ವಿಪ್ರೊ ಕಂಪೆನಿಯಲ್ಲಿ ಉದ್ಯೋಗದಲ್ಲಿ ತಾರತಮ್ಯ: ಅಮೆರಿಕಾದ ಮಾಜಿ ಉದ್ಯೋಗಿಗಳಿಂದ ಮೊಕದ್ದಮೆ ದಾಖಲು

ವಾಷಿಂಗ್ಟನ್: ಭಾರತದ ಐಟಿ ದಿಗ್ಗಜ ಕಂಪೆನಿ ವಿಪ್ರೊದಲ್ಲಿ ನೌಕರರ ಮಧ್ಯೆ ತಾರತಮ್ಯ ಮಾಡಲಾಗುತ್ತಿದೆ ಎಂದು ಆರೋಪಿಸಿ ಕಂಪೆನಿಯ ಐದು ಮಾಜಿ ಉದ್ಯೋಗಿಗಳು ಅಮೆರಿಕಾದಲ್ಲಿ ದಾವೆ ಹೂಡಿದ್ದಾರೆ.

ಬೆಂಗಳೂರಿನಲ್ಲಿ ಕೇಂದ್ರ ಕಚೇರಿ ಹೊಂದಿರುವ ವಿಪ್ರೊ ಸಂಸ್ಥೆಯಲ್ಲಿ ಜಗತ್ತಿನಾದ್ಯಂತ 1,60,000 ನೌಕರರಿದ್ದು ಅವರಲ್ಲಿ 14 ಸಾವಿರ ಮಂದಿ ನೌಕರರು ಅಮೆರಿಕಾದಲ್ಲಿದ್ದಾರೆ.

ಅಮೆರಿಕಾದ ನ್ಯೂಜೆರ್ಸಿಯಲ್ಲಿ ಮೊಕದ್ದಮೆ ಹೂಡಲಾಗಿದೆ. ವಿಪ್ರೊ ಕಂಪೆನಿಯಲ್ಲಿ ಕೆಲಸಕ್ಕಿರುವ ಶೇಕಡಾ 80ರಷ್ಟು ಮಂದಿ ದಕ್ಷಿಣ ಏಷ್ಯಾದವರಾಗಿದ್ದು, ಭಾರತೀಯ ಮೂಲದವರು ಮತ್ತು ದಕ್ಷಿಣ ಏಷ್ಯಾದವರಿಗೆ ಪ್ರಾಧಾನ್ಯತೆ ನೀಡಿ ತಾರತಮ್ಯ ತೋರಿಸಲಾಗುತ್ತಿದೆ ಎಂದು ಮಾಜಿ ಉದ್ಯೋಗಿಗಳು ಆರೋಪಿಸಿದ್ದಾರೆ.

ವಿಪ್ರೊ ಕಂಪೆನಿಯಲ್ಲಿ ನೌಕರರ ನೇಮಕಾತಿ, ಬಡ್ತಿ, ಸೇವೆಯಿಂದ ತೆಗೆದುಹಾಕುವ ನಿರ್ಧಾರದಲ್ಲಿ ತೀವ್ರ ಮಟ್ಟಿನ ತಾರತಮ್ಯ ತೋರಿಸುತ್ತಿದೆ ಎಂದು ಆರೋಪಿಸಿದ್ದಾರೆ.