ನಾನೊಬ್ಬ ಭಾರತೀಯನೆಂದು ಹೇಳಿಕೊಳ್ಳಲು ಹೆಮ್ಮೆಯಾಗುತ್ತದೆ: ಪೋರ್ಚುಗಲ್ ಪ್ರಧಾನಿ ಆಂಟೋನಿಯೋ ಕೋಸ್ಟಾ

ಬೆಂಗಳೂರು: ತಾನೊಬ್ಬ ಭಾರತೀಯನೆಂದು ಹೇಳಿಕೊಳ್ಳಲು ನನಗೆ ಅತ್ಯಂತ ಹೆಮ್ಮೆ ಎನ್ನಿಸುತ್ತದೆ ಎಂದು ಪೋರ್ಚುಗಲ್ ಪ್ರಧಾನಿ ಡಾ.ಆಂಟೋನಿಯೋ ಕೋಸ್ಟಾ ಅವರು ಭಾನುವಾರ ಹೇಳಿದ್ದಾರೆ.

ತುಮಕೂರು ರಸ್ತೆಯಲ್ಲಿನ ಬೆಂಗಳೂರು ಅಂತಾರಾಷ್ಟ್ರೀಯ ವಸ್ತುಪ್ರದರ್ಶನ ಕೇಂದ್ರದಲ್ಲಿ ಏರ್ಪಡಿಸಿರುವ ಪ್ರವಾಸಿ ಭಾರತೀಯ ದಿವಸ್ ಕಾರ್ಯಕ್ರಮದ 2ನೇ ದಿನ ನಡೆದ ಕಾರ್ಯಕ್ರಮದಲ್ಲಿ ಪ್ರಧಾನಿ ನರೇಂದ್ರ ಮೋದಿ  ಅವರೊಂದಿಗೆ ವೇದಿಕೆ ಹಂಚಿಕೊಂಡಿದ್ದ ಪೋರ್ಚುಗಲ್ ಪ್ರಧಾನಿ ಆಂಟೋನಿಯೋ ಕೋಸ್ಟಾ ಅವರು, ನಮ್ಮ ಪೂರ್ವಜರು ಭಾರತ ದೇಶದ ಗೋವಾ ಮೂಲದವರೆಂದು ಹೇಳಿದರು. ಅಲ್ಲದೆ ಈ ಬಗ್ಗೆ ದಾಖಲೆಗಳನ್ನು ಪ್ರದರ್ಶಿಸಿದರು.  ಸಮಾರಂಭದಲ್ಲಿ ಮುಖ್ಯ ಅತಿಥಿಗಳಾಗಿ ಪಾಲ್ಗೊಂಡು ಮಾತನಾಡಿದ ಅವರು, ಭಾರತ ಮತ್ತು ಪೋರ್ಚುಗಲ್ ಉಭಯ ದೇಶಗಳ ಅಭಿವೃದ್ಧಿಗೆ ತಾನು ಆಸಕ್ತನಾಗಿದ್ದು, ಶಿಕ್ಷಣ, ಕೈಗಾರಿಕೆ, ಮೂಲಸೌಕರ್ಯ, ಹೂಡಿಕೆ ವಲಯದಲ್ಲಿ  ಭಾರತಕ್ಕೆ ತಾವು ನೆರವು ನೀಡಲು ಸಾದಾ ಸಿದ್ದ ಎಂದು ಹೇಳಿದರು. ಭಾರತೀಯರಿಗೆ ಯಾವುದೇ ರೀತಿಯ ನೆರವು ನೀಡಲು ತಾವು ಸದಾ ಸಿದ್ಧ ಎಂದು ಅವರು ಇದೇ ಸಂದರ್ಭದಲ್ಲಿ ಘೋಷಣೆ ಮಾಡಿದರು.

ಬಹಳ ಹಿಂದೆಯೇ ತಮ್ಮ ಕುಟುಂಬದವರು ಪೋರ್ಚುಗಲ್‌ಗೆ ವಲಸೆ ಹೋಗಿದ್ದು, ತಾನು ಭಾರತಕ್ಕೆ ಬಂದಾಗ ಗೋವಾಕ್ಕೆ ತೆರಳಿ ತಮ್ಮ ಸಂಬಂಧಿಕರನ್ನು ಭೇಟಿ ಮಾಡುತ್ತೇನೆ. ಪೋರ್ಚುಗಲ್ ಹಾಗೂ ಭಾರತದ ನಡುವೆ  ಶತಮಾನಕ್ಕೂ ಮೀರಿದ ಬಾಂಧವ್ಯವಿದೆ ಎಂದು ಆಂಟೋನಿಯೋ ಕೋಸ್ಟಾ ಎಂದು ಹೇಳಿದರು.