ಈಜಿಪ್ಟ್ ಬಳಿ ರಷ್ಯಾ ವಿಮಾನ ಪತನ: 5 ಮಕ್ಕಳು ಸೇರಿ 100 ಪ್ರಯಾಣಿಕರ ಶವ ಪತ್ತೆ

ಕೈರೋ: ಈಜಿಪ್ಟ್ ನ ಸಿಯಾನ್ ಬಳಿ ರಷ್ಯಾದ- A 321 ಏರ್ ಬಸ್ ಪತನಗೊಂಡಿದ್ದು, ವಿಮಾನದಲ್ಲಿದ್ದ 224 ಪ್ರಯಾಣಿಕರ ಪೈಕಿ ಐವರು ಮಕ್ಕಳು ಸೇರಿ 100 ಪ್ರಯಾಣಿಕರ ಸಾವನ್ನಪ್ಪಿದ್ದಾರೆ.
ಈಜಿಪ್ಟ್ ನಿಂದ ರಷ್ಯಾಗೆ ತೆರಳಬೇಕಿದ್ದ ವಿಮಾನ ಈಜಿಪ್ಟ್ ನಿಂದ ಟೇಕ್ ಆಫ್ ಅದ ಕೆಲವೇ ನಿಮಿಷಗಳಲ್ಲಿ ಟ್ರಾಫಿಕ್ ಕಂಟ್ರೋಲ್ ನ ಸಂಪರ್ಕ ಕಡಿದುಕೊಂಡು ನಾಪತ್ತೆಯಾಗಿತ್ತು. ನಾಪತ್ತೆಯಾಗಿದ್ದ ವಿಮಾನ ಈಜಿಪ್ಟ್ ನ ಸಿಯಾನ್ ಬಳಿ ಪತನವಾಗಿರುವುದನ್ನು ಈಜಿಪ್ಟ್ ನ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ಪತನಗೊಂಡಿರುವ ವಿಮಾನದಲ್ಲಿ ಸಿಲುಕಿರುವ ಪ್ರಯಾಣಿಕರನ್ನು ರಕ್ಷಿಸುವ ಕಾರ್ಯಾಚಾರಣೆ ನಡೆಯುತ್ತಿದ್ದು, ಈ ವರೆಗೂ ರಕ್ಷಣಾ ಸಿಬ್ಬಂದಿ ನಾಲ್ವರನ್ನು ರಕ್ಷಿಸಿದ್ದಾರೆ.
ಪತನಗೊಂಡ ವಿಮಾನದಲ್ಲಿ ಬಹುತೇಕ ರಷ್ಯಾ ಪ್ರವಾಸಿಗರಿದ್ದರು. ಈಜಿಪ್ಟ್ ನ ಶರ್ಮ್ ಎಲ್ ಶೇಕ್ ನ ರೆಡ್ ಸಿ ರೆಸಾರ್ಟ್ ನಿಂದ ರಷ್ಯಾಗೆ ತೆರಳುತ್ತಿದ್ದ ವಿಮಾನ, ಟೇಕ್ ಆಫ್ ಅದ ಕೆಲವೇ ನಿಮಿಷಗಳಲ್ಲಿ ರೆಡಾರ್ ನ ಸಂಪರ್ಕ ಕಳೆದುಕೊಂಡಿತ್ತು ಎಂದು ಏರ್ ಟ್ರಾಫಿಕ್ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಪತನಗೊಳ್ಳುವುದಕ್ಕೂ ಮುನ್ನ ಈಜಿಪ್ಟಿನ ವಾಯುಪ್ರದೇಶವನ್ನು ದಾಟಿತ್ತು ಎಂದು ಹೇಳಲಾಗಿದೆ.