ನೇಪಾಳದಲ್ಲಿ ಸಾರ್ಕ್ ಸದಸ್ಯ ರಾಷ್ಟ್ರಗಳ ಉನ್ನತ ಮಟ್ಟದ ಸಭೆ

ಕಠ್ಮಂಡು: ಸಾರ್ಕ್ ಸದಸ್ಯ ರಾಷ್ಟ್ರಗಳ ಹಿರಿಯ ಅಧಿಕಾರಿಗಳು ನೇಪಾಳದಲ್ಲಿ ಈ ವಾರ ಸಭೆ ನಡೆಸಲಿದ್ದಾರೆ. 

ಯೋಜನಾ ಸಮಿತಿಯ ಸಭೆ ಇದಾಗಿರಲಿದ್ದು, ಪಾಕಿಸ್ತಾನದಲ್ಲಿ 2016 ರ ನವೆಂಬರ್ ನಲ್ಲಿ ನಡೆಯಬೇಕಿದ್ದ 19 ನೇ ಸಾರ್ಕ್ ಸಮ್ಮೇಳನ ರದ್ದುಗೊಂಡ ನಂತರ ನಡೆಯುತ್ತಿರುವ ಸಭೆ ಇದಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. 

ಸಭೆಯಲ್ಲಿ ಸಾರ್ಕ್ ನ ಆಡಳಿತ ಕಚೇರಿಯ ಬಜೆಟ್ ಹಾಗೂ ಪ್ರಾದೇಶಿಕ ಕೇಂದ್ರಗಳ ಬಗ್ಗೆ ಸಭೆಯಲ್ಲಿ ಮುಖ್ಯವಾಗಿ ಚರ್ಚೆ ನಡೆಯಲಿದೆ ಎಂದು ನೇಪಾಳದ ವಿದೇಶಾಂಗ ಇಲಾಖೆ ಹೇಳಿರುವುದನ್ನು ಮಾಧ್ಯಮಗಳು ವರದಿ ಮಾಡಿವೆ. ಇಸ್ಲಾಮಾಬಾದ್ ನಲ್ಲಿ 2016 ರ ನವೆಂಬರ್ 9-10 ರ ವರೆಗೆ ನಡೆಯಬೇಕಿದ್ದ ಸಾರ್ಕ್ ರಾಷ್ಟ್ರಗಳ ಸಮ್ಮೇಳನವನ್ನು ಪಾಕಿಸ್ತಾನದ ಭಯೋತ್ಪಾದನೆಯನ್ನು ವಿರೋಧಿಸಿ ಭಾರತ ಬಹಿಷ್ಕರಿಸಿತ್ತು. ಭಾರತ ಬಹಿಷ್ಕರಿಸಿದ್ದ ಬೆನ್ನಲ್ಲೇ ಅಫ್ಘಾನಿಸ್ತಾನ, ಭೂತಾನ್, ಬಾಂಗ್ಲಾದೇಶ ಸಹ ಸಾರ್ಕ್ ಸಮ್ಮೇಳನವನ್ನು ಬಹಿಷ್ಕರಿಸಿದ್ದವು. ಆದರೆ ಈಗ ಪಾಕಿಸ್ತಾನ ಮತ್ತೆ ಸಮ್ಮೇಳನವನ್ನು ನಡೆಸುವ ಆಶಾವಾದ ವ್ಯಕ್ತಪಡಿಸಿದೆ.