ ಚೌಕ್ ಜಿಲ್ಲೆಯ ಜುಗಾಲ್ ಗ್ರಾಮದಲ್ಲಿ ಭೂಕುಸಿತ ಸಂಭವಿಸಿದ್ದು, ಘಟನೆಯಲ್ಲಿ ಕನಿಷ್ಠ 18 ಮಂದಿ ಸಾವನ್ನಪ್ಪಿ, 21 ಮಂದಿ ನಾಪತ್ತೆಯಾಗಿದ್ದಾರೆ. ಈ ವರೆಗೂ 18ಮೃತ ದೇಹಗಳನ್ನು ಅವಶೇಷಗಳಡಿಯಿಂದ ಹೊರಕ್ಕೆ ತೆಗೆಯಲಾಗಿದೆ. ಇನ್ನೂ 21 ಮಂದಿ ನಾಪತ್ತೆಯಾಗಿದ್ದು, ನಾಪತ್ತೆಯಾಗಿರುವವರಿಗಾಗಿ ಕಾರ್ಯಾಚರಣೆ ಮುಂದುವರೆಸಲಾಗಿದೆ.

 ಮೂಲಗಳ ಪ್ರಕಾರ ಲಿಡಿ ಗ್ರಾಮದ ಗುಡ್ಡ ಕುಸಿದಿದ್ದು, 170 ಮನೆಗಳ ಪೈಕಿ 37 ಮನೆಗಳು ಭೂಕುಸಿತದಲ್ಲಿ ನಾಶವಾಗಿವೆ. ರಕ್ಷಣಾ ಕಾರ್ಯಾಚರಣೆ ಭರದಿಂದ ಸಾಗಿದ್ದು, ಗುಡ್ಡದ ಅಡಿಯಲ್ಲಿದ್ದ 25 ಮನೆಗಳು ನಾಮಾವಶೇಷವಾಗಿದೆ ಎಂದು ಸ್ಥಳೀಯ ಎಸ್ ಪಿ ಪ್ರಜ್ವೋಲ್ ಮಹಾರ್ಜನ್ ಹೇಳಿದ್ದಾರೆ.