ಇಸಿಸ್ ಉಗ್ರ ಪಡೆಯಿಂದ ಇರಾಕ್ ನಲ್ಲಿ 3 ಕಾರ್ ಬಾಂಬ್ ಸ್ಫೋಟ; ಕನಿಷ್ಠ 56 ಸಾವು

ಬಾಗ್ದಾದ್: ಗಲಭೆ ಪೀಡಿತ ಇರಾಕ್ ನಲ್ಲಿ ಸೋಮವಾರ ರಾತ್ರಿ ವಿವಿಧೆಡೆ ನಡೆದ ಸರಣಿ ಕಾರ್ ಬಾಂಬ್ ಸ್ಫೋಟದಲ್ಲಿ ಕನಿಷ್ಠ 56 ಮಂದಿ ಸಾವಿಗೀಡಾಗಿದ್ದಾರೆ ಎಂದು ತಿಳಿದುಬಂದಿದೆ.

ಇರಾಕ್ ಅತ್ಯಂತ ಜನನಿಭಿಡ ಪ್ರದೇಶಗಳಾದ ಈಶಾನ್ಯ ಭಾಗದ ದಿಯಾಲ, ಜುಬಾರ್ಯ್ ಮತ್ತು ಬಸ್ರಾ ಪ್ರದೇಶದಲ್ಲಿ ಈ ಸ್ಫೋಟಗಳಾಗಿದ್ದು, ಘಟನೆಯಲ್ಲಿ ಕನಿಷ್ಠ 56 ಮಂದಿ ಸಾವನ್ನಪ್ಪಿ, 60ಕ್ಕೂ  ಅಧಿಕ ಮಂದಿ ಗಂಭೀರವಾಗಿ ಗಾಯಗೊಂಡಿದ್ದಾರೆ ಎಂದು ತಿಳಿದುಬಂದಿದೆ. ದಿಯಾಲ ಪ್ರದೇಶದಲ್ಲಿ ಸ್ಫೋಟಗೊಂಡ ಕಾರ್ ಬಾಂಬ್ ಸ್ಫೋಟವೊಂದರಲ್ಲಿಯೇ ಸುಮಾರು 36 ಮಂದಿ  ಅಸುನೀಗಿದ್ದು, ಜುಬಾರ್ಯ್ ಮತ್ತು ಬಸ್ರಾ ಪ್ರದೇಶದಲ್ಲಿ ನಡೆದ ಸ್ಫೋಟದಲ್ಲಿ 10ಕ್ಕೂ ಅಧಿಕ ಮಂದಿ ಸಾವನ್ನಪ್ಪಿದ್ದಾರೆ ಎಂದು ಹೇಳಲಾಗುತ್ತಿದೆ.

ಇನ್ನು ಸ್ಫೋಟದ ಹೊಣೆಯನ್ನು ಇಸಿಸ್ ಉಗ್ರಗಾಮಿ ಸಂಘಟನೆ ಹೊತ್ತಿದ್ದು, ಇದರ ಕಪಿಮುಷ್ಠಿಗೆ ಸಿಲುಕಿ ನಲುಗುತ್ತಿರುವ ಇರಾಕ್ ಮತ್ತು ಸಿರಿಯಾದಲ್ಲಿ ಅಮೆರಿಕ ಮತ್ತು ರಷ್ಯಾ ಮೈತ್ರಿಪಡೆಗಳು  ನಡೆಸುತ್ತಿರುವ ವೈಮಾನಿಕ ದಾಳಿಯನ್ನು ಖಂಡಿಸಿ ಈ ಕಾರ್ ಬಾಂಬ್ ಸ್ಫೋಟ ನಡೆಸಲಾಗಿದೆ ಎಂದು ಇಸಿಸ್ ಉಗ್ರ ಸಂಘಟನೆಯ ಮೂಲಗಳು ಹೇಳಿಕೊಂಡಿವೆ.