ಇಂಡೋ- ಅಮೆರಿಕಾ ಒಪ್ಪಂದಗಳನ್ನು ಬಲಪಡಿಸಿದ್ದಕ್ಕೆ ಮೋದಿಗೆ ಧನ್ಯವಾದ ಹೇಳಿದ ಬರಾಕ್ ಒಬಾಮಾ

ವಾಷಿಂಗ್ಟನ್: ಭಾರತ ಮತ್ತು ಅಮೆರಿಕಾ ನಡುವಿನ ದ್ವಿಪಕ್ಷೀಯ ಒಪ್ಪಂದಗಳನ್ನು ಬಲಪಡಿಸಲು ಸಹಕರಿಸಿದ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ನಿರ್ಗಮಿತ ಅಧ್ಯಕ್ಷ ಬರಾಕ್ ಒಬಾಮಾ ಧನ್ಯವಾದ ಸಲ್ಲಿಸಿದ್ದಾರೆಂದು ವೈಟ್ ಹೌಸ್ ಮೂಲಗಳು ತಿಳಿಸಿವೆ.

ನಿನ್ನೆ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಕರೆ ಮಾಡಿ ಮಾತನಾಡಿದ ಒಬಾಮಾ ರಕ್ಷಣೆ. ನಾಗರಿಕ ಪರಮಾಣು ಶಕ್ತಿ ಸೇರಿದಂತೆ ಹಲವು ವಿಷಯಗಳ ಮೇಲಿನ ಒಪ್ಪಂದಗಳಲ್ಲಿ ಭಾರತದ ಸಹಭಾಗಿತ್ವಕ್ಕೆ ಅಭಿನಂದನೆ ಸಲ್ಲಿಸಿದ್ದಾರೆ. ಜೊತೆಗೆ ಹಲವು ವಿಷಯಗಳ ಬಗ್ಗೆ ಇಬ್ಬರು ನಾಯಕರು ಮಾತನಾಡಿದ್ದಾರೆ ಎಂದು ಹೇಳಲಾಗಿದೆ,

2015 ರ ಭಾರತದ ಗಣರಾಜ್ಯೋತ್ಸವ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದನ್ನು ಸ್ಮರಿಸಿದ ಒಬಾಮಾ ಮುಂಬರುವ 68ನೇ ಗಣರಾಜ್ಯೋತ್ಸವಕ್ಕಾಗಿ  ಮೋದಿಗೆ ಶುಭಾಶಯ ತಿಳಿಸಿರುವುದಾಗಿ ವೈಟ್ ಹೌಸ್ ಮೂಲಗಳು ತಿಳಿಸಿವೆ.

ಭಾರತ, ಅಮೆರಿಕಾದ  ಬಹುದೊಡ್ಡ ರಕ್ಷಣಾ ಪಾಲುದಾರನಾಗಿದ್ದು, ಹಾಗೂ ಜಾಗತಿಕ ಸವಾಲಾಗಿರುವ ಹವಾಮಾನ ಬದಲಾವಣೆ ಸೇರಿದಂತೆ ಹಲವು  ವಿಷಯಗಳಲ್ಲಿ ಭಾರತ ಜಾಗತಿಕ ಮಟ್ಟದಲ್ಲಿ ಗುರುತಿಸಿಕೊಳ್ಳುತ್ತಿದೆ. ಆರ್ಥಿಕ ಹಾಗೂ ಭಧ್ರತಾ ವಿಷಯಗಳ ಆದ್ಯತೆ ಹಾಗೂ ಪ್ರಗತಿ ಸಂಬಂಧ ಇಬ್ಬರು ನಾಯಕರು ಸಮಾಲೋಚಿಸಿದ್ದಾರೆ.

2014ರ ಮೇ ನಲ್ಲಿ ನಡೆದ ಲೋಕಸಭೆ ಚುನಾವಣೆಯಲ್ಲಿ ವಿಜಯ ಪತಾಕೆ ಹಾರಿಸಿದ ನರೇಂದ್ರ ಮೋದಿ ಅವರಿಗೆ ಮೊಟ್ಟ ಮೊದಲು ಒಬಾಮಾ ಅವರು ಶುಭಾಶಯ ತಿಳಿಸಿದ್ದರು. ಜೊತೆಗೆ ವೈಟ್ ಹೌಸ್ ಗೆ ಬರುವಂತೆ ಕೂಡಲೇ ಆಹ್ವಾನ ನೀಡಿದ್ದರು. 2014ರ ಸೆಪ್ಟಂಬರ್ ನಲ್ಲಿ ಇಬ್ಬರು ನಾಯಕರು ವೈಟ್ ಹೌಸ್ ನಲ್ಲಿ ಭೇಟಿ ಮಾಡಿದ್ದರು. ಅಂದಿನಿಂದ ಇಂದಿನವರೆಗೂ ಇಬ್ಬರು ನಾಯಕರು ಸುಮಾರು 8 ಬಾರಿ ಭೇಟಿ ಮಾಡಿದ್ದಾರೆ.