ಮೋದಿಯೊಂದಿಗಿನ ಸಂಬಂಧಕ್ಕೆ ಒಬಾಮ ಮಹತ್ವ: ಶ್ವೇತ ಭವನ

ವಾಷಿಂಗ್ಟನ್: ಪ್ರಧಾನಿ ನರೇಂದ್ರ ಮೋದಿ ಅವರೊಂದಿಗಿನ ಸಂಬಂಧಕ್ಕೆ ಅಮೇರಿಕಾ ಅಧ್ಯಕ್ಷ ಬರಾಕ್ ಒಬಾಮ ಅತಿ ಹೆಚ್ಚು ಮಹತ್ವ ನೀಡಲಿದ್ದಾರೆ ಎಂದು ಅಮೆರಿಕಾದ ಶ್ವೇತ ಭವನ ಹೇಳಿದೆ.
ಉಭಯ ನಾಯಕರೂ ಅತ್ಯುತ್ತಮ ಪಾಲುದಾರಿಕೆ ಹೊಂದಿದ್ದಾರೆ, ಆರ್ಥಿಕ ಅವಕಾಶಗಳನ್ನು ವಿಸ್ತರಿಸುವ ವಿಷಯದಲ್ಲಿ ಈ ದ್ವಿಪಕ್ಷೀಯ ಸಂಬಂಧ ಪ್ರಮುಖವಾಗಿದ್ದು ಮೋದಿ ಅವರೊಂದಿಗೆ ಸಂಬಂಧಕ್ಕೆ ಬರಾಕ್ ಒಬಾಮ ಹೆಚ್ಚು ಮಹತ್ವ ನೀಡಲಿದ್ದಾರೆ. ಅಮೇರಿಕ ಹಾಗೂ ಭಾರತ ಅತ್ಯಂತ ನಿಕಟವಾಗಿ ಕೆಲಸ ಮಾಡುತ್ತಿವೆ ಎಂದು ವೈಟ್ ಹೌಸ್ ನ ಪತ್ರಿಕಾ ಕಾರ್ಯದರ್ಶಿ ಹೇಳಿದ್ದಾರೆ.
ಭಾರತದೊಂದಿಗಿನ ಸಂಬಂಧದೆಡೆಗೆ ಗಮನ ಕೇಂದ್ರೀಕರಿಸಲು ಬರಾಕ್ ಒಬಾಮ ವೈಟ್ ಹೌಸ್ ನಲ್ಲಿರುವ ತಮ್ಮ ತಂಡಕ್ಕೆ ನಿರ್ದೇಶನ ನೀಡಿದ್ದು ಸಹಕಾರವನ್ನು ವೃದ್ಧಿಸುವ ಅವಕಾಶಗಳನ್ನು ಹೆಚ್ಚಿಸುವಂತೆ ಸೂಚಿಸಿದ್ದಾರೆ ಎಂದು ಶ್ವೇತ ಭವನದ ಪತ್ರಿಕಾ ಕಾರ್ಯದರ್ಶಿ ಷುಲ್ಟ್ಜ್ ತಿಳಿಸಿದ್ದಾರೆ.