ಸೇನಾಧ್ಯಕ್ಷರೊಂದಿಗೆ ಚರ್ಚಿಸಿಯೇ ತುರ್ತು ಪರಿಸ್ಥಿತಿ ಹೇರಿದ್ದೆ: ಮುಷರಫ್

ಇಸ್ಲಾಮಾಬಾದ್: 2007ರಲ್ಲಿ ಪಾಕಿಸ್ತಾನದಲ್ಲಿ ತುರ್ತು ಪರಿಸ್ಥಿತಿ ಹೇರುವುದಕ್ಕೂ ಮೊದಲು ಸೇನಾಧ್ಯಕ್ಷರೊಂದಿಗೆ ಚರ್ಚಿಸಿದ್ದೆ ಎಂದು ಮಾಜಿ ಅಧ್ಯಕ್ಷ ಜನರಲ್ ಫರ್ವೇಜ್ ಮುಷರಫ್ ಹೇಳಿದ್ದಾರೆ.

ಈ ಬಗ್ಗೆ ಡಾನ್ ಸುದ್ದಿಸಂಸ್ಥೆಯೊಂದಿಗೆ ಮಾತನಾಡಿರುವ ಮುಷರಫ್, ಪಾಕಿಸ್ತಾನದ ಆಂತರಿಕ ಪರಿಸ್ಥಿತಿ ಗಂಭೀರವಾದ್ದರಿಂದ ಅನಿವಾರ್ಯವಾಗಿ ತುರ್ತು ಪರಿಸ್ಥಿತಿ ಹೇರಲಾಗಿತ್ತು. ಆದರೆ  ಇದಕ್ಕೂ ಮೊದಲು ಅಂದಿನ ಸೇನಾ ಮುಖ್ಯಸ್ಥರಾಗಿದ್ದ ಜನರಲ್ ಅಶ್ಫಾಕ್ ಫರ್ವೇಜ್ ಖಯಾನಿ ಅವರೊಂದಿಗೆ ಈ ಬಗ್ಗೆ ಚರ್ಚಿಸಿದ್ದೆ. ಅಂತೆಯೇ ಅಂದಿನ ಪ್ರಧಾನಿ ಶೌಕತ್ ಎಜೀಜ್ ಅವರನ್ನು  ಸಂಪರ್ಕಿಸಿ ಚರ್ಚಿಸಿದ್ದೆ. ಆ ಬಳಿಕವೇ ತುರ್ತು ಪರಿಸ್ಥಿತಿ ಹೇರಲಾಗಿತ್ತು ಎಂದು ಮುಷರಫ್ ಹೇಳಿದ್ದಾರೆ.

ಅಲ್ಲದೆ ಸೇನಾ ಮುಖ್ಯಸ್ಥ ಖಯಾನಿ ಅವರನ್ನು ಈ ಪ್ರಕರಣದಲ್ಲಿ ಪ್ರಧಾನ ಅರೋಪಿ ಅಪರಾಧಿ ಎಂದು ಹೇಳಿರುವ ಮುಷರಫ್, ಖಯಾನಿ ಅವರು ನವೆಂಬರ್ 27ರಂದು ಪಾಕಿಸ್ತಾನದ  ಸೇನಾಧ್ಯಕ್ಷರಾಗಿ ಅಧಿಕಾರ ಸ್ವೀಕರಿಸಿದರು. ಆ ಬಳಿಕವಾದರೂ ತುರ್ತು ಪರಿಸ್ಥಿತಿ ಹಿಂತೆಗೆದುಕೊಳ್ಳಬಹುದಿತ್ತು ಅದರೆ ಅವರು ಹಿಂತೆಗೆದುಕೊಳ್ಳಲಿಲ್ಲ ಎಂದು ಮುಷರಫ್ ಹೇಳಿದ್ದಾರೆ.

2007 ನವೆಂಬರ್ 3ರಿಂದ ಪಾಕಿಸ್ತಾನದಲ್ಲಿ ಸಂವಿಧಾನವನ್ನು ಅಮಾನತ್ತಿನಲ್ಲಿಟ್ಟು ಹೇರಲಾಗಿದ್ದ ಆಂತರಿಕ ತುರ್ತು ಪರಿಸ್ಥಿತಿ ಡಿಸೆಂಬರ್ 15 ರವರೆಗೂ ಮುಂದುವರೆದಿತ್ತು. ಇದೇ ಪ್ರಕರಣ ಸಂಬಂಧ ಮುಷರಫ್ ವಿರುದ್ಧ ದೇಶದ್ರೋಹ ದೂರು ಕೂಡ ದಾಖಲಾಗಿದ್ದು, ಪಾಕಿಸ್ತಾನ ಸುಪ್ರೀಂ ಕೋರ್ಟ್ ಮುಷರಫ್ ಗೆ ಛೀಮಾರಿ ಕೂಡ ಹಾಕಿತ್ತು.