ಭಾರತದ ಎನ್ಎಸ್ ಜಿ ಸದಸ್ಯಕ್ಕೆ ಚೀನಾದಿಂದ ತಡೆ: ಬರಾಕ್ ಒಬಾಮ ಆಡಳಿತದ ಕಿಡಿ

ಚೀನಾವನ್ನು ಹೊರಗಿನ( ಸಂಬಂಧಪಡದ) ರಾಷ್ಟ್ರ ಎಂದಿರುವ ಅಮೆರಿಕ, ಭಾರತದ ಎನ್ಎಸ್ ಜಿ ಸದಸ್ಯತ್ವಕ್ಕೆ ಒಂದು ಹೊರಗಿನ ರಾಷ್ಟ್ರ ತಡೆಯೊಡ್ಡುತ್ತಿದ್ದು, ಅದು ನಿಸ್ಸಂಶಯವಾಗಿ ಚೀನಾ ಆಗಿದೆ. ಈ ಸಮಸ್ಯೆಯನ್ನು ಬಗೆಹರಿಸಬೇಕಿದೆ ಎಂದು ಅಮೆರಿಕ ಸರ್ಕಾರದ ದಕ್ಷಿಣ ಹಾಗೂ ಕೇಂದ್ರ ಏಷ್ಯಾ ವ್ಯವಹಾರಗಳ ಸಹಾಯಕ ಕಾರ್ಯದರ್ಶಿಯಾಗಿರುವ ನಿಶಾ ದೇಸಾಯಿ ಬಿಸ್ವಾಲ್ ಅಭಿಪ್ರಾಯಪ್ರಾಯಪಟ್ಟಿದ್ದಾರೆ. 

ಅಮೆರಿಕ ಎನ್ಎಸ್ ಜಿ ಸದಸ್ಯತ್ವಕ್ಕೆ ಸಂಬಂಧಿಸಿದಂತೆ ಭಾರತಕ್ಕೆ ಮತ್ತೊಮ್ಮೆ ಬೆಂಬಲ ನೀಡಿರುವುದು ಒಬಾಮ ಆಡಳಿತ ಕೊನೆಗೊಳ್ಳುವುದಕ್ಕೆ ಇನ್ನು 5 ದಿನಗಳಿದ್ದು, ಜ.20 ರಿಂದ ಟ್ರಂಪ್ ಆಡಳಿತ ಪ್ರಾರಂಭವಾಗಲಿರುವ ಸಂದರ್ಭದಲ್ಲಿ ಮಹತ್ವ ಪಡೆದುಕೊಂಡಿದೆ. ಭಾರತ ಎನ್ಎಸ್ ಜಿ ಸದಸ್ಯತ್ವ ಪಡೆಯುವ ವಿಚಾರಕ್ಕೆ ಸಂಬಂಧಿಸಿದಂತೆ ಬರಾಕ್ ಒಬಾಮ ಸ್ಪಷ್ಟ ನಿಲುವು ಹೊಂದಿದ್ದರು. ಎನ್ಎಸ್ ಜಿ ಸದಸ್ಯತ್ವಕ್ಕೆ ಸಂಬಂಧಿಸಿದಂತೆ ಭಾರತದೊಂದಿಗೆ ಅಮೆರಿಕ ನಿಕಟವಾಗಿ ವ್ಯವಹರಿಸಿತ್ತು. ಆದರೆ ಒಂದು ರಾಷ್ಟ್ರದಿಂದ ಎದುರಾಗಿರುವ ತಡೆಯನ್ನು ನಿವಾರಿಸಬೇಕಿದೆ ಎಂದು ನಿಶಾ ದೇಸಾಯಿ ಬಿಸ್ವಾಲ್ ಹೇಳಿದ್ದಾರೆ.