ಲಂಕಾ ಭೂಕುಸಿತ: ನಾಪತ್ತೆಯಾದ 134 ಮಂದಿ ಸಾವು; ತಜ್ಞರ ಅಭಿಪ್ರಾಯ

ಕೊಲಂಬೋ: ಸೈಕ್ಲೋನ್ ಪೀಡಿತ ಶ್ರೀಲಂಕಾದಲ್ಲಿ ನಡೆದ ಭೂಕುಸಿತ ದುರಂತದಲ್ಲಿ ನಾಪತ್ತೆಯಾಗಿದ್ದ 134 ಮಂದಿ ಸಾವಿಗೀಡಾಗಿರುವ ಕುರಿತು ರಕ್ಷಣಾ ಕಾರ್ಯಾಚರಣೆಯ ಯೋಧರು ಶಂಕೆ  ವ್ಯಕ್ತಪಡಿಸಿದ್ದಾರೆ.

ಕಳೆದ 2 ದಿನಗಳಿಂದ ಸತತವಾಗಿ ನಡೆಯುತ್ತಿರುವ ಕಾರ್ಯಾಚರಣೆಯಲ್ಲಿ ಈ ವರೆಗೂ ಕೆಸರಿನಲ್ಲಿ ಅಪಾಯದಲ್ಲಿ ಸಿಲುಕಿದ್ದ ಸುಮಾರು 154 ಮಂದಿಯನ್ನು ರಕ್ಷಿಸಲಾಗಿದ್ದು, 10 ಮೃತದೇಹಗಳನ್ನು  ಹೊರತೆಗೆಯಲಾಗಿದೆ. ಆ ಮೂಲಕ ಭೂಕುಸಿತದಲ್ಲಿ ಮೃತಪಟ್ಟವರ ಸಂಖ್ಯೆ 43ಕ್ಕೇರಿದ್ದು, ಇನ್ನೂ 150ಕ್ಕೂ ಅಧಿಕ ಮಂದಿ ನಾಪತ್ತೆಯಾಗಿದ್ದಾರೆ. ಇನ್ನು ಭೂಕುಸಿತ ಸಂಭವಿಸಿದ ಕೆಗಾಲ್ಲೆ ಜಿಲ್ಲೆಯಲ್ಲಿ  ನಾಪತ್ತೆಯಾಗಿದ್ದ 134 ಮಂದಿ ಸಾವಿಗೀಡಾಗಿರುವ ಕುರಿತು ಶಂಕೆ ವ್ಯಕ್ತವಾಗುತ್ತಿದೆ.

ರಕ್ಷಣಾ ಕಾರ್ಯಾಚರಣೆ ನಡೆಸುತ್ತಿರುವ ಯೋಧರು ಈ ಬಗ್ಗೆ ಶಂಕೆ ವ್ಯಕ್ತಪಡಿಸುತ್ತಿದ್ದು, ನಾಪತ್ತೆಯಾದವರು ಮಣ್ಣಿನಡಿ ಸಿಲುಕಿ ಸಾವನ್ನಪ್ಪಿರಬಹುದು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.  ಆದರೂ ರಕ್ಷಣಾ ಕಾರ್ಯಾಚರಣೆಯನ್ನು ಮುಂದುವರೆಸಲಾಗಿದ್ದು, ಸುಮಾರು 3 ಲಕ್ಷದ 50 ಸಾವಿರ ಮಂದಿಯನ್ನು ಸುರಕ್ಷಿತ ಪ್ರದೇಶಗಳಿಗೆ ಸ್ಥಳಾಂತರಿಸಲಾಗಿದೆ. ಈ ಬಗ್ಗೆ ಮಾಧ್ಯಮಗಳಿಗೆ  ಮಾಹಿತಿ ನೀಡಿರುವ ಮೇಜರ್ ಜನರಲ್ ಸುದಂತಾ ರಣಸಿಂಘೆ ಅವರು, ನಾಪತ್ತೆಯಾದ 134 ಮಂದಿ ಸಾವಿಗೀಡಾಗಿರುವ ಕುರಿತು ಶಂಕೆ ವ್ಯಕ್ತವಾಗುತ್ತಿದೆ. ಇವರೆಗೂ ಅವರ ಬಗ್ಗೆ ಯಾವುದೇ  ಮಾಹಿತಿಗಳು ಲಭ್ಯವಾಗಿಲ್ಲ. ಆದರೂ ರಕ್ಷಣಾ ಕಾರ್ಯಾಚರಣೆ ಮುಂದವರೆಸಲಾಗಿದೆ ಎಂದು ಹೇಳಿದ್ದಾರೆ.

ಲಂಕಾಗೆ ಭಾರತೀಯ ನೌಕಾಪಡೆಯ ಹಡಗುಗಳು
ಇದೇ ವೇಳೆ ಶ್ರೀಲಂಕಾದಲ್ಲಿ ಸಂಭವಿಸಿರುವ ದುರಂತಕ್ಕೆ ಸಂಬಂಧಿಸಿದಂತೆ ತುರ್ತು ಪರಿಹಾರ ಕಾರ್ಯಾಚರಣೆ ನಡೆಸಲು ಭಾರತೀಯ ನೌಕಾಪಡೆಯ 2 ಹಡಗುಗಳನ್ನು ಶುಕ್ರವಾರ ಭಾರತ  ಕಳಿಸಿಕೊಡಲಾಗಿದೆ. ಐಎನ್​ಎಸ್ ಸುನೈನಾ (ಕಡಲ ತೀರದ ವಿಚಕ್ಷಣಾ ಪಡೆ) ಮತ್ತು ಐಎನ್​ಎಸ್ ಸಟ್ಲೇಜ್ (ಸರ್ವೆಕ್ಷಣಾ ಮತ್ತು ಪರಿಹಾರ ಸಾಮಗ್ರಿ )ಎಂಬ ಎರಡು ಹಡಗುಗಳು ಇಲ್ಲಿನ ಸದರನ್  ನೇವಲ್ ಕಮಾಂಡ್ ಘಟಕದಿಂದ ಕೊಲಂಬೋ ಕಡೆಗೆ ಪ್ರಯಾಣ ಬೆಳೆಸಿದೆ.